Azərbaycan ilə Litva arasında təhlükəsizlik sahəsində qarşılıqlı maraq doğuran məsələlər müzakirə olunmuşdur

Milli təhlükəsizlik naziri, general-leytenant Eldar Mahmudov Azərbaycan Respublikasının təhlükəsizlik orqanlarının yaranmasının 90 illik yubiley tədbirlərində iştirak etmək məqsədi ilə ölkəmizdə səfərdə olan Litva Respublikasının Dövlət Təhlükəsizlik Departamentinin direktoru Povilas Malakauskasla görüşmüşdür.

Nazir Eldar Mahmudov regionda gedən proseslər, meydana çıxan müxtəlif növ təhdidlər, habelə Ermənistan-Azərbaycan, Dağlıq Qarabağ problemi və ondan irəli gələn fəsadlar barədə danışmışdır. General-leytenant Eldar Mahmudov beynəlxalq terrorçuluq, narkotiklərin qanunsuz dövriyyəsi, qeyri-leqal miqrasiya və transmilli mütəşəkkil cinayətkarlığın digər təhlükəli təzahürlərinin artmasının bütün dünyada ciddi narahatlıq doğurduğunu qeyd etmiş, bununla əlaqədar Milli Təhlükəsizlik Nazirliyi tərəfindən yeni təhdidlərə qarşı həyata keçirilən adekvat tədbirlərin, yaradılmış aidiyyəti qurumların fəaliyyətinin konkret nəticələri barədə qonağa məlumat vermişdir.

Povilas Malakauskas 90 illik yubiley münasibətilə Milli Təhlükəsizlik Nazirliyinin şəxsi heyətini bir daha təbrik etmiş, göstərilən yüksək qonaqpərvərliyə, geniş və dolğun məlumata görə təşəkkürünü bildirmişdir. Qonaq respublikamıza ilk gəlişindən xoş təəssüratlar aldığını, Azərbaycan Respublikasının və Litva Respublikasının təhlükəsizlik maraqlarının təmin olunması sahəsində aktuallıq kəsb edən məsələlər ətrafında aparılan müzakirələrin nəticələrindən razı qaldığını qeyd etmiş və səfərinin ölkələrimizin, eləcə də müvafiq strukturlar arasındakı əlaqələrinin daha da möhkəmlənməsi üçün faydalı olacağına əminliyini bildirmişdir.

Səmimi və qarşılıqlı anlaşma şəraitində keçən görüşdə maraq doğuran bir sıra digər məsələlər barədə də fikir mübadiləsi aparılmışdır.

AzərTAc

Azərbaycan.-2009.-10 aprel.-S.3.