Azərbaycan idmanının daha bir möhtəşəm zəfəri

Son illərdə Azərbaycanda idman sahəsində qazanılan nailiyyətlər bu sahənin inkişafına göstərilən yüksək diqqət və qayğının bəhrəsidir. Respublikada sosial-iqtisadi inkişafın güclənməsi milli olimpiya hərəkatının genişlənməsinə də ciddi təkan vermiş, xalqımız özünəməxsus ənənə və dəyərlər əsasında yeni milli fiziki tərbiyə və kamilləşmə sistemi yaratmışdır.

Ölkəmizdə idman və gənclər siyasətinin düzgün qurulduğunu son illər bu sahədə qazanılmış uğurlu nəticələr bir daha təsdiqləyir. Bir vaxtlar maddi çətinliklər üzündən respublikamızı tərk etmiş çox sayda idmançı gənc geri qayıdaraq respublikamızın idman şərəfini uca tutur, üçrəngli bayrağımızı yüksəklərə qaldırır. Azərbaycanda beynəlxalq səviyyəli yarışlar təşkil olunur, idmançılarımız hər il müxtəlif idman növləri üzrə keçirilən Avropa və dünya çempionatlarına qatılaraq layiqli nəticələr göstərirlər. Azərbaycan müxtəlif idman yarışlarının keçirildiyi nüfuzlu məkana çevrilməklə yanaşı, bu sahədə geniş potensiala malik olduğunu nümayiş etdirir.

Dövlət başçısı İlham Əliyev Azərbaycanda idmanın kütləviləşməsi naminə bütün zəruri tədbirləri həyata keçirir. Bu baxımdan bölgələrdə yeni olimpiya komplekslərinin inşasının davam etdirilməsi faktını xüsusi vurğulamaq lazımdır. Cənab İlham Əliyevin şəxsi təşəbbüsü və təşkilatçılığı ilə 2000-ci ildən bugünədək Azərbaycanın müxtəlif bölgələrində 20-dən artıq müasir tipli olimpiya kompleksi tikilərək istifadəyə verilmişdir. Naxçıvanda, Gəncədə, Şəkidə, Bərdədə, Lənkəranda, Qubada, Zaqatalada, Masallıda, Qazaxda, Şamaxıda, Tovuzda, Salyanda, Yevlaxda və digər rayonlarda dünya standartlarına uyğun olimpiya idman komplekslərinin inşası həm də regionlarda bədən tərbiyəsinin, idmanın kütləviləşməsi baxımından mühüm əhəmiyyətə malikdir.

Prezident İlham Əliyev Azərbaycan idmançılarının mötəbər beynəlxalq yarışlarda, olimpiya oyunlarında layiqincə iştirak etməsi və uğur qazanması naminə bütün lazımi tədbirləri görür. "XXIX Yay Olimpiya Oyunlarına hazırlıq haqqında" 2006-cı il 24 iyul tarixli Sərəncam bu baxımdan Azərbaycan idmançılarının Pekin Olimpiadasına hazırlıq prosesində mühüm rol oynamışdır. Sərəncama əsasən, Pekin Olimpiadasına hazırlıq porosesinin yüksək səviyyədə aparılması üçün dövlət büdcəsindən 3 milyon 150 min manat vəsait ayrılmışdır. İdmançıların Pekin Olimpiadasında uğurlu nəticələr əldə etməsi üçün əvvəlcədən müəyyənləşdirilmiş mükafatın məbləği də bu sahəyə yüksək diqqət və qayğının əyani təzahürü sayıla bilər. Dövlət başçısı Pekin Olimpiadası ərəfəsində qızıl medal qazanacaq idmançılara dövlət büdcəsindən 400 min manat, onların məşqçilərinə isə 200 min manat məbləğində mükafatın verilməsi barədə xüsusi sərəncam imzalamışdır. Nəticədə Çin Xalq Respublikasında keçirilmiş XXIX yay Olimpiya oyunları idman hərəkatının geniş vüsət aldığı Azərbaycan üçün də əlamətdar olmuşdur. Azərbaycan yığmasının üzvləri bu Olimpiadada layiqincə mübarizə apararaq mövcud gerçəklikdə mümkün ən uğurlu nəticəni göstərməyə, adlarını olimpiya salnaməsinə yazmağa müvəffəq oldular. İdmançılarımız olimpiya oyunlarının tarixi məsuliyyətini və şərəfini dərk etməklə, böyük əzmkarlıq, qətiyyət göstərərək üzərlərinə düşən vəzifənin öhdəsindən maksimum gəlməyə çalışdılar. Pekindən 7 medalla qayıdan Azərbaycanın 200 dövlət arasında qızıl medalların sayına görə 39-cu, ümumi medalların sayına görə isə 27-ci yeri tutması kifayət qədər yüksək göstəricidir.

