Alan Vaddams: "Azərbaycan Avropa Birliyi üçün vacib tərəfdaşdır"

"Azərbaycan Avropa Birliyi üçün vacib tərəfdaşdır və biz Azərbaycanla əməkdaşlığın möhkəmləndirilməsinə böyük diqqət veririk".

Bunu Avropa Komissiyasının (AK) energetika, nəqliyyat və ətraf mühit məsələləri üzrə AB - Azərbaycan yardımçı komitəsinin Bakıda keçirilən 4-cü iclasında AK nümayəndəliyinin başçısı Alan Vaddams söyləyib. Onun sözlərinə görə, bu tədbirin keçirilməsi mühüm əhəmiyyət kəsb edir və Avropa Birliyi ilə Azərbaycan arasında əməkdaşlığın inkişaf etməsindən xəbər verir. A.Vaddams eyni zamanda, "Şərq tərəfdaşlığı" proqramı çərçivəsində Azərbaycan və digər ölkələrlə əməkdaşlığın dərinləşməsinə də yüksək qiymət verib.

Ümumiyyətlə, sözügedən iclasda energetika, enerji təhlükəsizliyi və infrastrukturun inkişafı, habelə ikinci strateji enerji hesabatı da daxil olmaqla Avropa Birliyinin enerji sektorundakı vəziyyət barədə qarşılıqlı anlaşma memorandumunun həyata keçirilməsi məsələləri müzakirə edilib. Müzakirələr Azərbaycanın Sənaye və Energetika Nazirliyi ilə Avropa Birliyi arasında tərəfdaşlıq və əməkdaşlıq barədə sazişin imzalanması çərçivəsində keçib.

Məlumat üçün bildirək ki, Avropa Birliyinin "Şərq tərəfdaşlığı" proqramı AB-nin keçmiş SSRİ-nin 6 respublikası - Azərbaycan, Ukrayna, Gürcüstan, Belarus, Moldova və Ermənistanla daha sıx əməkdaşlığa nail olunmasına xidmət edir.

Azərbaycan.-2009.-5 aprel.-S.4.