Daxili İşlər Nazirliyinin geniş kollegiya iclası keçirilmişdir

Aprelin 2-də Daxili İşlər Nazirliyində "Mənzillərdən oğurluqların qarşısının alınması və açılması sahəsində görülən işlərin vəziyyəti"nə və "Mühafizə hissələrinin fəaliyyətinin təkmilləşdirilməsi üzrə həyata keçirilən tədbirlər və qarşıda duran vəzifələr"ə həsr olunmuş geniş kollegiya iclası keçirilmişdir.

Daxili İşlər Nazirliyinin mətbuat xidmətindən bildirmişlər ki, nazir, general-polkovnik Ramil Usubov cari ilin birinci rübünün artıq başa çatdığını, hüquq-mühafizə, o cümlədən daxili işlər orqanlarının birgə səyləri ilə ötən dövrdə də cinayətkarlığa qarşı mübarizə və ictimai təhlükəsizliyin təmini sahəsində, xüsusən bir sıra ağır cinayətlərin açılmasında və narkotiklərin qanunsuz dövriyyəsinin qarşısının alınmasında uğurlu nəticələrin əldə edildiyini, əvvəlki dövrlərdə nail olunmuş müsbət təmayüllərin qorunub saxlanıldığını vurğulamışdır.

Gündəlikdəki məsələlərə münasibət bildirən Ramil Usubov hər iki məsələnin aktuallığını, daxili işlər orqanlarının fəaliyyəti ilə bağlı mühüm sahələri əhatə etdiyini bildirmiş, cinayətkarlığın strukturunda oğurluqların daha geniş yayılmış cinayətlərdən olduğunu, belə faktların açılmasının polis əməkdaşlarından yüksək peşəkarlıq, bilik və təcrübə tələb etdiyini, eyni zamanda, mühafizəyə cəlb edilmiş obyektlərdə, mənzillərdə siqnal sistemlərinin tətbiqinin müvafiq hadisələrin azalmasını şərtləndirən əsas amillərdən biri kimi diqqətə çatdırmışdır.

Qeyd edilmişdir ki, bu növ cinayətlərin qarşısının alınması, açılması, onları törətmiş şəxslərin məsuliyyətə cəlb olunması istiqamətində fəaliyyət bütövlükdə məqsədyönlü xarakter daşımış, habelə əməliyyat-xidməti fəaliyyətin düzgün təşkili, o cümlədən insanların Konstitusiya ilə müəyyən olunmuş mülkiyyət hüququnun təmin edilməsi mühüm əhəmiyyət kəsb etdiyindən hüquq-mühafizə orqanları və hissələrinin işi daim diqqət mərkəzində saxlanılmış, kollegiya iclaslarının və nazirliyin rəhbərliyi yanında keçirilən əməliyyat müşavirələrinin müzakirə mövzusu olmuşdur.

General-polkovnik Ramil Usubov həmçinin mühafizə xidmətinin fəaliyyətinin müasir dövrün tələblərinə uyğun təkmilləşdirilməsi və qarşıda duran vəzifələrlə bağlı 2006-cı il noyabrın 28-də keçirilmiş kollegiya iclasından ötən müddətdə xidmətin inkişaf etdirilməsi və mövcud problemlərin aradan qaldırılması istiqamətində son illər Baş Mühafizə İdarəsinin rəhbərliyi və yerli qurumları tərəfindən böyük işlər görüldüyünü, bu məqsədlə bir sıra zəruri tədbirlərin həyata keçirilərək, dövlət obyektlərinin və özəl mülkiyyətin mühafizəsinin etibarlı təmin olunduğunu, nəticədə vətəndaşların polisin mühafizəsinə daha böyük önəm verdiyini, xidməti post və marşrutlarda cinayətlərin və digər hüquqpozmaların qarşısının alınması üzrə tədbirlərin uğurla davam etdirildiyini diqqətə çatdırmışdır.

Nazir Ramil Usubov görülmüş müsbət işlərlə yanaşı, vətəndaşların mənzillərinə, obyektlərə siqnal sistemlərinin tətbiqinin təşkilində, mənzillərdən oğurluqların qarşısının alınması və açılması yönümündə müəyyən nöqsanların mövcudluğunu da qeyd etmişdir.

