Bakı növbəti dəfə beynəlxalq tədbirə evsahibliyi edir

Martın 13-dən paytaxtımız XII Qlobal Bakı Forumuna evsahibliyi edir. Nizami Gəncəvi Beynəlxalq Mərkəzinin təşkilatçılığı ilə keçirilən forum martın 15-dək davam edəcək. Budəfəki forumun mövzusu "Dünya düzəninin yenidən düşünülməsi: Çağırışların fürsətə çevrilməsi"dir.

Qeyd edək ki, Qlobal Bakı Forumu aktual məsələlərin, dünyada baş verən mühüm hadisələrin və cərəyan edən proseslərin müzakirə olunduğu mühüm platformadır. Xüsusilə qeyd edilməlidir ki, bu müzakirələrə onlarca ölkədən görkəmli dövlət xadimləri, tanınmış siyasətçilər, diplomatlar qoşularaq diskussiya və dialoq aparırlar ki, bu da forumun nüfuzunu və çəkisini daha da artırır. Bu mənada forum keçmiş və indiki liderlərə qlobal problemləri müzakirə etməyə, onların həlli yollarını tapmaq yolunda səyləri birləşdirməyə şərait yaradır. Forumun dövlətlərarası əməkdaşlığa, siyasi münasibətlərə konstruktiv töhfə verdiyi, qarşılıqlı siyasi anlaşma üçün əlverişli imkan yaratdığı şübhəsizdir.

Xatırladaq ki, Birinci Qlobal Bakı Forumu 2013-cü ildə təşkil olunub. Prezident İlham Əliyevin himayəsi altında keçirilən Qlobal Bakı Forumuna ildən-ilə dünyada olan maraq daha da yüksəlib. İndiyədək keçirilmiş forumların hər birinin mövzularını nəzərdən keçirdikcə bir daha aydın olur ki, Bakıda siyasi liderlərin, politoloqların, nüfuzlu dövlət xadimlərinin iştirakı ilə dünyanı narahat edən ən aktual məsələlər müzakirə olunub. Habelə bu forumlarda iştirak edənlərin statistik göstəriciləri təsdiq edir ki, ildən-ilə müzakirələrdə iştirak edənlərin sırası genişlənib. Bu da foruma dünyada artan marağın bariz göstəricisidir.

Bu tədbirin məhz Bakıda keçirilməsi Azərbaycana dünya miqyasında verilən böyük önəmin bariz nümunəsidir. Coğrafi baxımdan Şərq ilə Qərbin kəsişməsində yerləşən Azərbaycanın belə bir mötəbər tədbirə evsahibliyi etməsi ölkəmizin dünyada dialoqun qurulmasında mühüm rol oynadığını göstərir. O cümlədən xalqımızın qədim tarixi, zəngin mədəniyyəti, tolerantlığı barədə vaxtilə yetərincə məlumatı olmayan dünya Azərbaycanı ildən-ilə daha yaxından tanıyır və onun artan gücünün, beynəlxalq nüfuzunun şahidinə çevrilir.

XII Qlobal Bakı Forumu da maraqlı mövzuya həsr olunub. "Builki forum xüsusilə əhəmiyyətli olacaq, çünki dünya genişmiqyaslı dəyişikliklərlə üzləşib". Bunu Nizami Gəncəvi Beynəlxalq Mərkəzinin həmsədri İsmail Serageldin Bakı Qlobal Forumunun İdarə Heyətinin mətbuat konfransında deyib. Onun sözlərinə görə, XII Qlobal Bakı Forumu dünyanın aparıcı liderlərini, beynəlxalq təşkilatların nümayəndələrini və alimlərini açıq, məzmunlu diskussiyalar üçün bir araya gətirən mühüm hadisə olacaq.

Qeyd edək ki, XII Qlobal Bakı Forumunda 400-ə yaxın iştirakçı, o cümlədən ən azı 50 fəaliyyətdə olan və sabiq prezident, Baş nazir, həmçinin BMT strukturlarının rəhbərləri, alimlər və ekspertlər iştirak edirlər.

Rəşad CƏFƏRLİ,

Azərbaycan.-2025.-14 mart (№56).- S.7.