Tanınmış ictimai xadim Dilruba Camalovanın xatirəsini anma mərasimi keçirilmişdir

Aprelin 23-də Ailə, Qadın və Uşaq Problemləri üzrə Dövlət Komitəsi (AQUPDK) ölkəmizin müstəqilliyinin və dövlətçiliyimizin qorunub möhkəmləndirilməsində layiqli xidməti olan Dilruba Camalovanın xatirəsini anma mərasimi keçirmişdir.

Azərbaycan Prezidenti Administrasiyasının humanitar siyasət məsələləri şöbəsinin müdiri Fatma Abdullazadə D.Camalovanın ictimai-siyasi fəaliyyətindən danışmışdır. F.Abdullazadə bildirmişdir ki, D.Camalova 1993-cü ilin avqust hadisələrində Azərbaycanın müstəqilliyinin, ərazi bütövlüyünün qorunması uğrunda vuruşan bir sərkərdə kimi həyatının ən böyük uğurunu qazandı. Azərbaycan qadınlarının inkişaf tarixində D.Camalovanın xüsusi yeri, mövqeyi vardır. O, hər bir söhbətdə böyük müdrikliklə gender siyasətinin mahiyyətini açıqlayırdı. Onu narahat edən məsələlərdən biri ailələrdə qadınların maariflənməsində qoyulan məhdudiyyətlər idi. Mən inanıram ki, D.Camalova haqqında bir çox həqiqətlər gələcək nəsillərə çatdırılacaq, Azərbaycan qadını durduqca onun əziz xatirəsi ürəklərdə yaşayacaqdır. AQUPDK-nın sədri Hicran Hüseynova D.Camalovanın ictimai-siyasi xadim olması ilə yanaşı, həm də gözəl ailə başçısı, qayğıkeş ana olduğunu bildirmişdir. Komitə sədri demişdir ki, Dilruba xanım əmək fəaliyyətinə müəllim kimi başlamış, müxtəlif sahələrdə çalışmış, uzun illər Lənkəran şəhər rəhbərliyinə başçılıq etmişdir.

Ombudsman Elmira Süleymanova, Konstitusiya Məhkəməsinin sədr müavini Sona Salmanova, təhsil nazirinin müavini İradə Hüseynova, Konstitusiya Məhkəməsinin hakimi Südabə Həsənova, Bakı Şəhər İcra Hakimiyyəti başçısının müavini Fiduma Hüseynova, Bakı Dövlət Universitetinin müəllimi Möminat Ömərova, həkim-endekrinoloq Tamfira Əliyeva və başqaları çıxış edərək ölkəmizin dövlətçiliyinin və müstəqilliyinin qorunmasında D.Camalovanın xidmətlərini yüksək qiymətləndirmişlər.

Tədbirdə “Dilruba Camalova-70" kitabının təqdimatı olmuşdur.

AzərTAc

Azərbaycan.-2009.-24 aprel.-S.3.