Korrupsiya ilə bağlı cinayətlərin aşkar edilməsi üçün bir sıra tədbirlər həyata keçirilmişdir

Azərbaycan Respublikasının baş prokuroru yanında Korrupsiyaya Qarşı Mübarizə İdarəsi tərəfindən korrupsiya cinayətlərinin aşkar edilməsi və cinayət törətmiş şəxslərin məsuliyyətə cəlb edilməsi istiqamətində bir sıra tədbirlər həyata keçirilmişdir.

Baş Prokurorluğun mətbuat xidmətinin məlumatında bildirilir ki, "Azəriqaz" Qapalı Səhmdar Cəmiyyəti tərəfindən Ağcabədi Qaz İstismar İdarəsinin maliyyə-təsərrüfat fəaliyyətinin audit yoxlanması nəticəsində qaz sayğaclarının çatışmazlığı, abonentlərə artıq sərfiyyatın yazılması, real rəqəmlərin faktiki sayğac göstəricilərindən artıq olması, rayon ərazisində yerləşən bir sıra müəssisələrdə layihə-smeta sənədləri olmadan sayğaclar quraşdırılaraq onların təbii qazla qanunsuz təmin olunması faktları üzrə baş prokuror yanında Korrupsiyaya Qarşı Mübarizə İdarəsi tərəfindən Cinayət Məcəlləsinin 179.2.3-cü və 309.1-ci maddələri üzrə başlanmış cinayət işinin istintaqı zamanı müəyyən edilmişdir ki, Ağcabədi Qaz İstismar İdarəsinin rəisi Gülmalıyev Elman Gülmalı oğlu vəzifəsindən sui-istifadə edərək ona etibar edilmiş pul vəsaitini mənimsəmə yolu ilə talamış, xidməti səlahiyyətlərini aşaraq dövlət orqanının qanunla qorunan mənafelərinə ciddi ziyan vurmuşdur.

E.Gülmalıyev 2007-ci ildə 32 yeni abonentdən evlərinə məişət qaz sayğaclarının quraşdırılmasına görə idarənin hesabına mədaxil etmək üçün aldığı pul vəsaitini mənimsəmiş, bundan başqa, "Obyektlərdə elektrik, qaz və su sayğaclarının quraşdırılması haqqında" Nazirlər Kabinetinin 2004-cü il 27 iyul tarixli qərarına uyğun olaraq, 2008-ci ildə yeni abonentlərə məişət qaz sayğaclarını onların öz vəsaiti hesabına quraşdırmalı olduğu halda, idarənin vəsaiti hesabına 39 ədəd məişət qaz sayğacı alınması barədə qanunsuz göstəriş vermiş, idarənin hesabından nağd pul çıxararaq mənimsəmişdir.

Törətdiyi cinayət əməllərinə görə E.Gülmalıyev 2009-cu il aprelin 24-də Cinayət Məcəlləsinin 179.2.3-cü və 309.1-ci maddələri ilə təqsirləndirilən şəxs qismində məsuliyyətə cəlb olunmuş, ona həmin maddələrlə ittiham elan edilmiş və məhkəmənin qərarı ilə barəsində həbs qətimkan tədbiri seçilmişdir.

Azərbaycan Respublikasının baş prokuroru yanında Korrupsiyaya Qarşı Mübarizə İdarəsində təhqiq edilən digər cinayət işi Cəlilabad rayonunun Privolnoye kənd icra nümayəndəsi Ağalar Güləşxan oğlu Ağayevin rüşvət alması və vəzifə saxtakarlıqları ilə əlaqədardır.

Azərbaycan Respublikası CM-in 311.2-ci və 313-cü maddələri ilə başlanmış cinayət işinin istintaqı zamanı müəyyən edilmişdir ki, A.Ağayev Cəlilabad rayonunun Privolnoye kənd icra nümayəndəsi vəzifəsində işləyərkən ötən il avqustun 14-də həqiqi hərbi xidmətdə olan Həsənov İsa Adil oğlu ilə nikah bağlamaq üçün ona müraciət edən Ağayeva Ofeliya Elxan qızından İ.Həsənovun razılığı və iştirakı olmadan nikahın bağlanmasına görə 300 manat rüşvət almış, İ.Həsənovun adından yazdırdığı ərizədə və nikah haqqında akt qeydində sonuncunun imzalarını saxtalaşdırmış və bilərəkdən yalan məlumatlar daxil etdiyi nikah haqqında akt qeydini və nikah haqqında şəhadətnaməni öz imzası və möhürü ilə təsdiq etməklə O.Ağayevaya təqdim etmişdir.

