Kolxəlfəli kəndinin bu günü

Ölkəmizdə geniş quruculuq, tikinti, abadlıq işləri aparılır. Yeni yaşayış sahələri salınır, çoxmərtəbəli binalar ucaldılır, müasir tələblərə cavab verən olimpiya idman kompleksləri istifadəyə verilir. İnsanların asudə vaxtlarını səmərəli keçirməsi üçün istirahət guşələri düzəldilir, yaşıllıqlar, parklar, xiyabanlar salınır.

Hamının ürəyindən xəbər verən bu xeyirxah işlər Ağstafa rayonunda, onun kənd və qəsəbələrində də görülür. Quruculuq işləri sayəsində son vaxtlar rayonun siması xeyli dəyişib, gözəlləşib. Ölkə Prezidenti cənab İlham Əliyev Ağstafada səfərdə olarkən Heydər Əliyev Mərkəzinin açılış mərasimində demişdir: "Bakıdan uzaqda yerləşən rayonların inkişafına diqqət göstərməliyik. Sərhəd rayonlarına ilk növbədə, o cümlədən Ağstafa rayonuna. Mən çox şadam ki, burada işlər yaxşı gedir və yəqin son aylar ərzində böyük dəyişikliklər hiss edirsiniz. Altı aya tikiş fabriki tikilibdir. Növbəti illərdə işlər daha da sürətlə gedəcəkdir".

Doğrudan da, son illər rayonda, eləcə də kəndlərdə xeyli ürəkaçan işlər görülüb. Bu, ilk baxışdan hiss edilir. Kolxəlfəli kənd ərazi nümayəndəsi Nərbala Piriyev söhbət zamanı bu barədə belə dedi:

- Nümayəndəliyimiz bir neçə ildir yaradılıb. 2004-cü ildə qonşu Pirili kəndindən ayrılaraq müstəqil fəaliyyət göstərir. Hazırda rayon rəhbərliyinin köməyi ilə nümayəndəlik üçün idarə binası tikilir.

Kənddə 1200-dən çox əhali yaşayır. Orta məktəb, kitabxana, klub, feldşer-mama məntəqəmiz var. Camaat əsasən əkinçilik və maldarlıqla məşğuldur.

Kənd bələdiyyəsi də iki ildir ki, fəaliyyət göstərir. Bu müddət ərzində müəyyən işlər görməyə çalışıb. Kəndarası yollara öz vəsaitləri hesabına çınqıl döşədib. Bu işlər gələcəkdə də davam etdiriləcək. Camaatın içməli suya olan ehtiyacını ödəmək üçün bir artezian quyusu təmir etdirilib istifadəyə verilib.

Torpaqlarımızın bütövlüyü, sərhədlərimizin toxunulmazlığı uğrunda qurban gedənlər unudulmur. Veteranlara, şəhid ailələrinə, imkansızlara kömək edirik. Əlilləri də diqqətdən kənarda qoymuruq. Onlar üçün əlavə pay torpaqları ayrılıb, həyətyanı sahələr verilib.

Fürsət düşmüşkən, həyatımızda dönüş yaradan bir məsələni xüsusi qeyd etmək istəyirəm. Məlumdur ki, Ağstafada yeni tikiş fabriki istifadəyə verilib. Həmin fabrikin açılış mərasimində iştirak edən ölkə başçısı işçiləri təbrik edərək dedi ki, burada işləmək üçün çox gözəl şərait yaradılmışdır. Ən müasir avadanlıq quraşdırılmışdır. Yəni burada işləmək sizin üçün xoş olmalıdır. Əminəm ki, siz səmərəli işləyəcək və Azərbaycanın bütün regionlarının, o cümlədən Ağstafa rayonunun inkişafına öz töhfənizi verəcəksiniz.

Ölkə başçısının rayonun inkişafına göstərdiyi bu qayğı Kolxəlfəli kəndinin camaatında da böyük ruh yüksəkliyi yaradıb. Onların sabaha olan inamını daha da artırıb.

Eldar Nəsibli

Azərbaycan.-2009.-17 aprel.-S.7.