Gündəlikdəki birinci məsələ barədə məruzə ilə Baş Cinayət-Axtarış İdarəsinin rəisi, polis general-mayoru Emin Şəkinski çıxış etmişdir. O demişdir ki, cinayətkarlığın dinamikasına ciddi təsiri nəzərə alınaraq, Baş Cinayət-Axtarış İdarəsi tərəfindən bağlı qalmış mənzil oğurluqları üzrə 400-dən çox əməliyyat-axtarış işi öyrənilmiş, onların başvermə şəraiti və səbəbləri təhlil edilmiş, fəaliyyətin məqsədyönlü təşkili və səmərəliliyinin artırılması üçün yerlərə istiqamətverici göstərişlər göndərilmişdir. Görülən tədbirlərin məntiqi nəticəsi olaraq 2008-ci ildə 515, o cümlədən keçmiş illərdən bağlı qalmış 25 mənzil oğurluğunun açılması təmin edilmiş və onları törətmiş 103 nəfərdən ibarət 46 cinayətkar qrup və dəstə müəyyənləşdirilərək zərərsizləşdirilmişdir.

Gündəlikdəki ikinci məsələ ilə əlaqədar məruzə ilə çıxış edən Baş Mühafizə İdarəsinin rəisi, polis general-mayoru Mədət Quliyev bildirmişdir ki, mühafizə qurumlarının fəaliyyətinin təkmilləşdirilməsi və struktur islahatlarının aparılması məqsədilə DİN-in müvafiq əmr və göstərişinə əsasən, çoxpilləliyin aradan qaldırılaraq ştatların optimallaşdırılmasına, xüsusi mülkiyyətə məxsus obyektlərdə mülki mühafizə xidmətinin daha geniş tətbiqinə önəm verilmişdir. Əvvəlki illərlə müqayisədə mərkəzləşdirilmiş mühafizə məntəqələri ilə qorunan obyektlərin və mənzillərin sayı bir neçə dəfə, siqnal sistemlərinin köməyi ilə mühafizə olunan mənzillərin sayı 2006-cı ilin sonu ilə müqayisədə 450 ədəd artmış, vətəndaşların mənzillərinin mühafizəyə cəlb edilməsi üzrə ərazi polis orqanları ilə qarşılıqlı əlaqələr daha da güclənmişdir.

Müzakirələrdə çıxış edən DİN-in baş idarələrinin, ərazi polis orqanlarının və mühafizə strukturlarının rəisləri görülmüş işlər, mövcud nöqsanların aradan qaldırılması üzrə həyata keçirilən tədbirlər və qarşıda duran vəzifələr barədə ətraflı məruzə etmişlər.

İclasa yekun vuran daxili işlər naziri gündəlikdəki məsələlər üzrə polis orqanlarının fəaliyyətinin ümumən qənaətbəxş olduğunu, eyni zamanda bəzi nöqsanların mövcudluğunu da xatırladaraq konkret tapşırıqlar və tövsiyələr vermişdir.

General-polkovnik Ramil Usubov ölkəmizin Prezidenti, Silahlı Qüvvələrin Ali Baş Komandanı İlham Əliyevin daxili işlər orqanlarına daim göstərdiyi xüsusi diqqət və qayğının əyani təzahürü kimi bir sıra müxtəlif təyinatlı obyektlərin inşa olunduğunu, onların açılışında dövlətimizin başçısının şəxsən iştirak etdiyini, polis orqanlarının maddi-texniki bazasının daha da möhkəmləndirilməsinə, şəxsi heyətin sosial-məişət problemlərinin həllinə yönəlmiş tədbirlərin gələcəkdə də davam etdiriləcəyini vurğulamışdır. Nazir əmin olduğunu bildirmişdir ki, Azərbaycan polisi və Daxili Qoşunlar Ali Baş Komandanın ali diqqət və qayğısına bundan sonra da layiqli xidməti ilə cavab verəcək, ölkəmizin inkişafının və qüdrətlənməsinin əsas şərtlərindən olan sabitliyin, habelə dövlətin və vətəndaşların qanuni mənafelərinin hüquqazidd əməllərdən etibarlı qorunması üçün qüvvə və bacarığını əsirgəməyəcəkdir.

AzərTAc

Azərbaycan.-2009.-3 aprel.-S.4