Qarabağ müharibəsi əlilləri, veteranları və şəhid ailələri dövlət qayğısından razıdırlar

Ermənistanın respublikamıza qarşı apardığı müharibə yalnız ərazilərimizin 20 faiz işğalı ilə deyil, eyni zamanda minlərlə döyüşçümüzün şəhidlik zirvəsinə ucalması, ağır savaşda fiziki qabiliyyətini itirərək əlil olması ilə nəticələndi. Torpağımızın bütövlüyü uğrunda gedən döyüşlərdə şəhid olanların ailələrinə, fiziki qabiliyyətini itirmiş vətəndaşlara diqqət, onların problemlərinin həll edilməsi ümdə vəzifələrdəndir. Müharibə şəraitində olmağımıza baxmayaraq, dövlət Qarabağ veteranlarına, əlillərinə daim diqqət və qayğı göstərir, problemlərinin həlli ilə məşğul olur. Ölkəmizin bütün regionlarında müharibə iştirakçılarına dövlət hesabına mənzillər, torpaq sahələri, fərdi yaşayış evləri verilmişdir.

Qarabağ Müharibəsi Əlilləri, Veteranları və Şəhid Ailələri İctimai Birliyinin sədri Mehdi Mehdiyev qarşıdan gələn illərdə əlillər üçün tikilən fərdi yaşayış evlərinin sayının daha da artacağını, müharibə iştirakçılarına qayğının çoxalacağına əmin olduğunu söylədi: "Şəhərlərdə veteranların təminatı normal vəziyyətdədir, problemlərin, demək olar ki, həlli başa çatıb. Lakin bəzi rayon və kəndlərdə evlər az tikildiyindən əlil və veteranların mənzil təminatında çətinliklər mövcuddur. Ölkədə gedən inkişaf bu problemin də tezliklə həll olunacağından xəbər verir. Əlillərə dövlət tərəfindən 2000-dən artıq "Oka" markalı minik avtomobili paylanılıb. Bu da onların gündəlik tələbatlarının ödənilməsində, ailə təminatında mühüm rol oynayır".

M.Mehdiyev təşkilat tərəfindən keçmiş döyüşçülərin problemləri ilə əlaqədar müvafiq orqanlar qarşısında məsələ qaldırıldığını dedi: "Milli Məclisə bu məsələ ilə bağlı bir neçə mühüm qanunun qəbul edilməsi üçün təkliflərimizi təqdim etmişik. Təkliflər arasında müharibə əlilləri övladlarının pulsuz təhsil almaları xüsusi yer tutur. Ona görə ki, əlillərin səhhətlərindəki problemlər onlara tam fiziki qabiliyyətlə işləməyə və buna əsasən də yüksək əməkhaqqı almağa imkan vermir. Bu isə həmin ailələrin ali məktəblərdə oxuyan övladlarının təhsil haqqını ödəmələrində çətinliklər yaradır. Təkliflərimiz arasında 20 Yanvar şəhidlərinin ailələrinə ödənilən məbləğin Qarabağ əlillərinə verilən prezident təqaüdü məbləğinə bərabər tutulması məsələsi də var. Hesab edirik ki, müharibə veteranlarının təqaüdləri arasındakı fərq də aradan qaldırılmalıdır".

Mehdi Mehdiyev qeyd etdi ki, onları ən çox narahat edən məsələ müharibə iştirakçılarının səhiyyə xidmətində üzləşdikləri problemlərdir: "Bu istiqamətdə mühüm irəliləyişlər mövcud olsa da, əlillərin səhhətindəki çətinliklər onlara daha ciddi qayğını diktə edir. Qanunvericiliyə görə, əlil pulsuz müalicə almalıdır. Yerlərdə həkimlər onları pulsuz müayinə edir, lakin müalicə üçün tələb olunan vəsaiti əlillər öz hesablarına ödəməlidirlər. Bu isə mümkün deyil. Çünki əlillik təqaüdü bir aylıq müalicə kursunun xərclərini ödəmir. Halbuki xəstəxanalara təsdiq olunmuş siyahılar üzrə pulsuz dərman preparatları verilməlidir. Hesab edirik ki, müharibə iştirakçılarının pulsuz dərman preparatları ilə təmin edilməsi məsələsi müvafiq dövlət strukturlarının diqqət mərkəzində olmalıdır".

Əmək və Əhalinin Sosial Müdafiəsi Nazirliyi və Səhiyyə Nazirliyi tərəfindən yaradılmış birgə komissiya əlilləri siyahıya alaraq onların ölkə daxilində və ya xaricdə müalicə olunmasını müəyyənləşdirir. Lakin əlillərin xaricdə müalicə edilməsində problemlər mövcuddur. Belə ki, Əmək və Əhalinin Sosial Müdafiəsi Nazirliyi nəqliyyat xərclərini ödəsə də, müalicə xərclərinin təminatında çətinliklər ortaya çıxır. Səhiyyə Nazirliyi ictimai birliyin bununla bağlı müraciətlərinə indiyə qədər nə müsbət, nə də mənfi cavab verib.

Qarabağ Müharibəsi Əlilləri, Veteranları və Şəhid Ailələri İctimai Birliyinin sədri M.Mehdiyev əlillərin və veteranların qarşılaşdıqları problemlərin həlli istiqamətində görülən işlərdən razı olduqlarını deyərək daim artan dövlət qayğısı nəticəsində keçmiş döyüşçülərin bütün problemlərinin yaxın illərdə həll ediləcəyini söylədi. O, qeyd etdi ki, dövlət səviyyəsində həyata keçirilən tədbirlər bu kontingentin həyat səviyyəsinin daha da yaxşılaşmasına, təminatının ödənilməsinə şərait yaradır.

Əlil və veteranların dövlət qayğısı şəraitində yaşadığı dövrdə keçmiş döyüşçülərə ən böyük sevinc və hədiyyə Prezident İlham Əliyevin onlar üçün prezident təqaüdü təsis etməsi olub. Ötən ilin 1 sentyabrından qüvvədə olan qanuna əsasən, birinci qrup Qarabağ müharibəsi əlili doxsan, ikinci qrup yetmiş, üçüncü qrup əlil isə əlli manat təqaüd alır. Eyni zamanda, ləğv edilmiş kommunal güzəştlər müqabilində kompensasiya ödənilməsi keçmiş döyüşçülərə yüksək dövlət qayğısının əyani göstəricisidir.

Anar Rasimoğlu

Azərbaycan.-2009.-12 aprel.-S.2.