Azərbaycanın üzləşdiyi işğal amili regionun təhlükəsizliyinə ciddi təhdiddir

Azərbaycan Respublikasının milli təhlükəsizlik naziri, general-leytenant Eldar Mahmudov ölkəmizdə səfərdə olan ABŞ dövlət katibinin Avropa və Avrasiya məsələləri üzrə müşaviri, ATƏT-in Minsk qrupunun həmsədri Mətyu Brayzəni onun xahişi ilə qəbul etmişdir.

Nazirliyin ictimai əlaqələr mərkəzindən bildirmişlər ki, görüşdə nazir Eldar Mahmudov Ermənistan-Azərbaycan, Dağlıq Qarabağ münaqişəsi ilə bağlı məsələlərə toxunaraq, ölkəmizin üzləşdiyi işğal amilinin nəzarətsiz ərazilər problemi baxımından nəinki Azərbaycanın, eyni zamanda, bütün regionun təhlükəsizliyinə ciddi təhdid olduğunu söyləmiş və münaqişənin tezliklə həll olunmasının vacibliyini qeyd etmişdir.

Milli təhlükəsizlik naziri, həmçinin regionda gedən proseslər, reallıqlar və mümkün təhdidlər barədə danışmış, beynəlxalq terrorçuluq və ekstremizmə, transmilli mütəşəkkil cinayətkarlığın müxtəlif təhlükəli təzahürlərinə qarşı aparılan mübarizə tədbirləri və onların konkret nəticələri barədə məlumat vermişdir.

Görüşdə tərəfləri maraqlandıran digər məsələlər barədə də fikir mübadiləsi aparılmışdır.

AzərTAc

Azərbaycan.-2009.-17 aprel.-S.4.