Baş Prokurorluq korrupsiyaya qarşı mübarizə tədbirlərini davam etdirir

Azərbaycan Respublikası Baş Prokurorluğunun mətbuat xidmətindən bildirmişlər ki, dövlətimizin diqqət mərkəzində saxladığı və mütəşəkkil cinayətkarlığın təhlükəli təzahürlərindən olan korrupsiyaya qarşı kəsərli mübarizə davam etdirilir.

Belə ki, "Azərdəmiryolbank" Açıq Səhmdar Cəmiyyətinin Daxili Audit Departamenti tərəfindən 2009-cu il fevralın 25-də Şamaxı filialının xəzinəsində aparılmış yoxlama zamanı 388.796 manat və 30.478 ABŞ dolları məbləğində pul vəsaitinin, həmçinin bir bağlama girov qızıl əşyalarının filialın xəzinəsindən götürülərək mənimsənilməsi aşkar edilmiş və toplanmış material tədbir görülməsi üçün Azərbaycan Respublikası Baş Prokurorluğuna göndərilmişdir.

Həmin fakt üzrə "Azərdəmiryolbank" ASC-nin Şamaxı filialının vəzifəli şəxsləri barəsində Azərbaycan Respublikası Cinayət Məcəlləsinin 179.3.2-ci maddəsi ilə cinayət başlanılaraq ibtidai istintaqın aparılması Azərbaycan Respublikasının Baş Prokuroru yanında Korrupsiyaya Qarşı Mübarizə İdarəsinə tapşırılmışdır.

İstintaq zamanı müəyyən edilmişdir ki, "Azərdəmiryolbank" ASC-nin Şamaxı filialının müdiri Bayramov Tural Zakir oğlu öz qulluq mövqeyindən istifadə etməklə, etibar edilmiş külli miqdarda özgə əmlakını mənimsəmə və ya israf etmə yolu ilə talamışdır.

T.Bayramov 2008-ci il yanvarın 21-dən 2009-cu il martın 2-dək "Azərdəmiryolbank" ASC-nin Şamaxı filialının müdiri vəzifəsində işləyərkən öz qulluq mövqeyindən istifadə etməklə 2008-ci ilin yanvar ayından 2009-cu ilin mart ayınadək ayrı-ayrı vətəndaşların adlarına kredit rəsmiləşdirərək həmin məbləğləri götürməklə cəmiyyətə məxsus 413.483 manat məbləğində pul vəsaitini - yəni etibar edilmiş külli miqdarda özgə əmlakını mənimsəmə və ya israf etmə yolu ilə talamışdır.

Törətdiyi cinayət əməlinə görə T.Bayramov 2009-cu il martın 30-da Cinayət Məcəlləsinin 179.3.2-ci maddəsi ilə təqsirləndirilən şəxs qismində cəlb olunaraq, məhkəmənin qərarı ilə barəsində həbs qətimkan tədbiri seçilmişdir.

Dövlət Sosial Müdafiə Fondunun Laçın rayon şöbəsinin vəzifəli şəxsləri barəsində Azərbaycan Respublikası Cinayət Məcəlləsinin 308.1-ci maddəsi ilə başlanılmış və Azərbaycan Respublikasının Baş Prokuroru yanında Korrupsiyaya Qarşı Mübarizə İdarəsində istintaq olunan digər cinayət işi üzrə müəyyən edilmişdir ki, Cabbarov Fərman Baloğlan oğlu 2004-cü ildən Dövlət Sosial Müdafiə Fondunun Laçın rayon şöbəsində aparıcı mühasib vəzifəsində işləyərkən şöbənin müdiri Musayev Musa Rəfi oğlu ilə qabaqcadan cinayət əlaqəsinə girərək 2007-ci ilin avqust ayından Laçın rayon sakinləri olan 95 nəfər və əlillik müddəti qurtarmış 15 nəfər şəxsin pensiya almaq hüququ olmadığı halda, onların adlarına heç bir pensiya işləri açılmadan, həmin şəxslərin pensiya alması üçün öz qulluq səlahiyyətlərinə aid olmayan qanunsuz hərəkətlər edərək, təkrarən onlardan külli miqdarda şəxsən və vasitəçilərdən istifadə etməklə rüşvət alaraq, onlara pensiya kartlarının verilməsinə və pensiya ödənişlərinin davam etdirilməsinə nail olmuş, bundan sonra öz qulluq mövqeyindən istifadə etməklə həmin vətəndaşlara qanunsuz verilən pensiya kartları üzrə dövlət büdcəsindən ayrılan pul vəsaitlərini israf etmə yolu ilə külli miqdarda talamışdır.

