Azərbaycanlı diplomat Nyu-Meksiko ştatına gəlmişdir

Azərbaycanın Los-Ancelesdəki baş konsulu Elin Süleymanov Nyu-Meksiko ştatına səfər etmişdir. Səfər zamanı o, ştatın qubernatoru Bill Riçardson, ştatın Nümayəndələr Palatasının sədri Ben Luxan və ştatın paytaxtı Santa Fe şəhərinin hökumət orqanlarının nümayəndələri ilə görüşmüşdür. Qubernator Riçardson ABŞ-ın energetika naziri olduğu dövrdə Azərbaycana səfərini və ölkəmizin rəhbərliyi ilə səmərəli görüşlərini səmimiyyətlə xatırlamışdır. O, enerji nəqli marşrutlarının şaxələndirilməsi məsələsinə Bakının düşünülmüş şəkildə yanaşmasını yüksək qiymətləndirmiş və qeyd etmişdir ki, ABŞ və regiondakı bütün tərəfdaş ölkələr Azərbaycanı bu məsələdə dəstəkləməkdə davam etməlidirlər.

Xatırladaq ki, prezident Klintonun administrasiyasında energetika naziri olmuş Bill Riçardson Bakı-Tbilisi-Ceyhan əsas neft kəmərinin planlaşdırılmasına dair danışıqların fəal iştirakçısı olmuşdur.

Azərbaycanlı diplomat rəsmi görüşlərdən əlavə Albukerki şəhərindəki Nyu-Meksiko Universitetinin müəllimləri və tələbələri qarşısında Azərbaycanın regionda rolu haqqında mühazirə oxumuşdur. Bundan əlavə, Santa Fe şəhərinin beynəlxalq münasibətlər şurası ölkəmizin regional siyasətinə həsr olunmuş tədbir təşkil etmişdir. Tədbirdə E.Süleymanov və Azərbaycan Beynəlxalq Əməliyyat Şirkətinin (ABƏŞ) sabiq vitse-prezidenti Art MakHafi çıxış etmişlər. MakHafi 90-cı illərdə ümummilli lider Heydər Əliyev tərəfindən qəbul edilmiş strateji qərarların bütün regionun inkişafı və inteqrasiyası üçün əhəmiyyətini vurğulamış, 1994-cü ildə Bakıda imzalanmış "Əsrin müqaviləsi"nin tarixi əhəmiyyətini qeyd etmişdir.

Şəfəq Akifqizi,

AzərTAc-ın xüsusi müxbiri

Vaşinqton

Azərbaycan.-2009.-7 aprel.-S.3.