Litvanın xarici işlər naziri Azərbaycan Diplomatik Akademiyasının tələbələri ilə görüşmüşdür

Bakıda səfərdə olan Litvanın xarici işlər naziri Viqaudas Uşatskas aprelin 8-də Azərbaycan Diplomatik Akademiyasının tələbələri üçün mühazirə oxumuşdur.

Nazir Azərbaycan ilə Litva arasında münasibətlərin inkişafından, xarici siyasətin prioritetlərindən danışmışdır. V.Uşatskas bildirmişdir ki, Azərbaycan Avropanın enerji təminatında bundan sonra da mühüm rol oynaya bilər. Azərbaycanın potensialından hələ də kifayət qədər istifadə olunmamışdır. Xəzər dənizi də bu istiqamətdə bir növ Avropa ilə Azərbaycan arasında böyük bağlılıq yarada bilər.

"Şərq tərəfdaşlığı" layihəsinə toxunan Litvanın xarici işlər naziri Azərbaycanın Avropaya inteqrasiyası yolunda gördüyü işləri xüsusi qeyd etmişdir. V.Uşatskas bildirmişdir ki, Avropa ölkələri ilə viza rejiminin sadələşdirilməsi də mühüm məsələlərdən biridir. Litva istər Avropa İttifaqı daxilində, istərsə də ikitərəfli münasibətlərdə Azərbaycana öz töhfəsini verir. Ermənistan-Azərbaycan, Dağlıq Qarabağ məsələsinin həllində də Litva Azərbaycanın haqlı mövqeyini, münaqişənin sülh yolu ilə həllini dəstəkləyir.

Azərbaycan xarici işlər nazirinin müavini, akademiyanın rektoru Hafiz Paşayev Litvanın xarici işlər naziri V.Uşatskas haqqında tələbələrə məlumat verərək, onun diplomatik fəaliyyətindən danışmışdır.

AzərTAc

Azərbaycan.-2009.-9 aprel.-S.3.