ABŞ Prezidenti Barak Obama və Türkiyə Prezidenti Abdullah Gül Dağlıq Qarabağ problemini müzakirə etmişlər

Amerika Birləşmiş Ştatlarının Prezidenti Barak Obama Türkiyəyə rəsmi səfəri çərçivəsində aprelin 6-da Ankarada bir sıra görüşlər keçirmişdir.

Barak Obama Türkiyə Cümhuriyyətinin banisi Mustafa Kamal Atatürkün məqbərəsini ziyarət etdikdən sonra Çankaya köşkündə Türkiyə Prezidenti Abdullah Güllə görüşmüşdür.

İki saat davam edən görüşdən sonra keçirilmiş mətbuat konfransında Prezident Abdullah Gül bildirmişdir ki, ABŞ və Türkiyə bir çox məsələlərdə, o cümlədən Cənubi Qafqazda sülh və sabitlik məsələsində əməkdaşlıq etmək niyyətindədir. Ankara və Yerevan arasında müzakirələr davam edir. Biz müzakirələrin ən qısa zamanda başa çatdırılmasını istəyirik. Xüsusilə, Ermənistanla Azərbaycan arasında mövcud olan problemləri həll etmək lazımdır və bundan sonra digər məsələlər də həllini tapacaqdır. Türkiyədə 70 min erməninin işləməsinə və təyyarə reyslərinin həyata keçirilməsinə baxmayaraq diplomatik əlaqələr yoxdur. Türkiyə bütün qonşuları ilə, o cümlədən Ermənistanla da normal əlaqələr qurulmasını istəyir. Qondarma "erməni soyqırımı" məsələsinə gəldikdə isə bu, siyasi və hüquqi deyil, bir tarixi məsələdir. Təəssüf ki, erməni diasporu bundan bir siyasi alət kimi istifadə edir.

Jurnalistlərin qondarma "erməni soyqırımı" ilə bağlı sualına cavab verən Barak Obama isə demişdir ki, onun bu məsələ ilə bağlı seçkiqabağı sözləri məlumdur və onu dəyişdirmək fikrində deyildir. O, Türkiyə və Ermənistan arasında danışıqlar prosesini yüksək qiymətləndirdiyini söyləmiş və ümidvar olduğunu bildirmişdir ki, danışıqlar tezliklə öz nəticəsini verəcəkdir. Barak Obama əlavə etmişdir ki, ABŞ Prezidenti kimi danışıqlar prosesinin zərər çəkməməsinə çalışır.

Barak Obama Türkiyə parlamentində də çıxış edəcək, Baş nazir Rəcəb Tayyib Ərdoğanla görüşəcəkdir.

Oqtay Bayramov,

AzərTAc-ın xüsusi müxbiri

Ankara

Azərbaycan.-2009.-7 aprel.-S.4.