Ermənistan ideoloji parçalanma mərhələsinə qədəm qoyub

Kilsə-müxalifət birliyi region üçün də təhlükə yaradır

Son günlər Ermənistanda baş verən hadisələr göstərir ki, bu ölkə ciddi siyasi-ictimai və ideoloji parçalanma mərhələsinə qədəm qoyub. Bu prosesin mərkəzində dini təsisat adı altında fəaliyyət göstərən, lakin, əslində, siyasi ambisiyalarla hərəkət edən Erməni Apostol Kilsəsi dayanır. Bu kilsə ənənəvi olaraq dini qurum statusu daşısa da, həm ideoloji, həm də siyasi gücə malikdir və Ermənistanda hakimiyyət uğrunda mübarizədə vasitəyə çevrilib.

Milli Məclisin deputatı Pərvanə Vəliyeva “Azərbaycan” qəzetinə açıqlamasında bildirib ki, sabiq prezidentlər Koçaryan və Sarkisyan, uzun illər Ermənistanda hakimiyyəti əlində saxlamış, lakin korrupsiya və öz maraqlarına xidmət etmələri səbəbilə ictimai etimadı itirmiş şəxslərdir. Bu gün onlar öz mövqelərini bərpa etmək üçün dini rıçaqlara, yəni kilsəyə arxalanmağa çalışırlar. Paşinyanı devirmək məqsədilə artıq kilsə vasitəsilə ictimai fikrə təsir etməyə cəhd göstərirlər. Bu baxımdan, bu şəxslərin, xüsusilə də, birinci prezident Levon Ter-Petrosyanın yaxın zamanda Qaregin II və digər kilsə liderləri ilə təmasda olması Paşinyanı ciddi şəkildə narahat edib. “Tarixi gerçəklik göstərir ki, erməni kilsəsi həmişə xarici güclərin təsirində və maliyyə dəstəyində olub. Çar Rusiyası dövründən bəri regionda təxribatların legitimləşdiricisi kimi çıxış edib, Qarabağdakı və digər ərazilərdə təcavüzkar siyasətin ideoloji dayağı olub. 1905-1906 və 1918-1920-ci illərdə müsəlman əhaliyə qarşı törədilən qətliamların arxasında da kilsənin rolu danılmazdır”, - deyə deputat əlavə edib.

Deputat qeyd edib ki, bugünkü proseslər Ermənistanın daxili siyasi çəkişməsi olmaqla yanaşı, region üçün də təhlükə yaradır. Paşinyan bu hadisələri “dövlət çevrilişinə cəhd”, “zorakı aksiyaların təşkili və hüquqi pozuntular” kimi qiymətləndirərək hüquqi tədbirlər görməsi ilə izah edir. Rəsmi İrəvanın bu yanaşması texniki baxımdan hüquqi əsaslara söykənsə də, cəmiyyətdə daha dərin parçalanmaya səbəb olur. Kilsənin cəmiyyətin geniş təbəqələrində hələ də təsiri mövcuddur və bu, gələcəkdə daha kəskin toqquşmaların əsasını qoya bilər.

P.Vəliyeva vurğulayıb ki, Paşinyan Qərb tərəfindən "demokratiya" və "islahatçı lider" obrazı kimi təqdim edilsə də, siyasi rəqibləri neytrallaşdırmaq üçün o, sərt və qeyri-demokratik metodlara əl atır: “Maraqlıdır ki, beynəlxalq hüquq və insan haqları institutları – Avropa Şurası, ATƏT, Avropa Parlamenti və digər Qərb qurumları Ermənistanda baş verən bu antidemokratik proseslərə tam susqun mövqe nümayiş etdirir. Bu isə bir daha sübut edir ki, Qərbin “insan hüquqları və demokratiya” şüarları yalnız seçilmiş ölkələrə təzyiq aləti kimi istifadə olunur. Ermənistan isə geosiyasi maraqlar baxımından onların “toxunulmaz zonasındadır”.

Deputat sonda bildirib ki, hazırkı proseslərə əsasən, Ermənistanda seçkilər yaxınlaşdıqca Paşinyanın sərt addımlarının daha da artacağını proqnozlaşdırmaq olar.

Əsmər QARDAŞXANOVA,

Azərbaycan.-2025.- 3 iyul (№ 133).- S.11.