Dağlıq Qarabağ Azərbaycanın ərazisidir, buna heç bir şübhə ola bilməz

"Dağlıq Qarabağ Azərbaycanın ərazisidir, buna heç bir şübhə ola bilməz və münaqişə yalnız dövlətlərin ərazi bütövlüyü prinsipi əsasında həll olunmalıdır. Ermənistan-Azərbaycan, Dağlıq Qarabağ münaqişəsinin həllinin yubanması regionun inkişafına maneədir. Odur ki, bu problem tez bir zamanda həll olunmalıdır."

Bu sözləri ölkəmizdə səfərdə olan Norveç Atlantik Komitəsinin idarə heyətinin sədri Kjell Engebretsen aprelin 2-də Milli Məclis Sədrinin birinci müavini Ziyafət Əsgərov ilə görüşdə söyləmişdir.

Z.Əsgərov qonaqlara Milli Məclisin fəaliyyəti barədə məlumat vermiş və demişdir ki, Azərbaycan bütün beynəlxalq təşkilatlarla, o cümlədən NATO və onun Parlament Assambleyası ilə sıx əməkdaşlıq edir. Ölkəmiz 1994-cü ildə NATO-nun "Sülh naminə tərəfdaşlıq" Proqramına, 1996-cı ildə isə "Fərdi Tərəfdaşlıq Proqramı"na qoşulmuşdur. Bundan sonra bu beynəlxalq təşkilatla əməkdaşlığımız daha sürətlə inkişaf etməyə başlamışdır. Amma Azərbaycan ərazilərinin 20 faizinin ermənilər tərəfindən işğal olunması inkişafımıza ciddi maneə törədir. Ermənistanın BMT Təhlükəsizlik Şurasının və Avropa Şurasının qətnamələrinə məhəl qoymaması vəziyyəti daha da çətinləşdirir. Ona görə də beynəlxalq təşkilatlar, eləcə də dünya dövlətləri işğalçıya qarşı ciddi sanksiyalar tətbiq etməli və sülhün bərqərar olunması üçün çalışmalıdırlar.

Norveçin ölkəmizdəki səfiri Yon Ramberq Azərbaycan ilə Norveç arasında parlamentlərarası əlaqələrin inkişafından məmnunluğunu ifadə etmiş, bu münasibətlərin digər sahələrdə də əməkdaşlığın genişlənməsinə xidmət etdiyini vurğulamışdır.

Kjell Engebretsen demişdir ki, Norveç parlamentinin təşəbbüsü ilə yaradılmış Atlantik Komitəsi ölkənin Xarici İşlər və Müdafiə nazirlikləri tərəfindən maliyyələşdirilən qeyri-hökumət təşkilatıdır. Komitənin məqsədi münaqişə bölgələrində sülhə nail olunmasına, ölkələrin NATO-ya üzvlüyünə yardım göstərməkdir. Artıq belə bir missiya Balkanlarda həyata keçirilmişdir. Cənubi Qafqazdakı münaqişələr də diqqətdən kənarda qalmamışdır və təşkilat bu bölgəyə də yardım göstərmək niyyətindədir.

K.Engebretsen Dağlıq Qarabağın əzəli Azərbaycan torpaqları olduğunun heç kimdə şübhə doğurmadığını bildirmiş və problemin həlli üçün səylərin artırılmasının vacibliyini qeyd etmişdir.

Azərbaycan.-2009.-3 aprel.-S.2.