F.Cabbarov M.Musayevin rayon sakinlərinə pensiya təşkil etmək imkanı olması və bunun üçün onlardan müxtəlif məbləğlərdə pul vəsaiti alınması barədə təklifini qəbul edərək, onunla cinayət əlaqəsinə girmiş, 2007-2008-ci illərdə rayon sakinlərindən pensiya almaq hüququ olmayan və əlillik müddəti qurtarmış şəxslərə pensiya verilməsi üçün Şükürov Qədir Əvəz oğlu və qeyrilərindən cəmi 37.120 manat şəxsən və vasitəçilərdən istifadə etməklə rüşvət kimi aldığı pulu M.Musayevlə bölüşmüş, sövdələşdiyi şəxslərin adlarına heç bir pensiya işləri açılmadan və pensiya təyinatı aparılmadan onların adlarını plastik kartlar alınması üçün tərtib olunan sifarişlərə daxil edib M.Musayevə təsdiq etdirməklə müvafiq kartların alınmasına nail olmuşdur. O, eləcə də əlillik müddəti qurtarmış və yenidən həkim-ekspert komissiyasından keçməmiş şəxslər üçün mövcud pensiya işləri üzrə pensiya ödənişlərinin davam etdirilməsinə dair sifarişləri M.Musayevə təsdiq etdirib pensiya ödənilməsini reallaşdırmışdır.

Bununla yanaşı, F.Cabbarov M.Musayevlə cinayət əlaqəsinə girərək 2007-2008-ci illər ərzində rüşvət almaqla, 95 nəfər pensiya almaq hüququ olmayan və 15 nəfər əlillik müddəti qurtarmış şəxslərə qanunsuz pensiya ödənişləri aparılması nəticəsində ona etibar edilmiş özgə əmlakı olan cəmi 78.417 manat məbləğində pul vəsaitlərini israf etmə yolu ilə talayaraq dövlətə külli miqdarda ziyan vurmuşdur.

Müəyyən edilmişdir ki, pensiya almaq hüququ olmayan 95 şəxsin adına pensiya təyinatı aparılmadan alınan pensiya kartları üzrə 2008-ci il sentyabrın 1-dək cəmi 66.803 manat məbləğində, həmçinin 15 nəfər pensiyaçının əlillik müddəti qurtardığı halda pensiya ödənişləri davam etdirilməklə cəmi 11.613 manat qanunsuz pul ödənilmişdir.

İstintaq zamanı fondun əməkdaşları şahid qismində dindirilərkən müəyyən edilmişdir ki, şöbənin maliyyə-uçot sektorunun mühasibi işləyən F.Cabbarov 2007-2008-ci illərdə pensiya almaq hüququ olmayan 95 nəfər Laçın rayon sakininin adına heç bir pensiya işləri açılmadan və müvafiq sənədləşmələr, eləcə də pensiya təyinatı aparılmadan onların adlarını kompüter bazasına daxil edərək, həmin şəxslərin adlarına pensiya kartları alınması üçün sifarişləri müdiriyyətə təsdiq etdirib "Kapitalbank"ın Ağcabədi rayon filialına göndərmişdir.

İstintaq gedişində F.Cabbarovun evində aparılan axtarış zamanı fondun və icra nümayəndəliklərinin möhürləri ilə təsdiqlənmiş boş etibarnamələr və blanklar, müxtəlif adlar yazılan siyahılar, həmçinin ayrı-ayrı vətəndaşlar tərəfindən pul ödənilməsi barədə müvafiq qaydada təsdiq olunmamış bank qəbzləri, əlillik müddəti qurtarmış və 15 nəfərdən biri olan Təmrəzova Əsli Təmiraz qızının həkim-ekspert komissiyası işi və digər sənədlər aşkar edilərək götürülmüşdür.

Törətdiyi cinayət əməllərinə görə F.Cabbarov və M.Musayevə qabaqcadan əlbir olan bir qrup şəxs tərəfindən külli miqdarda təkrar rüşvət alma, külli miqdarda mənimsəmə və ya israf etməyə görə cinayət məsuliyyəti nəzərdə tutan Azərbaycan Respublikası CM-in 179.3.2-ci, 311.2-ci, 311.3.1-ci, 311.3.2-ci və 311.3.3-cü maddələri ilə ittiham elan olunaraq, barələrində məhkəmə tərəfindən həbs qətimkan tədbiri seçilmişdir.

