Almaniyadakı Azərbaycan və türk diaspor təşkilatları Türkiyə-Ermənistan sərhədlərinin açılmasına etiraz edirlər

Son günlər Türkiyə ilə Ermənistan arasında sərhədlərin açılması barədə yayılan xəbərlər Almaniyada yaşayan azərbaycanlıların, eləcə də türk diaspor təşkilatlarının nümayəndələrinin də ciddi narazılığına səbəb olmuşdur.

Bununla əlaqədar Almaniyada və digər Avropa ölkələrində fəaliyyət göstərən türk və Azərbaycan cəmiyyətləri adından Türkiyə Prezidenti Abdullah Gülə, Baş nazir Rəcəb Tayyib Ərdoğana və parlamentin sədri Köksal Toptana müraciət göndərilmişdir.

Müraciətdə deyilir ki, Ermənistan Türkiyəyə qarşı ərazi iddiasında olmuşdur. Dağlıq Qarabağ münaqişəsinin öz həllini tapmadığı, Azərbaycanın ərazi bütövlüyü bərpa olunmadığı bir vaxtda qardaş ölkənin dəstəyindən məhrum olmaq Azərbaycanın mövqeyini daha da zəiflədəcək və münaqişənin ədalətli həllini bir qədər də uzadacaqdır.

Türkiyə dövlətinə, siyasətçilərinə, kütləvi informasiya vasitələrinə, elm, incəsənət xadimlərinə, bütün türk xalqına müraciət edən soydaşlarımız, eləcə də türk diaspor təşkilatlarının nümayəndələri onları bu məsələyə laqeyd olmamağa və Ermənistanla sərhədlərin açılmasına qarşı etiraz səslərini uçaltmağa çağırırlar.

Müraciət bu sözlərlə bitir: "Biz - Azərbaycan və türk xalqları - Azərbaycan xalqının ümummilli lideri Heydər Əliyevin heç bir şərhə ehtiyacı olmayan "Bir millət, iki dövlət" kəlamını unutmamalıyıq".

AzərTAc

Azərbaycan.-2009.-14 aprel.-S.2.