Pekin Olimpiadasının nəticələri bir daha təsdiqlədi ki, Azərbaycanda idmançıların sosial vəziyyətinin, mənzil-məişət şəraitinin yaxşılaşdırılması istiqamətində həyata keçirilən tədbirlər praktik nəticələr verir. Məlumat üçün bildirək ki, son illərdə Azərbaycanda bədən tərbiyəsi və idmanın inkişafına ayrılan vəsait 7,5 dəfə artaraq 10 milyon manatı ötmüşdür. Hazırda olimpiyaçı adına layiq görülmüş 50-dən artıq idmançı və onların məşqçiləri Milli Olimpiya Komitəsinin xüsusi təqaüdlərini alır. Gənclər və İdman Nazirliyi, müxtəlif idman növləri üzrə federasiyalar tərəfindən də idmançılara lazımi qayğı göstərilir. Hər ilin yekunlarına görə, 20-dən çox idmançıya mənzillər və digər mükafatlar verilir, idman mütəxəssislərinə, məşqçilərə böyük yardımlar göstərilir. Cənab İlham Əliyev idmana yüksək qayğı nümunəsi kimi Pekin Olimpiadasından sonra idmançılar üçün "Prezident təqaüdü" təsis etmişdir.

Həyata keçirilən bu və digər tədbirlər Azərbaycan idmançılarını daha böyük qələbələrə ruhlandırır. Şübhəsiz, qələbəni labüd edən ən başlıca amil idmançıların onlara göstərilən yüksək qayğı və etimad müqabilində dövlət və xalq qarşısında məsuliyyətini dərk etməsi, yüksək iradə göstərərək sonadək mübarizə aparmasıdır. Qalib idmançı xalqının sonsuz sevgisini, rəğbətini qazanmaqla yanaşı, onun qürur ünvanına çevrilir. Bu çətin sınaqda idmançının yalnız yüksək göstəricilərə, fiziki hazırlığa, daxili iradəyə malik olması da tam yetərli deyildir. Bu və digər keyfiyyətlərlə yanaşı, qələbəyə iddia edən idmançının daxilində həm də yüksək vətənpərvərlik, milli qürur hissi, yurd sevgisi olmalıdır. Yalnız bu halda o, təmsil etdiyi dövlətin, xalqın idman şərəfini qorumağa - bayrağını ucaldaraq himnini səsləndirməyə nail ola bilir.

Bir müddət əvvəl Litvada keçirilən Avropa çempionatında 5 qızıl, 2 gümüş, 2 bürünc medal qazanan pəhləvanlarımız respublikamızın idman şərəfini layiqincə qorumuş, bayrağını ucaltmışlar. Dövlət başçısı, Milli Olimpiya Komitəsinin prezidenti İlham Əliyev bu mötəbər yarışın iştirakçılarını qəbul edərək qalib idmançılara, həmçinin Güləş Federasiyasının rəhbərliyinə təbrikini çatdırmışdır. Azərbaycan güləşçilərinin Avropada böyük tarixi qələbəyə imza atdığını deyən dövlət başçısı bunun təsadüfi olmadığını vurğulamışdır. "İlk dəfə olaraq Azərbaycan idmançıları, Azərbaycan güləşçiləri Avropa çempionatında belə böyük qələbə qazanırlar. 5 qızıl medal, 2 gümüş medal, 2 bürünc medal - doğrudan da böyük qələbədir, böyük zəfərdir. Siz bütün Azərbaycan xalqını sevindirmisiniz. Bu gözəl qələbə ilə hamımızı ruhlandırmısınız. Bir daha sübut etmisiniz ki, Azərbaycanın idman şöhrəti çox yüksək zirvədədir. Azərbaycan, sözün əsl mənasında, idman dövlətidir. Ölkəmizdə idmanın inkişafının çox gözəl nəticələri vardır. Onu da qeyd etmək istəyirəm ki, Avropa çempionatından bir qədər əvvəl İranda keçirilmiş Dünya kuboku yarışında da Azərbaycan güləşçiləri tarixi qələbə qazanmışlar. Dünya kubokunun sahibi olmuşlar, çox gərgin mübarizədə, çox çətin şəraitdə öz məharətlərini göstərmişlər. Avropa çempionatında əldə edilmiş qələbə və yenə də komanda hesabında birinci yeri tutması onu göstərir ki, Dünya kubokundakı qələbə heç də təsadüfi xarakter daşımırdı. Bu, Azərbaycanda idmanın güləş növündə son illər ərzində görülən böyük işlərin praktik nəticəsidir" deyən cənab İlham Əliyev Güləş Federasiyasının rəhbərliyinin fəaliyyətini də təqdir etmişdir.

Olimpiya oyunları dünya xalqlarının və ölkələrinin tanıdılması, təbliğ olunması, qarşılıqlı əlaqələrin qurulması baxımından böyük əhəmiyyətə, əvəzsiz təsirə malikdir. Bu oyunlarda iştirak etmək, olimpiya medalını qazanmaq böyük şərəfdir və hər bir dövlətin beynəlxalq nüfuzunun yüksəlməsində mühüm rol oynayır. Azərbaycan Prezidenti İlham Əliyevlə görüşdə onlara göstərilən yüksək diqqət və qayğıya görə minnətdarlığını bildirən Azərbaycan idmançıları 2013-cü ilin London Olimpiya oyunlarına daha ciddi səylə hazırlaşdıqlarını vurğulamışlar. İnanırıq ki, idmançılarımız bu Olimpiadada da yüksək vətənpərvərlik və mübarizə əzmi nümayiş etdirərək üçrəngli bayrağımızı zirvələrə qaldıracaqlar.

S.Elmanoğlu

Azərbaycan.-2009.-12 aprel.-S.2.