Azərbaycan Respublikasının Baş Prokuroru yanında Korrupsiyaya Qarşı Mübarizə İdarəsində istintaq olunan digər cinayət işi Bakı şəhəri, Binəqədi rayonunun Xocəsən bələdiyyəsinin sədri Zəfər Məsimovun vəzifəli şəxs kimi xidməti səlahiyyətlərinin hüdudlarından açıq-aşkar surətdə kənara çıxan, hüquqi şəxsin qanuni mənafelərinə mühüm zərər vuran, dövlətin müstəsna mülkiyyətində olan və özgəninkiləşdirilməsi qadağan edilən torpaq sahəsinə dair qanunsuz qərar qəbul edilməsi və öz qulluq mövqeyindən istifadə etməklə ona etibar edilmiş külli miqdarda özgə əmlakını mənimsəməsi barədə hərəkətləri ilə əlaqədar olmuşdur.

İstintaqla müəyyən edilmişdir ki, Z.Məsimov Xocəsən bələdiyyəsinin sədri vəzifəsində işləyərkən fərdi ev tikintisi üçün torpaq sahəsi ayrılmasına dair vətəndaş Qasımova Esmira Nazim qızının 2007-ci il 21 noyabr tarixli ərizəsinin kollegial orqan olan bələdiyyə iclasında müzakirəsini təmin etməli olduğu halda bunu etməmiş, xidməti səlahiyyətlərinin hüdudlarından açıq-aşkar surətdə kənara çıxaraq, Azərbaycan Respublikası Torpaq Məcəlləsinin 46-cı, "Torpaq islahatı haqqında" Qanunun 6-cı maddələrinin tələblərini pozmaqla Xocəsən bələdiyyəsinin mülkiyyətində olan 56.25 hektar torpaq sahəsinin sərhədlərindən kənarda, dövlət mülkiyyətinə məxsus ərazilərə aid olan, mülkiyyətə, istifadəyə və ya icarəyə verilməsi barədə qərar qəbul etməyə səlahiyyəti olmadığı halda 400 kvadratmetr torpaq sahəsinin E.Qasımovanın mülkiyyətinə verilməsinə dair sədri olduğu bələdiyyənin adından 2007-ci il 23 noyabr tarixli 31/27 saylı qərar qəbul etmiş, lakin həmin torpaq sahəsinin E.Qasımovaya deyil, Neftçala rayonunun Mirqurbanlı kəndində qeydiyyatda olan Dadaşov Xanlar Gülağa oğlunun faktiki istifadəsinə verilməsini təşkil etmişdir.

Bundan başqa o, sədri olduğu bələdiyyənin büdcəsindən maliyyə vəsaitlərinin ayrılmasına dair məsələləri kollegial orqan olan bələdiyyə iclasında müzakirəsini təmin etməli olduğu halda bunu etməmiş, xidməti səlahiyyətlərinin hüdudlarından açıq-aşkar surətdə kənara çıxaraq, "Bələdiyyələrin statusu haqqında" Azərbaycan Respublikası Qanununun 33-cü maddəsinin tələblərinə zidd olmaqla sədri olduğu bələdiyyənin adından qəbul etdiyi 2007-ci il 26 dekabr tarixli 33/31 saylı qərar əsasında Yeni il bayramı ilə əlaqədər Xocəsən, Sulutəpə, 28 May qəsəbələrində yaşayan 1200 aztəminatlı, şəhid və əlil ailələrinin uşaqlarına bayram hədiyyələrinin alınması adı ilə 9.600 manat, bələdiyyə sakinlərinin istirahət etdiyi yerlərdə Yeni il yolkalarının bəzədilməsi adı ilə 1.900 manat, bələdiyyə üzvlərinə, qulluqçularına və dəvət olunan qonaqlara Yeni il şənliyinin təşkil olunması adı ilə 3.500 manat, ümumilikdə 15.000 manat maliyyə vəsaitinin ayrılmasına dair 2007-ci il 26 dekabr tarixli 78 saylı sərəncam vermiş, həqiqətdə isə həmin sərəncam əsasında qeyd edilən 15.000 manatı bələdiyyənin xəzinəsindən götürüb mənimsəmişdir.

Törətdiyi əməllərinə görə Z.Məsimov Azərbaycan Respublikası CM-in 179.3.2-ci, 309.1-ci və 314.1-ci maddələri ilə təqsirləndirilən şəxs qismində cəlb edilərək barəsində məhkəmənin qərarı ilə həbs qətimkan tədbiri seçilmişdir.

Hazırda cinayətin digər iştirakçılarının müəyyən edilməsi və məsuliyyətə cəlb olunması üçün müvafiq istintaq hərəkətləri davam etdirilir.

AzərTAc

Azərbaycan.-2009.-3 aprel.-S.4.