Prezident İlham Əliyevin siyasəti də şəxsiyyəti kimi bütövdür

Onu ilk dəfə Ümummilli Lider Heydər Əliyevin 1990-cı il yanvarın 21-də Azərbaycanın Moskvadakı daimi nümayəndəliyində keçirdiyi mətbuat konfransından çəkilən videosüjetdən, fotoşəkillərdən tanımışam. Azərbaycanın ən ağır, faciəli günlərindən birində, olduqca mürəkkəb siyasi şəraitdə, hətta özünün və doğmalarının həyatı üçün ciddi təhlükələrin olduğu bir zaman kəsiyində xalqla birlikdə idi. Üzündə hüzn, addımlarında qətiyyət üçrəngli bayrağın dalğalandığı, böyük liderin imperiyanın qanlı siyasətinə meydan oxuduğu məqama doğru addımlayırdı.

Növbəti dəfə oxşar portret cizgiləri ilə Ümummilli Liderin nəşinin Vətənə gətirildiyi gün qarşılaşdım: hüzn, qayğı, gediləcək yolun, daşınacaq yükün ağırlığının əks olunduğu məsuliyyət, iti, qətiyyətli, irəliyə doğru tuşlanmış baxışlar...

Zaman keçdikcə illər öncə şahidi olduğum və tez-tez təsəvvürümdə canlandırdığım xalqın içindən gələn adamın portret cizgilərinin hər dəfə əvvəlkindən daha qabarıq şəkildə nəzərə çarpdığını görəndə yaddaşıma səpələnmiş cizgilərin konkret zaman kəsiyində özünü büruzə verən ovqatın deyil, bütöv bir xarakterin hər dəfə xəfif şəkildə, qaranlıqdan sıyrılan işıq zərrəsi kimi ortaya çıxdığına bir daha əmin olmuşam.

Bəzən insanlar ayrı-ayrı siyasət, dövlət adamları haqqında düşünəndə nədənsə gözlərinin önündə daşlaşmış, hissi, duyğusu olmayan bir insan obrazı canlandırırlar. Heydər Əliyev xalqa yaxınlığı, sadəliyi ilə bu stereotipləri alt-üst etmişdi, İlham Əliyev də darmadağın etdi.

Mübariz İbrahimov və Fərid Əhmədovla vida mərasimini xatırlayırsınız? İlham Əliyevin şəhid ailələri, Qarabağ qaziləri, məcburi köçkünlərlə görüşlərini necə?

Bu görüşlərin hər birində Azərbaycan Prezidentinin iç dünyasından üzünə sıçrayan sevgini, qayğını, mərhəməti, özünə, xalqına, qətiyyətlə, müdrikliklə irəli apardığı dövlətinin gücünə olan inamı, azərbaycanlı olmağın qürurunu, xalqın içdən gələn sevgisinin bəxş etdiyi xoşbəxtliyi görməmək mümkün deyil.

Milli ruh, vətənpərvərlik ruhu, yüksək mənəvi dəyərlərin sadəcə bir ailənin sərhədləri çərçivəsində mövcud olan, formalaşan anlayışlar kimi qəbul etmək çox yanlış olardı. Əgər cəmiyyətdə vətənpərvərlik, cəsarət, vətənə, dövlətə, xalqa sevgi əsas qiymətləndirmə meyarı deyilsə, o zaman milli ruhun, xarakterin formalaşması üçün gərəkli olan mühit, atmosfer də yaranmır. Azərbaycan bayrağının yüksəldilməsinin, himninin səsləndirilməsinin Azərbaycan gəncliyi üçün əsas hədəfə çevrilməsinin təməlində Prezident İlham Əliyevin hakimiyyətə gəldiyi ilk gündən müəyyənləşdirdiyi strategiya dayanır.

44 günlük Vətən müharibəsi də sübuta yetirdi ki, güclü lideri, birliyi, həmrəyliyi, mübarizə əzmi olan xalqlar ən çətin sınaqlardan belə uğurla, zəfərlə çıxmağı bacarırlar.

