2025-ci il yanvarın 29-na təyin edilmiş bələdiyyə seçkilərində Mərkəzi Seçki Komissiyasına daxil olmuş 4 yanvar 2025-ci il tarixli 01 saylı müraciətə baxılması barədə Azərbaycan Respublikası Mərkəzi Seçki Komissiyasının qərarı

Qərar № 1/3

2025-ci il yanvarın 29-na təyin edilmiş bələdiyyə seçkilərində 70 saylı Neftçala seçki dairəsindən Xol Qarabucaq bələdiyyəsinə namizədliyi öz təşəbbüsü ilə irəli sürülmüş Qəfərov Qismət Tahir oğlu 4 yanvar 2025-ci ildə Azərbaycan Respublikasının Mərkəzi Seçki Komissiyasına teleqramla müraciət edərək namizədliyinin qeydə alınmasından imtinaya dair dairə seçki komissiyasının 2 yanvar 2025-ci il tarixli 2/5 saylı qərarını mübahisələndirmiş, həmin qərarın ləğv edilməsini və namizədliyinin qeydə alınması barədə qərar qəbul edilməsini xahiş etmişdir.

Müraciət Azərbaycan Respublikası Seçki Məcəlləsinin (bundan sonra Seçki Məcəlləsi) 112-ci, 112-1-ci maddələrinin tələblərinə uyğun olaraq Mərkəzi Seçki Komissiyasının nəzdində yaradılmış ekspert qrupunun üzvü tərəfindən araşdırılmış, bu barədə müvafiq rəy verilmiş və komissiyanın iclasında baxılmışdır.

Araşdırma ilə bağlı şikayətçi ilə əlaqə saxlanılmış, araşdırma və iclasda iştirak etmək, həmçinin digər hüquqlarının olması izah edilmişdir. Araşdırmada və iclasda iştirak etməkdən imtina etmişdir.

Q.T.Qəfərov müraciətini onunla əsaslandırmışdır ki, dairə seçki komissiyası etibarnamə əsasında oğluna verdiyi minik avtomobilinin əmlak barəsində məlumatda və əmək haqqı almadığı halda 7800 manat məbləğində gəlirin namizədin gəlirlərinin miqdarı və mənbəyi haqqında məlumatda göstərilmədiyinə görə əsassız olaraq Seçki Məcəlləsinin 58.1.4-cü və 58.1.5-ci maddələrini tətbiq etməklə onun namizədliyinin qeydə alınmasından imtina etmişdir. Ona görə də həmin qərarın ləğv edilməsini və namizədliyinin qeydə alınmasını xahiş etmişdir.

Dairə seçki komissiyası Xol Qarabucaq bələdiyyəsinə namizədliyi öz təşəbbüsü ilə irəli sürülmüş Q.T.Qəfərovun namizəd kimi qeydə alınmasından imtina edilməsi barədə 2 yanvar 2025-ci il tarixli 2/5 saylı qərarını onunla əsaslandırmışdır ki, namizədin təqdim etdiyi gəlirlərinin miqdarı və mənbəyi haqqında məlumatda birillik dövr ərzində gəlirlərinin olmadığını göstərmiş, ancaq işçi qrupunun araşdırılması zamanı onun həmin dövrdə 7800 manat gəlirlərinin olduğu aşkar edilmişdir. Həmçinin əmlak barəsində təqdim etdiyi məlumatda mülkiyyətində olan 0,12 ha torpaq sahəsini və mülkiyyətçisi olduğu "Toyota Prius" markalı minik avtomobilini göstərməmişdir.

Araşdırma ilə əlaqədar seçki sənədləri dairə seçki komissiyasından tələb edilərək seçki sənədlərindəki məlumatların təkrar araşdırılması üçün Mərkəzi Seçki Komissiyasının nəzdində yaradılmış işçi qrupuna təqdim edilmişdir.

