Energetika, texnologiya, innovasiya və rəqəmsal inkişaf...

Azərbaycan və Vyetnam bu sahələr üzrə də əməkdaşlıq edəcək

Azərbaycanın və Vyetnamın qəbul etdikləri Strateji Tərəfdaşlıq haqqında Birgə Bəyanatla ölkələrimizin bir-birilə əlaqələri daha yüksək pilləyə qalxır. Bunun üçün bir çox sahədə, o cümlədən iqtisadiyyatda böyük potensial var. Odur ki, ticarət, energetika, nəqliyyat və digər istiqamətlər üzrə əməkdaşlığı inkişaf etdirmək üçün geniş üfüqlər açılır.

Vyetnam Sosialist Respublikası Kommunist Partiyasının Mərkəzi Komitəsinin Baş katibi To Lamın Azərbaycana dövlət səfəri çərçivəsində imzalanan sənədlər də bunu göstərir. Həmin sənədlər sırasında iki ölkənin energetika sahəsində əməkdaşlığı genişləndirilməsini hədəfləyənlər də diqqət çəkir. Bunlardan biri "Azərbaycan Respublikasının Energetika Nazirliyi ilə Vyetnam Sosialist Respublikasının Sənaye və Ticarət Nazirliyi arasında energetika sahəsində əməkdaşlıq haqqında Anlaşma Memorandumu"dur. Digər bir Anlaşma Memorandumu isə Azərbaycan Respublikası Dövlət Neft Şirkəti (SOCAR) ilə Vyetnam Milli Sənaye - Enerji Qrupu ("PetroVietnam") arasında imzalanıb. Energetika sahəsinə aid daha bir sənəd isə "SOCAR Trading Singapore PTE LTD" ilə "Binh Son Refining and PetrochemicaI JSC" arasında imzalanmış Anlaşma Memorandumudur.

Elm, texnologiya, innovasiya və rəqəmsal inkişaf sahələrində də əməkdaşlıq genişlənəcək. Bu, Azərbaycan Respublikasının Rəqəmsal İnkişaf və Nəqliyyat Nazirliyi ilə Vyetnam Sosialist Respublikasının Elm və Texnologiya Nazirliyi arasında Anlaşma Memorandumuna əsasən həyata keçiriləcək.

Azərbaycan Respublikasının Kiçik və Orta Biznesin İnkişafı Agentliyi (KOBİA) ilə Vyetnam Sosialist Respublikasının Milli Sahibkarlıq Assosiasiyası (VİNEN) arasında imzalanan Anlaşma Memorandumu isə Birgə Biznes Şurasının yaradılmasını nəzərdə tutur.

Məlum olduğu kimi, mayın 7-də Azərbaycan Respublikasının Prezidenti İlham Əliyev və Vyetnam Sosialist Respublikası Kommunist Partiyasının Mərkəzi Komitəsinin Baş katibi To Lam mətbuata bəyanatlarla çıxış ediblər. Dövlətimizin başçısı öz bəyanatında demişdir: "Energetika sahəsində imzalanmış sənədlər və apardığımız müzakirələr deməyə əsas verir ki, biz yaxın gələcəkdə bu sahədə əməkdaşlığımızı daha da genişləndirəcəyik. Bu gün bu əməkdaşlıq var və daha çox ticarət əməkdaşlığı formasında aparılır. Ancaq qarşılıqlı sərmayə qoyuluşu məsələləri də müzakirə edildi. Həm Vyetnam şirkətlərinin Azərbaycana, həm də Azərbaycanın neft şirkətinin Vyetnama sərmayə qoyuluşu məsələləri müzakirə olundu və göstəriş verildi ki, aidiyyəti qurumlar bu məsələlərlə bağlı konkret addımlar atsınlar".

Vyetnamın dövlət başçısının ölkəmizə səfəri çərçivəsində iqtisadiyyatın bu və digər sahələrində əməkdaşlığın genişləndirilməsi barədə müzakirələr aparılıb. Prezident İlham Əliyev iqtisadi-ticari istiqamət üzrə ticarət dövriyyəsinin dinamikasının Azərbaycanın Vyetnama əsasən neft satışından ibarət olduğu üçün təəssüfləndiyini bildirib: "Neft satışı yüksək səviyyədə olanda ticarət dövriyyəsi artır, azalanda azalır. Əlbəttə, biz ticarət dövriyyəmizi daha da balanslaşdırılmış formada görmək istərdik və bunun üçün, təbii ki, qarşılıqlı informasiya mübadiləsi lazımdır. Hansı layihələr ölkələrimizdə həyata keçirilir, investisiya imkanları nədən ibarətdir, qaydalar, qanunvericilik bazası, vergi inzibatçılığı - bütün bu məsələlər biznes dairələri üçün gərək aydın olsun. Belə olan halda əminəm ki, ticarət dövriyyəsi təkcə neft amilindən asılı olmayacaq".

Bu gün daha çox ticarət əməkdaşlığı formasında aparılan Azərbaycan-Vyetnam iqtisadi əlaqələrinin şaxələndirilməsi üçün qarşılıqlı sərmayə qoyuluşu məsələləri də önə çəkilib. Həm Vyetnam şirkətlərinin Azərbaycana, həm də Azərbaycanın neft şirkətinin Vyetnama sərmayə qoyuluşu məsələləri müzakirə olunub və aidiyyəti qurumların bu məsələlərlə bağlı konkret addımlar atması tapşırılıb. Həm "Şimal-Cənub", həm "Şərq-Qərb" nəqliyyat dəhlizləri vasitəsilə qarşılıqlı ticarətin stimullaşdırılacağı qeyd olunub. Azərbaycan tərəfinin Vyetnamda bərpaolunan enerji növlərinə sərmayə qoymağa hazır olduğu bildirilib.

Eləcə də Hökumətlərarası Komissiyanın iclasının uzun müddətdir keçirilməməsi qeyd edilib. Əldə edilmiş razılaşma əsasında tezliklə komissiyanın iclasının keçirilməsi məsələsi öz həllini tapıb. Çünki bu, bir çox istiqamət üzrə mümkün əməkdaşlığı daha da sürətləndirə bilər.

Bütün bunlar Vyetnam Kommunist Partiyasının Mərkəzi Komitəsinin Baş katibi To Lamın bəyanatında bir növ müddəalar kimi səslənib: "Hökumətlər-arası komissiya vasitəsilə ticari-iqtisadi əməkdaşlığı fəallaşdırmaq, əmtəə dövriyyəsi və sərmayələri artırmaq, iki ölkənin işgüzar dairələrini bir araya gətirmək, energetika, neft və qazla yanaşı, bütün sahələrdə əməkdaşlıq etmək, dəmir yolları, dəniz yolları, kənd təsərrüfatı sahələrində digər əməkdaşlıq imkanlarını araşdırmaq vacibdir. Biz hökumətlərarası komissiyanın növbəti iclasının tezliklə baş tutması məsələsini nəzərdən keçirəcəyik. Həmin komissiyanın gələcək iclasının nəticələrini səbirsizliklə gözləyirik, çünki o, artıq strateji tərəfdaşlıq əsasında həyata keçiriləcək".

Flora SADIQLI,

Azərbaycan.-2025.- 9 may (№94).- S.6.