Prezident İlham Əliyev türk dünyasının böyük söz və düşüncə adamlarından olan İsmayıl Bəy Qaspıralının "Dildə, fikirdə, işdə birlik" ideoloji düsturunun tarixin heç bir dönəmində sonunadək baş tutmayan, real nəticə verməyən hissəsinin - işdə, əməldə birliyin həyata keçirilməsi kimi ən ağır, ən məsuliyyətli missiyasına siyasi həyatının ən müqəddəs məfkurələrindən biri kimi sahibləndi, sözün, fikrin və işin vəhdətindən yeni və strateji baxış bucağına malik olan əməkdaşlıq modelinin formalaşmasına nail oldu.

Prezident İlham Əliyevin adı türk dünyasının tarixinə Çanaqqala zəfərindən sonra ən böyük qələbəyə imza atan, türk xalqlarının qürurunu yüksəldən, özünəinam hissini qaytaran Ali Baş Komandan kimi yazıldı. Azərbaycan Ordusunun qəhrəman əsgər və zabitlərinin torpaqlarımızın azad edilməsi uğrunda nümayiş etdirdikləri misilsiz qəhrəmanlıq nümunələri türk dünyasını silkələdi, özünə qaytardı, gələcəyə daha böyük inamla baxmasına imkan verdi. Dövlət başçısının Ali Baş Komandan kimi döyüş əməliyyatlarının həyata keçirilməsində, Azərbaycan Respublikasının Prezidenti kimi diplomatik müstəvidə və informasiya müharibəsində nümayiş etdirdiyi yüksək liderlik keyfiyyətləri türk tarixinin şərəfli səhifələrinin yenidən yazıldığına və bundan sonra da yazılacağına əminlik yaratdı.

Bütün bunları ona görə xatırladıram ki, İlham Əliyevin Azərbaycan Prezidenti seçildiyi ilk gündən mövcud zaman kəsiyinədək olan fəaliyyətinin nəinki bir ilini, heç bir anını belə ayrılıqda dəyərləndirmək mümkün deyil. İlham Əliyevin fəaliyyəti də şəxsiyyəti kimi bütövdür.

Geridə qalan zaman kəsiyində diplomatiya, iqtisadiyyat, ordu quruculuğu, mədəniyyət, idman və digər istiqamətlərdə həyata keçirilən siyasətin ayrı-ayrı detallarını incələdikcə sözügedən sahələrdə atılan addımın Zəfər yürüşümüzün tərkib hissəsi olduğunu görə bilərik. Prezident İlham Əliyev təkcə Müzəffər Ali Baş Komandan deyil, bütün dünya azərbaycanlılarının milli birliyini təmin edən, onları vahid Vətən ideyası altında birləşdirən, böyük hədəflərə doğru aparan, mənəvi yükü yüz illərə sığmayan tarixi bir missiyanın lideridir.

Bu gün dünyada, xüsusilə də yaşadığımız bölgədə baş verən hadisələr Azərbaycan xalqının azad və müstəqil yaşamaq istəyini, istiqlal ideallarını, dağlarına, çaylarına, bütövlükdə hər qarışına ad verdiyi, uğrunda canını, ömrünü fəda etdiyi torpaqlarına sahiblənmək kimi müstəsna haqqını qəbul edə bilməyən gizli-aşkar, yaxud gizlindən aşkara çıxan düşmənlərimizin xəyanətkar simalarını daha aydın göstərir.

Ədalət hissini itirmiş, hiyləgər, məkrli düşmənlərin bitib tükənməyən tələlərindən sıyrılaraq Azərbaycanın ərazi bütövlüyünü və suverenliyini təmin etmək sadəcə iti zəka, strateji düşüncə deyil, vətəninə və xalqına nəhayətsiz sevgi, ideallarına sonsuz sədaqət, milli iradəyə söykənən qətiyyət və xalqını bir yumruq kimi birləşdirmək, səfərbər etmək bacarığı tələb edir.

Bu baxımdan Prezident İlham Əliyev böyük bir coğrafiyada zülmə məruz qalan, haqqı tapdanan, öz tarixi vətəninə, ana südü kimi halal torpağına, tarixinə, mədəniyyətinə və gələcəyinə sahiblənmək istəyən bütün xalqlar üçün liderlik nümunəsidir.

Elçin MİRZƏBƏYLİ,

Milli Məclisin deputatı, Ədalət, Hüquq, Demokratiya Partiyasının sədr müavini

Azərbaycan.-2025.- 7 fevral (№ 27).- S.8.