Araşdırmanın nəticəsi olaraq işçi qrupunun üzvləri tərəfindən verilmiş 5 yanvar 2025-ci il tarixli rəy və rəyə əlavə edilmiş mülkiyyət hüququna dair təsdiqedici sənədlərlə namizəd Q.T.Qəfərovun mülkiyyətində Neftçala rayonu Xol Qarabucaq kəndində yerləşən 0,12 ha həyətyanı torpaq sahəsinin və ümumi birgə mülkiyyət hüququ ilə həmin kənddə 0,12 ha torpaq sahəsində yerləşən (4 otaq) fərdi yaşayış evinin mövcud olması təsdiqini tapmışdır. Həmçinin namizədin mülkiyyətində bir ədəd Toyota Prius markalı minik avtomobilinin olduğu, ancaq həmin əmlakların namizəd tərəfindən təqdim edilmiş əmlak haqqında məlumatda göstərilmədiyi müəyyən edilmişdir.

Bundan başqa, işçi qrupunun araşdırması ilə bələdiyyə üzvlüyünə namizəd Q.T.Qəfərovun gəlirləri barəsində təqdim etdiyi məlumatda göstərmədiyi, lakin muzdlu işdən 2023-cü ilin dekabr ayı üzrə 650 manat, 2024-cü ilin yanvar-sentyabr ayları üzrə 5850 manat olmaqla ümumilikdə 6500 manat məbləğində gəlirlərinin olduğu aşkar edilmişdir.

Araşdırma ilə müraciətdə iddia edilən digər hallar öz təsdiqini tapmamışdır.

Seçki Məcəlləsinin 60.2.3-cü maddəsinə əsasən namizədlərin, siyasi partiyanın, siyasi partiya bloklarının bu Məcəllənin 57-ci və 58-ci maddələrinə uyğun təqdim etdikləri məlumatların düzgün olmaması namizədin qeydə alınmasından imtina üçün əsasdır.

Seçki Məcəlləsinin 216.1-ci maddəsinə görə bələdiyyə üzvlüyünə namizədlər bu Məcəllənin 60-cı maddəsində göstərilən qaydada qeydə alınırlar.

Göstərilənlərə əsasən müəyyən edilir ki, dairə seçki komissiyası tərəfindən Q.T.Qəfərovun Xol Qarabucaq bələdiyyəsinə namizəd kimi qeydə alınmasından imtina edilməsi barədə dairə seçki komissiyasının qərarı əsaslı olmuşdur. Ona görə də şikayətin təmin edilməsi üçün hüquqi əsaslar mövcud deyildir.

Beləliklə, müraciət əsassız olduğundan təmin edilməməli, Q.T.Qəfərovun Xol Qarabucaq bələdiyyəsinə namizəd kimi qeydə alınmasından imtinaya dair 70 saylı Neftçala seçki dairəsi dairə seçki komissiyasının 2 yanvar 2025-ci il tarixli 2/5 saylı qərarı dəyişdirilmədən saxlanılmalıdır.

Yuxarıda göstərilənləri əsas götürərək, Mərkəzi Seçki Komissiyası Seçki Məcəlləsinin 19.4-cü, 28.2-ci, 58-ci, 59-cu, 60-cı, 112-ci, 112-1-ci və 216-1-ci maddələrinə əsasən qərara alır:

1. 2025-ci il yanvarın 29-na təyin edilmiş bələdiyyə seçkilərində Xol Qarabucaq bələdiyyəsinə namizədliyi öz təşəbbüsü ilə irəli sürülmüş Qəfərov Qismət Tahir oğlunun 4 yanvar 2025-ci il tarixli 01 saylı müraciəti əsassız olduğundan təmin edilməsin, 70 saylı Neftçala seçki dairəsi dairə seçki komissiyasının 2 yanvar 2025-ci il tarixli 2/5 saylı qərarı dəyişdirilmədən saxlanılsın.

2. Bu Qərar dərc edildiyi gündən qüvvəyə minir.

Sədr Məzahir Pənahov

Katib Arifə Muxtarova

Katib Mikayıl Rəhimov

06.01.2025

Azərbaycan.-2025.- 7 yanvar (№ 1).- S.8.