Beynəlxalq mühasibat uçotu standartları üzrə milli diplomlar təqdim olunmuşdur

İyulun 31-də Auditorlar Palatasında Azərbaycan mühasibatlığı tarixində ilk dəfə olaraq müvafiq imtahanı uğurla vermiş mühasiblərə Beynəlxalq Mühasibat Uçotu Standartları üzrə milli diplomlar təqdim olunmuşdur.

Tədbirdə Auditorlar Palatasının sədri, professor Vahid Novruzov bildirmişdir ki, mühasiblər üçün təlim kursları Böyük Britaniyanın Sertifikatlı İmtiyazlı Mühasiblər Assosiasiyasının Azərbaycanda akkreditə olunmuş tədris mərkəzi - "G&R Business Services" MMC-nin (GRBS) mütəxəssisləri tərəfindən aparılmışdır. Təlim kursları bu ilin mayında Auditorlar Palatası ilə GRBS arasında imzalanmış əməkdaşlıq sazişi əsasında keçirilmişdir. Saziş qurumlar arasında Milli Mühasibat Sisteminin tədrisi və müvafiq imtahanların keçirilməsi, auditor və mühasib kadrlarının hazırlanması və yenidən hazırlanması təcrübəsinin təkmilləşdirilməsi və digər sahələrdə geniş əməkdaşlığı nəzərdə tutur.

GRBS-in idarəedici direktoru Bəhram Qurbanov respublikamızda Beynəlxalq Mühasibat Uşotu Standartları mövzusunda mövcud təlim proqramları çərçivəsində tədrisin cari ilədək yalnız rus və ingilis dillərində keçirildiyini və qurumun yanvar ayından mühasibatlıq tarixində ilk dəfə olaraq müvafiq kvalifikasiya üzrə Azərbaycan dilində tədrisə başladığını diqqətə çatdırmışdır.

Sonra iştirakçılara milli diplomlar təqdim olunmuşdur.

Qeyd edək ki, təlim kurslarından sonra keçirilmiş imtahan 42 nəfərdən 29-u üçün uğurlu olmuşdur.

AzərTAc

Azərbaycan.- 2009.- 1 avqust.- S. 5.