Prezidentlər İlham Əliyev və Viktor Yuşşenko 1919-1920-ci illərdə Ukraynanın Azərbaycandakı xüsusi diplomatik missiyasının yerləşdiyi binada xatirə lövhəsinin açılışında iştirak etmişlər

Bakıda 1919-1920-ci illərdə Ukrayna Xalq Respublikasının Azərbaycan Xalq Cümhuriyyətindəki xüsusi diplomatik missiyasının yerləşdiyi binada – İstiqlaliyyət küçəsi, 31 ünvanında xatirə lövhəsinin açılışı olmuşdur.

Azərbaycan Prezidenti İlham Əliyev və Ukrayna Prezidenti Viktor Yuşşenko mərasimdə iştirak etmişdir.

Dövlət başçısı ali qonağa şəhərin bu hissəsində yerləşən binalar, o cümlədən Bakı Şəhəri İcra Hakimiyyətinin binası, metronun “İçərişəhər” stansiyası, habelə qala divarları haqqında məlumat verdi.

Prezidentlər Ukrayna heykəltəraşı İqor Qreçanikin müəllifi olduğu və üzərində Azərbaycan və Ukrayna dillərində “1919-1920-ci illərdə bu binada Ukrayna Xalq Respublikasının Azərbaycan Xalq Cümhuriyyətindəki xüsusi diplomatik missiyası yerləşmişdir” sözləri yazılmış lövhənin üstündən örtüyü götürdülər.

Azərbaycan.-2009.-11 aprel.-S.2.