USAID-in ləğvi Vaşinqtonun maraqlarına cavab verir

Bu təsisata bağlı olan bütün uzantılar barədə dərhal tədbirlər görülməlidir

"ABŞ-nin Beynəlxalq İnkişaf Agentliyi Marşal planı çərçivəsində ötən əsrin ortalarında yaradılmış, uzunmüddətli iqtisadi və sosial inkişafa yönəlmiş nəhəng təsisatdır. Bu günə qədər USAID kənd təsərrüfatı, ticarət, qlobal səhiyyə, demokratiya, humanitar yardıma dəstək istiqamətlərində, daha doğrusu, bu ad altında dövlətlərin asılılıq altına salınması istiqamətində çoxsaylı proqramlar reallaşdırıb".

Bu sözləri "Azərbaycan" qəzetinə Milli Məclisin deputatı Bəhruz Məhərrəmov deyib. O bildirib ki, Açıq Cəmiyyət İnstitutunun yetirməsi olan və Sorosun dəstəyi ilə karyera qurmuş Samanta Pauerin USAID-ə rəhbər təyin olunması isə təsisatın fəaliyyətini daha da radikallaşdırıb, xüsusən islam və türk dünyasına münasibətdə hücumları intensivləşdirib. Ümumiyyətlə, Pauer öz fəaliyyəti dövründə dəfələrlə Türkiyəni aşağılayaraq aşkar şəkildə terroru və vandalizmi dəstəkləyib. Davamlı olaraq sosial şəbəkələrdə həm Sorosdan gələn tezislərə müvafiq olaraq başlanan kampaniyalar çərçivəsində, həm də öz təşəbbüsü ilə erməni lobbisi ilə həmrəylik nümayiş etdirib, o cümlədən Vətən müharibəsi və antiterror tədbirləri dövründə özü və USAID açıq formada tərəf kimi davranıb, bu gün də proses eyni qaydada davam edir. "Antiterror tədbirlərinin ardınca Azərbaycan hüquq-mühafizə orqanları tərəfindən yaxalanan separatçı rejimin keçmiş "lider"lərinin istintaqa verdiyi ifadələr Samanta Pauerin həm də korrupsiyalaşmış, muzdlu fiqur olduğu reallığını meydana çıxarır. Təsadüfi deyil ki, separatçı "lider"lərin saxlanmasının ardınca Samanta Pauer böyük həyəcanla Ermənistana səfər edib və Azərbaycan-Ermənistan şərti sərhədində jurnalistlərə müsahibəsində Azərbaycanı açıq şəkildə ittiham etmiş, Ermənistanın işğal və təcavüz siyasətini dəstəkləmişdir", - deyə deputat əlavə edib.

B.Məhərrəmov qeyd edib ki, demokratlar iqtidarı zamanında ABŞ Dövlət Departamentindən aldığı tezislər əsasında USAID-in imkanları səfərbər olunaraq beynəlxalq ictimai rəydə Azərbaycan əleyhinə qərəzli fon formalaşdırılması, həmçinin Azərbaycan daxilində süni qarşıdurma yaradılması istiqamətində çoxsaylı, çoxşaxəli fəaliyyətlərə start verib. Ötən il USAID-in Ermənistana 5 illik yardım paketini iki dəfə artırması da məhz bu çərçivədə qiymətləndirilməlidir. Görünən o idi ki, imperializm hələ də regionda sabit, təhlükəsiz mühitin qurulmasını arzulamır və Beynəlxalq İnkişaf Agentliyi də bu prosesdə ənənəvi olaraq mexanizm kimi çıxış edirdi. Lakin bölgədə artıq elə bir reallıq yaranıb ki, ABŞ-nin Beynəlxalq İnkişaf Agentliyinin proseslərə hər hansı formada köklü təsir etmək imkanı minimuma enib, xüsusən Azərbaycan vətəndaş cəmiyyəti institutlarında həyata keçirilən şəffaflaşma və sağlamlaşma fonunda təsisatın Azərbaycan cəmiyyətinə təsiri mümkünsüzdür. Bu baxımdan USAID daha çox gücü Ermənistan daxilində fəaliyyətə, o cümlədən bu ölkəyə təcavüzkar məqsədlərin dəstəklənməsi üçün əlavə yardımlar ayrılmasına yönəltmişdi.

B.Məhərrəmov vurğulayıb ki, USAID erasına son qoyulması Tramp iqtidarının bu təxribatçı təşkilatın Vaşinqtonun maraqlarına cavab vermədiyi qənaətində olduğunu göstərməkdədir: "Elə öz regionumuza münasibətdə təhlil etsək, aydındır ki, ABŞ-nin Cənubi Qafqazda öz maraqları var və cənab Tramp da yaxşı anlayır ki, bu maraqları bölgənin zəif bəndi olan Ermənistanla əməkdaşlıq zəminində formalaşdırmaq mümkün deyil. Eləcə də digər coğrafiyalarda bərabərhüquqlu tərəfdaşlıqlar USAID-in təxribatçı və ayırıcı xətlər təşviq edən konfiqurasiyasından daha çox üstündür. Bu mənada USAID-in ləğvi, əslində, Vaşinqtonun maraqlarına cavab verir. Əlbəttə, belə bir fonda USAID-in tör-töküntülərinin mövcudluğunu davam etdirməsi və yaxud bu çərçivədə hansısa formada layihələrin həyata keçirilməsi Azərbaycanın milli maraqlarına, həmçinin xalqın milli birliyi, Vətən müharibəsi və antiterror tədbirləri ilə daha da möhkəmlənmiş milli həmrəyliyinə ziddir".

Deputat yekunda bildirib ki, bu təsisata bu və ya digər formada bağlı olan bütün uzantılar barədə dərhal tədbirlər görülməlidir.

Əsmər QARDAŞXANOVA,

Azərbaycan.-2025.- 6 fevral (№ 22).- S.6.