16 min 124 namizəd, 23 siyasi partiya, 69 minə yaxın müşahidəçi

Qarşıdan gələn 6-cı bələdiyyə seçkiləri Azərbaycanın demokratik inkişafının növbəti təcəssümü olacaq

Respublikamız mühüm siyasi-ictimai hadisə ərəfəsindədir. Cəmi iki həftədən sonra ölkədə növbəti bələdiyyə seçkiləri keçiriləcək. Bu, 1999-cu ildən bəri sayca 6-cı bələdiyyə seçkiləri olacaq.

Seçkilər 685 bələdiyyəyə keçiriləcək

Azərbaycanda uğurla həyata keçirilən hüquqi-demokratik dövlət quruculuğu prosesinin mühüm tərkib hissələrindən biri yerli və regional demokrtiyanın inkişafıdır. Yerli demokratiyanın təcəssümü olan bələdiyyə qanunla müəyyən edilmiş ərazi hüdudları daxilində yerli özünüidarəetmə formasıdır. Bələdiyyənin öz mülkiyyəti və yerli büdcəsi olur.

Respublikamızda ilk dəfə 1999-cu il dekabr ayında keçirilmiş seçkilər ölkəmizin həyatında çox mühüm hadisə olmaqla, demokratlk dövlət quruculuğunda mühüm rol oynamışdır. Sonuncu dəfə bələdiyyə seçkiləri 5 il əvvəl - 2019-cu il dekabrın 23-də keçirilib. O zaman 1606 bələdiyyəyə seçkilər keçirilmişdi.

Son illərdə respublikamızda aparılmış genişmiqyaslı islahatlar, dövlət idarəçiliyinin təkmilləşdirilməsi sahəsində və ölkəmizin sosial-iqtisadi inkişafında əldə edilmiş nailiyyətlər, əhalinin yaşayış səviyyəsinin yüksəldilməsi yerli özünüidarəetmə orqanları olan bələdiyyələrin də fəaliyyətinin müasir səviyyədə qurulmasını zəruri edib. Bu məqsədlə bələdiyyələrin yerləşdiyi yaşayış məntəqələrinin sosial-iqtisadi vəziyyəti və digər yerli xüsusiyyətləri əsas götürülərək cari ildə bələdiyyələrin birləşməsi həyata keçirilib. Xarici təcrübə də onu göstərir ki, bələdiyyələrin fəaliyyətinin səmərəliliyinin artırılması, iqtisadi və maliyyə potensialının gücləndirilməsi yollarından biri də onların birləşməsidir. Bunun da nəticəsində bələdiyyələrin ümumi sayı azaldılaraq 685-ə çatdırılıb. Bu birləşmə prosesi yerli özünüidarəetmə orqanları üçün yeni üfüqlər və imkanlar açır, bələdiyyələr böyüyür və güclənir.

Qarşıdan gələn bələdiyyə seçkiləri 118 seçki dairəsi üzrə 685 bələdiyyəyə keçiriləcək. Mərkəzi Seçki Komissiyasının sədri Məzahir Pənahov bildirib ki, 7 dairə tam olaraq məcburi köçkünlərdən ibarətdir. Onlar da daimi yaşayış məntəqələrinə qayıtmadıqları üçün orada bələdiyyə seçkiləri keçirilmir.

Seçicilərlə görüşlərin keçirilməsi üçün 5912 yer müəyyən edilib

Seçkilərin nəticəsi olaraq 8071 bələdiyyə üzvü seçiləcək. Budəfəki bələdiyyə seçkilərində 16 min 124 namizəd mübarizə aparır. Onlar 23 siyasi partiyanın üzvüdürlər. Seçkilərdə müşahidəçi qismində iştirak etmək üçün ümumilikdə 69 minə yaxın yerli müşahidəçi akkreditasiyadan keçib.

"Azərbaycan Respublikasında bələdiyyə seçkilərinin hazırlanıb keçirilməsi üzrə Tədbirlərin Təqvim Planı"na əsasən, yanvarın 6-dan seçkiqabağı təşviqat başlayıb. Azərbaycanın seçki qanunvericiliyinə əsasən, seçkiqabağı təşviqatın müddəti 23 gündür. Yanvarın 28-dək davam edəcək kampaniya çərçivəsində Seçki Məcəlləsinə əsasən qeydə alınmış namizədlər, onların səlahiyyətli nümayəndələri və vəkil edilmiş şəxsləri, namizədi qeydə alınmış siyasi partiyalar, siyasi partiyaların blokları, onların səlahiyyətli nümayəndələri və vəkil edilmiş şəxsləri təşviqat işlərini apara bilərlər.

Onu da qeyd edək ki, bələdiyyə seçkilərində qeydə alınmış namizədlərin, namizədləri qeydə alınmış siyasi partiyaların seçicilərlə görüşlərinin keçirilməsi üçün 3730-u açıq, 2182-si qapalı olmaqla, ümumilikdə 5912 yer müəyyən edilib.

Bələdiyyə seçkiləri ilə əlaqədar seçki bülletenlərinin çapına da başlanılıb. Qanunvericiliyin tələblərinə uyğun olaraq, seçki bülletenlərinin mətni, forması, sayı və hazırlanma qaydası Mərkəzi Seçki Komissiyası tərəfindən müəyyən edilib və 6 milyon 52 min 721 seçki bülleteninin çap olunmasına qərar verilib.

Seçkilər hər bir dövlətin həyatında mühüm siyasi hadisə hesab olunur. Seçkilər həm də ölkənin demokratik inkişaf səviyyəsini nümayiş etdirir. Bu baxımdan qarşıdan gələn bələdiyyə seçkiləri Azərbaycanın siyasi həyatında növbəti mühüm hadisəyə çevrilməklə yanaşı, ölkəmizin demokratik yüksəlişinin təcəssümü olacaq.

Rəşad CƏFƏRLİ,

Azərbaycan.-2025.- 15 yanvar (№ 8).- S.6.