Azərbaycan qəhrəmanlığı və peşəkarlığı layiqincə dəyərləndirir

"Dekabrın 25-də Bakı-Qroznı marşrutu ilə uçan AZAL-a məxsus sərnişin təyyarəsinin kənar müdaxilə nəticəsində qəzaya uğraması, çox sayda vətəndaşımızın həlak olması və ağır yaralanması hər birimizi çox kədərləndirdi. Bu hadisə ilə əlaqədar 26 dekabr Azərbaycanda matəm günü elan edildi".

Bu sözləri "Azərbaycan" qəzetinə BDU-nun kafedra müdiri, professor Kamilə Əliyeva deyib. O bildirib ki, məhz pilotlarımızın və bütün ekipaj üzvlərinin peşəkarlığı və qəhrəmanlığı sayəsində təyyarə Aktau şəhərinə qəza enişi etməsi nəticəsində 29 insanın həyatını xilas etmək mümkün olub. Prezident İlham Əliyevin sərəncamları ilə ekipaj üzvləri ilə vida mərasimindən sonra iki pilot və bir bələdçi Milli Qəhrəman adına layiq görülüb, iki bələdçi isə birinci dərəcəli "Rəşadət" ordeni ilə təltif edilib. "Yanvarın 6-da Prezident İlham Əliyevin Bakı-Qroznı reysini yerinə yetirərkən qəzaya uğramış sərnişin təyyarəsinin həlak olan ekipaj üzvlərinin ailə üzvləri və qəza zamanı sağ qalmış təyyarə bələdçiləri ilə görüşməsi və dövlətimizin ən ali mükafatlarını şəxsən təqdim etməsi dövlət başçısının Azərbaycanın igid oğul və qızlarının qəhrəmanlığı və peşəkarlığını həmişə layiqincə dəyərləndirməsinə bariz nümunədir. Dövlət başçımız bir daha sübut etdi ki, həlak olanların hər biri təkcə onların yaxınları, ailə üzvləri üçün deyil, həm də Azərbaycan dövləti üçün əzizdir. Görüşdə Prezident İlham Əliyev bir sıra məqamlara da aydınlıq gətirdi. Ölkə rəhbəri açıq və qətiyyətli şəkildə cinayət törədilməsi nəticəsində qəza hadisəsi baş verdiyini vurğuladı", - deyə Kamilə Əliyeva bildirib.

O qeyd edib ki, əgər Qroznı şəhəri ərazisində Rusiyanın hava məkanının bağlanması üzrə vaxtında tədbirlər görülsəydi, eləcə də Rusiya Federasiyasının silahlı qüvvələri və mülki xidmətləri arasında koordinasiya olsaydı, bu dəhşətli və acı faciə yaşanmazdı. Digər bir təəssüf doğuran məsələ isə sərnişin təyyarəsinin yaxınlıqdakı hava limanlarına enməsinə icazə verilməməsidir. Bütün bunların təxribat olmasına və ya digər səbəbdən baş verməsinə "qara qutu"lar açıldıqdan sonra tam aydınlıq gətiriləcək. Təyyarə qəzaya uğradıqdan dərhal sonra Rusiyanın bəzi dövlət qurumları hadisənin guya təyyarənin quşlarla toqquşması və ya təyyarə salonunda qaz balonunun partlaması nəticəsində baş verməsi haqqında uydurma informasiya yaymağa cəhd etdilər. Prezident İlham Əliyevin hadisəyə dərhal reaksiyası, istintaq komissiyasının yaradılması və bir sıra məsələlərə vaxtında aydınlıq gətirilməsi bu cəhdlərin qarşısını aldı.

Kamilə Əliyeva bildirib ki, "qara qutu"nun Braziliyaya göndərilməsi də dövlətimizin başçısının tələbi və qətiyyəti sayəsində baş tutub, çünki Rusiya Federasiyasının rəsmi dairələri bu hadisənin obyektiv araşdırılmasına cəhd göstərməyib: "Qara qutu" açıldıqdan sonra bütün suallara aydınlıq gətiriləcək və hadisənin törədilməsində cinayət tərkibi olması tam sübuta yetirildikdən sonra cinayətkarlar hökmən öz cəzalarını alacaqlar. Bu gün dünya Azərbaycanın oğul və qızlarının mərdliyindən, igidliyindən danışır. Onlar öz həyatlarını qurban verərək onlarla insanın həyatını xilas etdilər. Avropada, Amerikada oturub azərbaycançılıqdan, vətənpərvərlikdən dəm vuran üzdəniraq "həmvətənlərimiz" bu cür igid oğul və qızlarımıza baxıb özlərinə nə ad qoyurlar?! Azərbaycan xalqı xaricdəki riyakarları xəyanətkar kimi tanıyır. Tarixin səhifələrinə İqor İvanoviç Kşnyakin, Aleksandr Georgiyeviç Kalyaninov, Hökumə Cəlil qızı Əliyeva Milli Qəhrəman, Osmanqızı və digərləri isə milli xəyanətkarlar kimi yazılacaqlar".

Əsmər QARDAŞXANOVA,

Azərbaycan.-2025.- 8 yanvar (№2).- S.10.