Törətdiyi əməllərinə görə A.Ağayevə Cinayət Məcəlləsinin 311.2-ci və 313-cü maddələri ilə ittiham elan edilərək məhkəmənin qərarı ilə barəsində həbs qətimkan tədbiri seçilmişdir.

Azərbaycan Respublikası Maliyyə Nazirliyi tərəfindən respublikanın şəhər və rayonlarında fəaliyyət göstərən musiqi məktəbləri və gimnaziyalarda işləyən 172 pedaqoji işçinin adına verilmiş diplomların, 4 nəfərin adına tərtib olunmuş arayışların saxta olması, həmin diplom və arayışlar əsasında musiqi məktəbləri və gimnaziyalarda işləyən müəllimlərə qanunsuz olaraq ümumilikdə 692.567 manat əməkhaqqı ödənilməsi faktları üzrə 2009-cu il fevralın 6-da Azərbaycan Respublikası CM-in 308.1-ci, 320.1-ci və 320.2-ci maddələri ilə cinayət işi başlanmışdır.

Azərbaycan Respublikasının baş prokuroru yanında Korrupsiyaya Qarşı Mübarizə İdarəsi tərəfindən aparılmış istintaqla müəyyən edilmişdir ki, Gəncə Musiqi Texnikumu adından verilmiş və rayon musiqi məktəbinə təqdim olunmuş 1126 diplomdan 101-i və 3 arayış, Azərbaycan Milli Konservatoriyası nəzdində fəaliyyət göstərən musiqi kollecinin adından verilmiş 533 diplomdan 31-i, Naxçıvan Musiqi Texnikumu adından verilmiş 20 diplom, Sumqayıt Musiqi Texnikumu adından verilmiş 8 diplom və ümumilikdə 172 şəxsin adına rəsmiləşdirilmiş diplom və arayışlar həmin musiqi müəssisələri tərəfindən verilməmişdir.

Aparılmış istintaqla müəllimlərin bir qisminin musiqi texnikum və kolleclərini bitirmələri barədə saxta diplomları Yevlax şəhər 1 saylı musiqi məktəbinin direktoru Bəylərov Bəylər Ağalar oğlundan və digər şəxslərdən, bir qisminin isə Yevlax şəhər sakini Fərzəliyev İlham Fərzəli oğlundan aldıqları sübuta yetirilmişdir.

İbtidai istintaqla həmçinin müəyyən edilmişdir ki, İ.Fərzəliyev qabaqcadan əlbir olduğu bir qrup vəzifəli şəxslə özü və üçüncü şəxslər üçün maddi neməti pul şəklində rüşvət kimi almış, hüquq verən rəsmi sənədlər hazırlamış, onları satmış və aldatma yolu ilə xeyli miqdarda özgə əmlakını ələ keçirməklə dələduzluq etmişdir.

Belə ki, o, 2000-2008-ci illər ərzində B.Bəylərov və qeyriləri ilə qabaqcadan əlbir olmaqla cinayət əlaqəsinə girərək Gəncə Musiqi Texnikumunun adından verildiyi göstərilmiş 17 ədəd, Naxçıvan Muxtar Respublikası 1 saylı orta ixtisas musiqi kolleci adından verildiyi göstərilmiş 5 ədəd, Bakı şəhər Dövlət Musiqi Kolleci adından verildiyi göstərilmiş 3 ədəd və ümumilikdə 48 ədəd saxta diplomu ayrı-ayrı şəxslərə satmışdır.

Törətdiyi cinayət əməllərinə görə B.Bəylərova Cinayət Məcəlləsinin 311.3.1-ci və 320.1-ci, İ.Fərzəliyevə isə göstərilən maddələrlə yanaşı, Cinayət Məcəlləsinin 178.2.4-cü maddəsi ilə nəzərdə tutulmuş ittiham elan edilərək, barələrində məhkəmənin qərarı ilə həbs qətimkan tədbiri seçilmişdir.

Hazırda həmin işlər üzrə cinayətin digər iştirakçılarının müəyyən edilərək məsuliyyətə cəlb edilməsi istiqamətində zəruri istintaq-əməliyyat tədbirləri davam etdirilir.

Azərbaycan Respublikasının baş prokuroru yanında Korrupsiyaya Qarşı Mübarizə İdarəsi tərəfindən respublikanın digər hüquq-mühafizə orqanları ilə əlaqəli şəkildə bundan sonra da mütəşəkkil cinayətkarlığın ən təhlükəli təzahürlərindən olan korrupsiyanın qarşısının alınması, cinayət törətmiş şəxslərin məsuliyyətə cəlb edilməsi istiqamətində zəruri tədbirlərin görülməsi təmin ediləcəkdir.

AzərTAc

Azərbaycan.-2009.-30 aprel.-S.5.