Qərbi Azərbaycan bizim tarixi torpağımızdır...

Gəncə Şəhər İcra Hakimiyyətinin, Qərbi Azərbaycan İcmasının və YAP Gəncə şəhər təşkilatının birgə təşkilatçılığı ilə Gəncə Dövlət Filarmoniyasında "Qərbi Azərbaycan bizim tarixi torpağımızdır, bunu bizim tariximiz təsdiqləyir" mövzusunda konfrans keçirilib.

Tədbirdə Gəncə Şəhər İcra Hakimiyyətinin başçısı Niyazi Bayramov, Türkiyənin Gəncədəki Baş konsulu Recep Öztop, Gürcüstanın Gəncədəki Baş konsulu Kaxaber Abdaladze, YAP Gəncə şəhər təşkilatının sədri Bayram Aslanov, Qərbi Azərbaycan İcması İdarə Heyətinin sədri, Milli Məclisin deputatı Əziz Ələkbərov, İdarə Heyəti sədrinin müavini, Milli Məclisin deputatı Hikmət Babaoğlu, Milli Məclisin deputatları Musa Quliyev, Pərvin Kərimzadə, Naqif Həmzəyev, Qərbi Azərbaycan İcmasının Gəncə şəhər üzrə nümayəndəsi Mübariz Yusifov, idarə, müəssisə, təşkilat rəhbərləri və ziyalılar iştirak ediblər.

Onılar öncə Ulu Öndər Heydər Əliyevin şəhərin mərkəzi meydanında ucaldılan abidəsini ziyarət etmiş, filarmoniyanın foyesində Qərbi Azərbaycana həsr olunan dekorativ tətbiqi sənət nümunələri ilə tanış olmuşlar.

Konfransı giriş sözü ilə şəhər icra hakimiyyətinin başçısı Niyazi Bayramov açaraq qədim Nizami yurdunda Qərbi Azərbaycanla bağlı belə tədbirin keçirilməsinin önəmindən danışmış və demişdir ki, bu gün Prezident İlham Əliyevin Qərbi Azərbaycana Böyük qayıdış ideyasının həyata keçirilməsi istiqamətində mühüm işlər görülür. Bu baxımdan Qərbi Azərbaycan İcmasının fəaliyyəti və qəbul edilən "Qərbi Azərbaycana Qayıdış Konsepsiyası" böyük əhəmiyyətə malikdir.

Sonra Qərbi Azərbaycan İcması İdarə Heyətinin sədri, Milli Məclisin deputatı Əziz Ələkbərov "Qərbi Azərbaycan İcmasının məqsəd və hədəfləri, qayıdış uğrunda mübarizə" mövzusunda çıxış edərək icmanın yaranma tarixi, görülən işlər və qarşıda duran məsələlər barədə məlumat vermişdir. Bildirmişdir ki, son 200 ildə ata-baba yurdlarından zorla çıxarılan qərbi azərbaycanlıların geri qayıdışı mütləq təmin olunacaqdır.

"Qərbi Azərbaycan həqiqətləri, Ulu Öndər Heydər Əliyev və Prezident İlham Əliyevin Qərbi Azərbaycana qayıdış uğrunda apardıqları mübarizənin tarixi əhəmiyyəti" mövzusunda çıxış edən Milli Məclisin deputatı Musa Quliyev isə Qərbi Azərbaycandakı yurd yerlərimizdən, doğma torpaqlara qayıdışın vacibliyindən danışmışdır.

Milli Məclisin deputatı Hikmət Babaoğlu "İndiki Ermənistandan zorla çıxarılmış azərbaycanlıların Qərbi Azərbaycana qayıdışı regionda qalıcı sülhün təminatı kimi" mövzusunda çıxış edərək bildirmişdir ki, soydaşlarımızın geri qayıdışı regionda sabitliyin yaranmasında mühüm rol oynayacaqdır.

Tədbir YAP Gəncə şəhər təşkilatının sədri Bayram Aslanovun "Qərbi Azərbaycan toponimlərinin dəyişdirilməsinin siyasi və sosial təsirləri", professor Mübariz Yusifovun "Qərbi Azərbaycan İcmasının Gəncə şəhəri üzrə nümayəndəsinin fəaliyyət istiqamətləri barədə hesabat xarakterli icmal", Gəncə şəhərində yaşayan Qərbi Azərbaycan kökənli gənclər adından çıxış edən Sevinc İsgəndərovanın "Azərbaycanlıların tarixi vətənlərinə qayıdış hüquqlarının bərpası və Qərbi Azərbaycan həqiqətlərinin təbliğində gənclərin rolu" mövzularında çıxışları ilə davam etmişdir.

Konfransın sonunda bir qrup Qərbi Azərbaycan kökənli şəxslərə Qərbi Azərbaycan İcmasına üzvlük vəsiqələri və döş nişanları təqdim olunmuşdur.

Sabir ƏLİYEV,

Azərbaycan.-2025.-14 mart (№56).- S.14.