Diskriminasiya, dözümsüzlük, milli
və irqi zəmində olan ayrı-seçkilik
Beynəlxalq nizamı
yerindən oynadan Ukrayna-Rusiya müharibəsində
qalib və məğlub tərəf konkret formada görünməsə də,
demək olar ki, Qərbə hərtərəfli məğlub
olan Rusiya düşdüyü bataqlıqdan
çıxa bilmədiyi
üçün çirkabı
fərqli regionlara yaymağa çalışır.
Buna görədir ki, yeni cinahlar
yaradaraq, yeni düşmən axtarışına
başlayıb.
Milli Məclisin
deputatı Azər Badamov "Azərbaycan"
qəzetinə açıqlamasında
bildirib ki, özlərini əlçatmaz
və gözəgörünməz
hesab edən bəzi şəxslər sanki bütün cahana cəbhə açaraq yeni müzakirə predmeti ovuna çıxıb, onu fasiləsiz sirkulyasiya etdirmək üçün addımlar
atır, açıqlamalar
verirlər. Ondan başlayaq ki, miqrantlara qarşı olan münasibət yeni deyil. Məsələn,
2011-ci ildən İstintaq
Komitəsinə rəhbərlik
edən Aleksandr Bastrıkin dəfələrlə
miqrantlara qarşı
çıxışlar edib
və miqrasiya qanunvericiliyinin sərtləşdirilməsini
istəyib.
"Komitə rəhbəri
sözügedən mövzu
ilə bağlı Rusiya hakimiyyətinin Moskva yaxınlığındakı
Crocus City Hall-da baş verən hadisədən sonra Mərkəzi Asiya ölkələrindən olan
miqrantlara qarşı
kampaniya fonunda əsassız açıqlamalar
vermişdi.
Deputat qeyd edib ki, bir
müddət öncə
Azərbaycanın informasiya
resurslarına qarşı
kiberhücum təşkil
olunması və bunun arxasında Rusiyanın dayanması ilə bağlı Milli Məclisin komissiyasının hesabatı
göstərdi ki, media resurslarımız ən sərt kiberhücumlara məruz qalıb. Hücumlar konkret faktlarla sübut olundu. Hətta bu hücumlarda
Rusiyanın xüsusi xidmət orqanları tərəfindən geniş
istifadə olunan "saxta bayraq" (false flag) əməliyyatlarının
da tətbiq edildiyi məlum oldu. Solovyov kimi ünsürlərin əli ilə guya "Artsax" ifadəsinin mövcud olmadığını bilmirmiş
kimi bu ifadənin
bilə-bilə, üzərinə
basa-basa səsləndirilməsi,
xalqımızın təhqir
olunması mərkəzdən
təlimat alan bu şəxsin və onun kimilərin
əli ilə yürüdülən siyasətdir.
A.Badamov vurğulayıb
ki, Rusiyaya qarşı Ermənistanın
son dərəcə satqın siyasət yürütməsinə baxmayaraq,
Moskvanın heç bir aktora qarşı
nümayiş etdirmədiyi
səbri və dözümü Ermənistana
göstərməsi, bu
ölkədə radikalizm
və revanşizm meyillərinin güclənməsi,
Robert Koçaryan, Serj
Sarkisyan kimi istənilən sadiq qulun Rusiya tərəfindən
dəstəklənməsi ondan
xəbər verir ki, baş verən
bütün proseslər
Kremlin ssenarisidir:
"Cənubi Qafqazı
yenidən müharibə
meydançasına çevirmək
istiqamətində silsilə
addımlar atıldığının
şahidiyik. Buna görədir ki, hətta bu hədəfə
gedən yolda Rusiya milli siyasət
konsepsiyasını da
ortaya qoyur və bu siyasətdə
başqa xalqlara qarşı son dərəcə dözümsüz
münasibət, selektiv
yanaşma, qərəz,
hiddət, aqressiyanın
ən sərt forması tətbiq edilir. Baş verən hadisələr, Yekaterinburqda törədilən
vəhşilik bu ölkənin qana susadığının, ondan
doymadığının əyani
təzahürüdür. Bu
digər xalqlara
qarşı yürüdülən,
ən sərt formada tətbiq edilən diskriminasiya, dözümsüzlük, milli
və irqi zəmində olan ayrı-seçkilikdir. Yekaterinburqda
baş verən proses idarə olunan hadisədir. Bu hadisənin arealı isə Yekaterinburqla məhdudlaşmır.
Demək olar ki, bu zəhərli
tendensiya Rusiyanın bütün bölgələrində
müşahidə olunur.
Cəbhə boş qalıb, onu doldurmağın yolunu isə miqrantlarda görürlər. Buna görədir ki, miqrantları hətta təzyiq, hədə-qorxu,
şantaj vasitəsilə
müharibəyə yola
salmaq üçün
çalışırlar. Bəzən
miqrantların törətmədikləri
ağır cinayətləri
üzərlərinə ləkə
kimi atırlar ki, məcburiyyət qarşısında qalıb
onlara tabe olsunlar. Bu, azmış
kimi, müharibəyə
gedən miqrantlara kompensasiya da verilmir, bəzilərinin isə aqibəti haqqında heç bir məlumat yoxdur. Qayıdanları isə yenidən şantaj edib, döyüşlərə geri
göndərirlər".
Deputat bildirib ki, milli kimlik
amili üzərindən
istənilən qeyri-ruslar
bütün bu təzyiqlərin qurbanlarıdır.
Miqrantlara qarşı
son dərəcə amansız münasibət,
islamofobiya Rusiyanın
dövlət siyasəti
səviyyəsindədir ki,
bu, son dərəcə
mənfi tendensiya və addımlardır. Təyyarəmizin vurulması,
bu məsələnin
xalqımızın heysiyyətinə
toxunması Rusiya üçün nəsə
ifadə etməyə
bilər, lakin bizim üçün bu məsələ çox şey deməkdir. Bu baxımdan Azərbaycan təyyarə hadisəsini
beynəlxalq arenada inkişaf etdirib qanlı hadisənin ədalətli həlli, bu hadisədə əli olan günahkarların
cəzalandırılması, kompensasiyanın ödənilməsi
məqsədinə çatmalıdır.
Əsmər QARDAŞXANOVA,
Azərbaycan.-2025.-
1 iyul (№ 131).- S.7.