Paşinyan sülhsevər olduğunu əməldə göstərməlidir

"Ermənistanın baş naziri Nikol Paşinyan və onun komanda üzvləri üzdə sülhdən danışsalar da, realda yürütdükləri siyasətləri ilə bunun əksini həyata keçirirlər. Müdafiə sahəsində isə biz Ermənistanın Qərbdəki havadarlarından öldürücü silahlar almasının şahidiyik".

Bu sözləri "Azərbaycan" qəzetinə Milli Məclisin deputatı Kamran Bayramov deyib. O bildirib ki, rəsmi İrəvan maddi qarşılığını ödəmədən müasir hücum silahları əldə edir və fərqli platformalarda özü barədə "məzlum" obrazı yaratmağa çalışır. Daim imperialist maraqların alətinə çevrilmiş Ermənistan sülhpərvər kimi yox, aqressiv davranır. Prezident İlham Əliyevin yerli televiziya kanallarına müsahibəsi zamanı səsləndirdiyi fikirlər bu istiqamətdə konkret və aydın təsəvvür formalaşdırmaqla yanaşı, kifayət qədər önəmli mesajları da özündə ehtiva edir. Dövlət başçısı Azərbaycanın hərbi və təhlükəsizlik məsələlərinə verdiyi önəmi bir daha vurğulayaraq qeyd etdi ki, Ermənistanın silahlanması sadəcə yeni gərginliyə gətirib çıxaracaq: "Biz bunu istəmirik. Biz sülh istəyirik. Biz istəyirik ki, artıq müharibə səhifəsi bağlansın. Ancaq görürük ki, Ermənistanın həm özü, həm onun yeni havadarları bunu istəmirlər".

K.Bayramov qeyd edib ki, Qərb regionda çox təhlükəli strategiyasını həyata keçirmək planını yenidən işə salıb: "Ermənistanın hücum təyinatlı silahlar əldə etməsi gələcəkdə regionda münaqişənin yenidən alovlanmasını şərtləndirə bilər. Fransa və Hindistanın bu ölkəyə göndərdiyi pulsuz silahlar, Yunanıstanın "S 300" raket komplekslərini Ermənistana vermək niyyəti, adını "sülh fondu" qoyub Hayastana silah-sursat, hərbi texnikaların alınması üçün milyonlarla dollar ayıran Avropa İttifaqının "Avropa Sülh Fondu" Ermənistanı yenidən revanşist fikirlərə salıb. Bir tərəfdən Fransa, digər tərəfdən Aİ-nin Ermənistanı silahlandırması bu qüvvələrin, əslində, Qafqazda yeni münaqişə ocağının yaranmasında maraqlı olduqlarını bir daha göstərir. Azərbaycan bütün prosesləri izləyir və Ermənistanın silahlandırılması faktlarını görür. Təsadüfi deyil ki, bu il Azərbaycanın hərbi büdcəsi rekord həddə çataraq 8.4 milyard manat olaraq müəyyən edilib. Silahlanma yarışına daxil olmaq Ermənistanın iqtisadi resurslarını daha çox hərbi xərclərə yönəltməsinə səbəb olur və bu da ölkənin inkişafını əngəlləyir, vətəndaşların gündəlik həyatını çətinləşdirir".

Deputat diqqətə çatdırıb ki, revanşizmə meyillilik birinci növbədə Ermənistanın özünə ciddi təhlükə yaradır, çünki bu siyasət ölkəni uzunmüddətli gərginliklərə və daxili münaqişələrə sürükləyir. Revanşist siyasət onsuz da bu ölkənin zəif olan sosial vəziyyətini daha da ağırlaşdırır. Belə ki, erməni xalqı iqtisadi və sosial tərəqqi arzulayır, amma müharibə təhlükəsi narazılıqları artırır. Digər tərəfdən, həmin siyasət beynəlxalq aləmdə Ermənistanın təcrid olunmasına və mövcud müttəfiqlərinin dəstəyini itirməsinə yol açacaq ki, bu da ölkənin gələcəkdə daha da çətin vəziyyətə düşməsinə səbəb olacaq. Bu meyillər yalnız Ermənistanın daxilində deyil, həm də regiondakı digər dövlətlərin təhlükəsizlik maraqlarını da təhdid edir.

Deputat vurğulayıb ki, Azərbaycanın prinsipial və ədalətli mövqeyi həm də beynəlxalq aləmdə bu məsələnin ciddiyyətini açıq şəkildə nümayiş etdirir. Dövlətimizin strateji hədəfləri sülhün bərqərar olması üçün hər cür diplomatik təşəbbüsləri dəstəkləməkdədir. Beləliklə, bu yanaşma eyni zamanda Azərbaycanın regionda ədalətli və davamlı sülhün təmin olunması yönündə həyata keçirdiyi ardıcıl siyasətin ifadəsidir.

K.Bayramov bildirib ki, Ermənistan rəhbərliyi Azərbaycanla sülhdə maraqlıdırsa, pozitiv addımlar atmalıdır: "Birinci növbədə, Minsk qrupunun ləğvini dəstəkləməli, konstitusiyasından Azərbaycana ərazi iddialarının yer aldığı müstəqillik bəyannaməsinə istinadla bağlı müddəanı çıxarmalı, eyni zamanda sürətlə silahlanma prosesindən əl çəkməlidir. Yalnız belə olan halda regionda dayanıqlı sülh və təhlükəsizlikdən söhbət gedə bilər. Doğrudur, Ermənistanın baş nazirinin mətbuat katibi Nazeli Baqdasaryan ölkəsinin Minsk qrupunun ləğvi ilə bağlı ATƏT-ə müraciət etmə ehtimalını nəzərdən keçirdiyini bildirib. Eyni zamanda N.Baqdasaryan Ermənistanın Azərbaycanın ərazi bütövlüyünü tanıdığını və sülh sazişi imzalamaqla bunu təsdiqləməyə hazır olduğunu bildirib. Xatırladaq ki, Prezident İlham Əliyev dəfələrlə Minsk qrupunun və onun bütün institutlarının ləğv edilməli olduğunu bəyan edib. Bu qrupun ləğvi Azərbaycanın Ermənistanla sülh sazişi imzalaması üçün şərtlərindən biridir. Amma yenə də burada sözə yox, konkret əmələ ehtiyac var, çünki rəsmi Bakının mövqeyi aydındır".

Əsmər QARDAŞXANOVA,

Azərbaycan.-2025.- 15 yanvar (№ 8).- S.8.