Azərbaycan güləşçisi Avropa çempionu oldu

Azərbaycanın sərbəst güləşçiləri martın 31-də Litvanın paytaxtı Vilnüsdə start götürmüş Avropa çempionatına uğurla başlamışlar.

Azərbaycan komandasının heyətində möhtəşəm qələbəni isə ən ağır çəkidə yarışan Əli İsayev (120 kq) qazanmışdır. Ardıcıl olaraq, yunan İ.Arzumanidis, belarus R.Şeyxov və Türkiyə idmançısı R.Karanı məğlub edən Ə.İsayev finalda Ermənistan təmsilçisi Ruslan Basiyev üzərində parlaq qələbə əldə edərək Avropa çempionu tituluna sahib çıxmışdır.

Bu, Azərbaycan idmançılarının yarışın ilk günü qazandıqları 3-cü medal olmuşdur. Ə.İsayevdən əvvəl döşək üzərinə çıxan Cəbrayıl Həsənov (66 kq) yalnız finalda ukraynalı Andrey Stadnikə məğlub olaraq ikinci yeri tutmuşdur. Qeyd edək ki, A.Stadnik Azərbaycanın qadın güləşi üzrə yığma komandasının üzvü Mariya Stadnikin həyat yoldaşıdır.

84 kiloqram çəki dərəcəsində yarışan Novruz Temrezov isə bolqarıstanlı Miroslav Geşevi məğlub edərək bürünc medal əldə etmişdir. Bu, idmançımızın Avropa çempionatlarında qazandığı üçüncü bürüncdür.

Bu gün qitə çempionatının döşək üzərinə çıxacaq Azərbaycan idmançılarının rəqibləri artıq məlum olmuşdur. Püşkə əsasən Zəlimxan Hüseynov (60 kq) yunanıstanlı Aleksandros Plavidis, Çamsulvara Çamsulvarayev (74 kq) fransalı Luka Lampis, Hetaq Qazyumov (96 kq) isə Macarıstan təmsilçisi Daniel Liqeti ilə qarşılaşacaqlar.

Azərbaycan.-2009.-1 aprel.-S.8.