Azərbaycan ilə OPEC-nin Beynəlxalq İnkişaf Fondu arasında əməkdaşlıq uğurla davam edir

Aprelin 1-də Maliyyə Nazirliyində OPEC-nin Beynəlxalq İnkişaf Fondunun baş direktoru Süleyman əl-Hərbişin rəhbərlik etdiyi nümayəndə heyəti ilə görüş keçirilmişdir.

Görüşdən əvvəl qonaqlar Fəxri xiyabanda müasir Azərbaycan dövlətinin memarı və qurucusu, ümummilli lider Heydər Əliyevin xatirəsini ehtiramla yad etmiş, məzarı önünə əklil qoymuşlar.

Görkəmli oftalmoloq alim, akademik Zərifə xanım Əliyevanın məzarı üzərinə də tər çiçəklər düzülmüşdür.

Nümayəndə heyəti Şəhidlər xiyabanında Azərbaycanın müstəqilliyi və ərazi bütövlüyü uğrunda canlarından keçmiş qəhrəman Vətən övladlarının xatirəsini anmış, "Əbədi məşəl" abidəsi önünə əklil qoymuşlar.

Maliyyə naziri Samir Şərifovun OPEC-nin Beynəlxalq İnkişaf Fondunun baş direktoru Süleyman əl-Hərbiş ilə görüşündə Azərbaycan ilə OPEC-nin fondu arasında əlaqələrinin uğurla inkişaf etdiyi xüsusi vurğulanmışdır.

Nazir Samir Şərifov Azərbaycan ilə dünyanın ən mötəbər beynəlxalq iqtisadi və maliyyə qurumları arasında əməkdaşlığın genişlənməsini daim diqqətdə saxlayan Prezident İlham Əliyevin siyasətinə müvafiq olaraq ölkəmizlə OPEC-nin Beynəlxalq İnkişaf Fondu arasında əlaqələrin dərinləşməsi istiqamətində ardıcıl praktiki addımların atıldığını bildirmişdir.

Fondun baş direktoru Süleyman əl-Hərbişin Azərbaycana ilk səfərinin əhəmiyyətinə toxunan nazir, bu səfər çərçivəsində müəyyənləşdiriləcək tədbirlərin əməkdaşlığın əsaslı şəkildə genişlənməsinə təkan verəcəyinə əminliyini söyləmişdir.

Süleyman əl-Hərbiş rəhbərlik etdiyi fond ilə Azərbaycan arasında əlaqələrin inkişafından razılığını bildirmiş, səfər çərçivəsində əməkdaşlığın genişləndirilməsi üçün yeni imkanların hərtərəfli araşdırılacağını demişdir.

Qonaq fondun ölkəmiz ilə əlaqələrin genişləndirilməsinə mühüm əhəmiyyət verməsini Azərbaycan iqtisadiyyatının uğurla inkişaf etməsi, burada əlverişli biznes mühitinin formalaşdırılması və islahatların layiqincə həyata keçirilməsi ilə əsaslandırmışdır.

Görüşdən sonra "Azəriqazbank" Səhmdar İnvestisiya Bankı və OPEC-nin Beynəlxalq İnkişaf Fondu arasında kredit sazişi imzalanmışdır. Sənədi "Azəriqazbank" Səhmdar İnvestisiya Bankı müşahidə şurasının sədri Çingiz Əsədullayev və OPEC-nin Beynəlxalq İnkişaf Fondunun baş direktoru Süleyman əl-Hərbiş imzalamışlar.

***

Sonra maliyyə naziri Samir Şərifov və Süleyman əl-Hərbiş görüşün yekunlarına dair mətbuat konfransı keçirmişlər.

Samir Şərifov imzalanan sənədi uğurlu əməkdaşlığın daha bir bariz nümunəsi kimi qiymətləndirmişdir. Nazir belə bir sazişin dünyanı bürümüş maliyyə və iqtisadi böhran dövründə imzalanmasını Azərbaycanın mükəmməl iqtisadi siyasətinin, beynəlxalq səviyyədə etibarlı tərəfdaş imici qazanmasının məntiqi nəticəsi kimi dəyərləndirmişdir.

Nazir S.Şərifovun fikirləri ilə şərik olduğunu vurğulayan Süleyman əl-Hərbiş, OPEC-nin Beynəlxalq İnkişaf Fondu barədə geniş məlumat vermiş, 1976-cı ildən fəaliyyətə başlayan bu mötəbər qurumun həyata keçirdiyi tədbirləri ətraflı xarakterizə etmişdir.

Bildirilmişdir ki, Azərbaycanda OPEC-nin Beynəlxalq İnkişaf Fondunun dəstəyi ilə iki layihə həyata keçirilir. Fond Vəlvələçay-Taxtakörpü kanalının tikintisi və Ucar-Yevlax avtomobil yolunun bərpa olunması layihələrinə 14 milyon ABŞ dolları güzəştli kredit ayırmışdır. Bu kreditlər 20 il müddətinə 5 il güzəştli olmaqla illik 2,75 faizlə verilir.

OPEC Fondunun Azərbaycanın qeyri-neft sektoru ilə də əlaqələrini genişləndirməkdə qərarlı olduğu vurğulanmış, "Azəriqazbank" Səhmdar İnvestisiya Bankı ilə imzalanan kredit sazişinin bunun konkret nümunəsi olduğu diqqətə çatdırılmışdır.

Azərbaycan.-2009.-2 aprel.-S.2.