Müstəqil siyasətin gücü

Azərbaycan müstəqil dövlət olaraq bütün qərarları özü verir, qətiyyətli siyasəti ilə milli maraqlarına təhdid olan istənilən gücə qarşı layiqli şəkildə mübarizə aparır. Buna görədir ki, Cənubi Qafqaz bölgəsi ilə bağlı çirkin maraqları olan dairələrin ölkəmizə qarşı apardıqları kampaniyalar, müxtəlif yollarla həyata keçirmək istədikləri təzyiq cəhdləri hər zaman iflasa məhkum olub və bu gün də belədir.

Azərbaycanın yaratdığı reallıq

Azərbaycanın iradəsinə heç kimin təsir edə bilmədiyinə hələ 44 günlük Vətən müharibəsi dövründə, eləcə də 2023-cü ildə keçirilmiş 23 saatlıq antiterror tədbirləri zamanı bütün dünya şahid oldu. Hər kəs gördü ki, tarixə, haqq-ədalətə, beynəlxalq hüquqa əsaslanan milli hədəflərinə uzanan yolda Azərbaycana heç kim maneə yarada bilməz. Həmin dövrdə ölkəmizlə təhdid, diktat dili ilə danışan, təzyiq göstərmək istəyən xarici güclər bütün bunların heç bir nəticəsi olmadığını əyani şəkildə gördülər. Azərbaycana qarşı qeyri-dost hərəkət sərgiləyənlərin, düşmən mövqedə dayananların, təcavüzkara dəstək verənlərin mənfur səylərinə baxmayaraq, torpaqlarımız işğaldan azad edildi, bayrağımız bütün sərhədlərimiz boyu dalğalandırıldı, suverenliyimiz təmin olundu, Konstitusiyamız bütün ərazilərimizdə hüquqi qüvvəyə mindi. Onilliklər boyu təcavüzkar Ermənistanın və ona havadarlıq edən xarici qüvvələrin Qarabağ və Şərqi Zəngəzurda yaratdıqları "boz zona" ləğv edildi. Qarabağda separatizmin məhv edilməsi ilə Rusiya sülhməramlılarının fəaliyyətinə də bölgədə ehtiyac qalmadı və onlar vaxtından əvvəl Azərbaycan ərazilərini tərk etdilər. Ardınca Qazax rayonunun 4 kəndi azad edildi ki, bütün bunlar Prezident İlham Əliyevin ötən illərdə qətiyyətlə həyata keçirdiyi uzaqgörən siyasətin məntiqi nəticələri kimi xarakterizə olunmalıdır.

Azərbaycanın son beş ildə qazandığı silsilə qələbələr ümumilikdə bölgə üçün yeni reallıqlar yaradılıb. Ən əsası regionda dayanıqlı sülh üçün mühüm zəmin formalaşdırılıb, birmənalı şəkildə ölkəmiz bölgədə təhlükəsizliyin qarantına çevrilib. Regionu xarici qüvvələrin bitməyən münaqişə mərkəzinə çevirmək kimi çirkin planlarından xilas edən Azərbaycanın yaratdığı yeni reallıqları gücündən, mövqeyindən asılı olmayaraq, dünyanın istənilən ölkəsinin qəbul etmək məcburiyyətində olduğu da bir gerçəklikdir.

Düşünülmüş siyasətin nəticəsi

Təsadüfi deyil ki, Azərbaycan nəinki Cənubi Qafqazın lideri, eyni zamanda beynəlxalq arenada aktiv rol oynayan qüdrətli ölkə nüfuzuna sahibdir. Prezident İlham Əliyevin həyata keçirdiyi məharətli diplomatik siyasətin sayəsindədir ki, əksər ölkələr Azərbaycanla tərəfdaş olmağa, əlaqələr yaratmağa can atırlar. Etibarlı, güvənilən ölkə olaraq verdiyi bütün sözləri, vədləri məsuliyyətlə gerçəkləşdirən Azərbaycan dünyanın enerji, nəqliyyat qovşağına çevrilib. Avropanın enerji təhlükəsizliyində mühüm rol oynayan, dünya nəhəngləri olan ABŞ, Çin kimi ölkələrlə hərtərəfli əlaqələrin inkişafına maraq göstərən ölkəmiz həm də balanslaşdırılmış siyasəti, beynəlxalq problemlərin həllində aparıcı güc mərkəzi rolunu oynaması ilə diqqət çəkir.

Cənubi Qafqazda, eləcə də dünyada baş verən geosiyasi prosesləri dərindən analiz edən Prezident İlham Əliyevin verdiyi qərarların, atdığı düzgün addımların nəticəsində Azərbaycan yer üzünün dörd bir yanında, o cümlədən sərhədlərimizin bir addımlığında baş verən münaqişələrin, müharibələrin fonunda təhlükəsizlik ünvanı kimi ön plana çıxır.

Bu il iyunun 24-də Mingəçevirdə "8 Noyabr" Elektrik Stansiyasının açılış mərasimində Prezident İlham Əliyev məhz bu məqama toxunmuşdu: " ...Reallıq budur ki, bu gün bizim ölkəmiz sabitlik, inkişaf, tərəqqi məkanı kimi dünya miqyasında tanınır və bu adı biz öz əməyimizlə, zəhmətimizlə, düşünülmüş siyasətlə qazanmışıq".

Tolerant, multikultural ölkə olan Azərbaycanda millətindən, dilindən, dinindən asılı olmayaraq, bütün insanlar dostluq, mehribanlıq şəraitində, harmoniya içərisində və həmrəy şəkildə yaşayırlar. Buna görədir ki, ölkəmiz sivilizasiyalararası dialoqların baş tutduğu unikal ünvan kimi də beynəlxalq səviyyədə tanınır və rəğbət görür. Ancaq təəssüf ki, yaxın günlərdə Rusiyada azərbaycanlılara qarşı etnik zəmində törədilən cinayət əməllərinin timsalında bu cür dözümlülük mühitini bir çox ölkələrdə görmürük. Rusiya da daxil olmaqla, islamofobiyanın, türkofobiyanın, azərbaycanofobiyanın, şovinizmin hökm sürdüyü ölkələrdə həmvətənlərimizə qarşı bu cür diskriminasiya halları ilə rastlaşırıq. Hər kəsə aydındır ki, həmin ölkələr həmvətənlərimizi hədəf seçməklə ölkəmizə qarşı hansısa təzyiqləri həyata keçirmək istəyirlər.

Ancaq yuxarıda da vurğuladığımız kimi, bütün bunlar heç bir nəticəsi olmayan çirkin fəaliyyət, insanlığa sığışmayan hərəkətlərdir. Azərbaycan müstəqil siyasət yürüdən güclü dövlətdir və xalqına, milli maraqlarına qarşı təhdidlərə heç zaman boyun əymir. Adekvat cavabları ilə qeyri-dostluq, qeyri-səmimilik, düşmənçilik sərgiləyən istənilən gücləri də yerlərində otuzdurmağı bacarır.

Yasəmən MUSAYEVA,

Azərbaycan.-2025.- 1 iyul (№ 131).- S.6.