Elimizə bahar gəlir...

Yurdumuza bahar gəlir... Gəlişi ilə təbiətə gözəllik, insanlara xoş əhvali- ruhiyyə, sevinc, sevgi, xoşbəxtlik gətirir... Bahar fəsillərin şahı, onun gəlişini müjdələyən Novruz bayramı isə tacıdır. İlıq nəfəsi ilə ana torpağı oyadan Novruzun gəlişi ilə eldə, obada toy-büsat qurulur.

Novruz - yeni gün, yeni arzu, yeni istək deməkdir. Əsrlərin sınağından çıxmış mənəvi dəyərlərimizi, adət-ənənələrimizi özündə yaşadan bu bayram insanlar arasında birliyin və mehribanlığın, barışın rəmzi kimi qəbul edilir. Novruz başdan-başa ruh yüksəkliyi, əmək coşqunluğu, torpağa, insana məhəbbət bayramıdır.

Yurdumuzda hər il bu bayrama 40 gün qalmış hazırlıq işlərinə başlanır. Hər il xalqımız Novruzun Su, Od, Yel və Torpaq çərşənbələrini tonqal ətrafında bayram əhvali-ruhiyyəsi ilə qeyd edir. Bayram ərəfəsində Azərbaycanın hansı guşəsinə ayaq bassan, orada yüksək ovqatla qarşılanarsan. Novruz bayramı təzə ili, baharın ilk gününü qarşılamaq deməkdir. Novruz həm də bərabərlikdir. Yalnız insanların yox, həm də təbiətin bərabərliyi... Günəş dünyanın cənub yarımkürəsindən şimal yarımkürəsinə keçdiyi vaxt gecə ilə gündüz bərabərləşir. Bu vaxt qış qurtarır, yaz başlayır. İnsanlar yazın gəlişini, baharın ilk gününü, təbiətin canlanmasını, torpağın oyanmasını bayram edirlər... Novruz bolluq, xeyirxahlıq, gözəllik bayramıdır. Bu bayramda Novruz süfrəsi, Novruz xonçası qurulur. Bu süfrəni hazırlamağa İlaxır çərşənbədən başlanılır. Süfrəyə düzmək üçün müxtəlif şirniyyatlar bişirilir. Bunlara şəkərbura, paxlava, şəkərçörəyi və sair aiddir.

Novruz gecəsi insanlar ürəklərində yeni arzu, yeni dilək tutarlar. Onu da qeyd edək ki, illərlə dilimizdə bir dua, ürəyimizdə bir istək var idi. Yurdumuz düşmən işğalından azad edilsin! Şuşada, Laçında, Qubadlıda, Zəngilanda, Xocalıda dağların başında bayram tonqalları alovlansın! Yurdundan məcburi didərgin düşmüş insanlarımız öz torpaqlarına qayıtsınlar...

Şükürlər olsun ki, bu duamız da qəbul edildi. Tanrıya uzanan əllərimiz naümid yanımıza düşmədi. Müzəffər Ali Baş Komandan İlham Əliyevin sərkərdəliyi ilə torpaqlarımız işğaldan azad edildi. Qarabağımızın və Şərqi Zəngəzurun başı üzərindən qara buludlar çəkildi. Elə bu torpaqlarda ilk Novruz tonqallarını da Qarabağın xilaskarı, o torpaqlara yenidən həyat verən, cənnətə döndərən Prezident İlham Əliyev və xalqımızın sevimli qızı, kimsəsizin, maddi və mənəvi dəstəyə ehtiyacı olanların mənəvi anası Mehriban xanım Əliyeva alovlandırdılar.

İndi yurdumuzun hər yerində bayram tonqalları, sevgi, xoşbəxtlik, mərhəmət alovları işıq saçır. Ürəklərdən od götürən bu tonqallar yalnız insanların qəlbinə yox, illərdir sahibini gözləyən torpaqlara da nur səpir. Yurdumuzun hər yerində bayram əhvali-ruhiyyəsi yaşanır.

Elimizdə bir adətdir, evlərdən başlayan səliqə-sahman işləri idarə və müəssisələrdə, əmək kollektivlərində davam etdirilir. Novruz həm də gözəllik deməkdir. Elimizin hər yerində abadlıq, quruculuq, səliqə-sahman işləri aparılır. Hər şey təzələnir, fasadlar boyanır, həyət-bacada gül çiçəklər əkilir...

Bu bayram ərəfəsində insanların üzləri kimi, ürəkləri də gülür. Bu günlərdə insan hara baxırsa, gözü gözəllik görür. Gülən ürəkləri, sevinən gözləri görəndə adam gücü çatdıqca, səsi yetdikcə ucadan, lap ucadan "Nə gözəl yaraşır bizlərə bayram" demək istəyir.

Elşən QƏNİYEV,

Azərbaycan.-2025.-14 mart (№56).- S.15.