Məcburi köçkünlər dövlətin himayəsindədir

Prezident İlham Əliyevin Nazirlər Kabinetinin 2009-cu ilin birinci yarısının sosial-iqtisadi inkişafının yekunlarına həsr olunmuş iclasındakı nitqindən irəli gələn vəzifələr Kəlbəcər Rayon İcra Hakimiyyətində geniş müzakirə edilmişdir.

Rayon icra hakimiyyətinin başçısı Vidadi Məhərrəmov bildirmişdir ki, hazırda respublikanın 58 rayon və şəhərinin 1000-dən çox yaşayış məntəqəsində müvəqqəti məskunlaşmış məcburi köçkünlərin mənzil şəraitinin yaxşılaşdırılması istiqamətində geniş proqramlar hazırlanaraq həyata keçirilir.

"Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı"na əlavələr edilməsi haqqında Azərbaycan Respublikası Prezidentinin 31 oktyabr 2007-ci il tarixli sərəncamının icrası ilə əlaqədar olaraq Goranboy rayonunda müvəqqəti məskunlaşmış 596 məcburi köçkün ailəsi üçün yeni qəsəbə salınmasına 10 iyun 2009-cu ildə başlanılmışdır. Qəsəbədə tikinti işlərinin gələn ilin sentyabr ayında başa çatdırılması nəzərdə tutulur. Həmin qəsəbədə mənzillərlə yanaşı, məktəb, səhiyyə, rabitə obyektləri, emal sexləri və digər infrastruktur obyektləri də inşa olunur.

26 məcburi köçkün ailəsi üçün Göygöl rayonunda "Murovdağ" qəsəbəsinə bitişik ərazidə 26 yaşayış evi tikilmiş və yaxın günlərdə istifadəyə veriləcəkdir.

Qəbələ rayonunda müvəqqəti məskunlaşmış məcburi köçkünlər üçün çoxmərtəbəli yaşayış evləri tikilir. Təmirə ehtiyacı olan ictimai binaların, su və kanalizasiya xətlərinin təmiri davam etdirilir. "Azəryolservis" ASC tərəfindən Gəncə şəhəri Azərbaycan Dövlət Aqrar Universitetinin 3 və 4 saylı tələbə yataqxanasının 3000 kvadratmetrlik dam örtüyü əsaslı təmir olunmuşdur. 3 saylı yataqxanada daxili elektrik xətləri yenidən quraşdırılmış, 4 saylı yataqxanada su və kanalizasiya sistemi əsaslı təmir olunmuş, məcburi köçkünlərin narahatlığına son qoyulmuşdur.

Dövlətqaçqınkom tərəfindən Gəncə şəhəri Texnologiya Universitetinin 2 saylı tələbə yataqxanasının dam örtüyü, 1 saylı tələbə yataqxanasında isə elektrik sistemi təmir olunmuş, Gəncə Dövlət Universitetinin 3 saylı tələbə yataqxanasının kanalizasiya və elektrik sistemi yenidən quraşdırılmışdır.

Məcburi köçkünlərin işıq probleminin həll edilməsi, elektrik enerjisi təchizatının yaxşılaşdırılması istiqamətində ardıcıl olaraq xeyli işlər görülmüşdür. Zərdab rayonu Bəyimli kəndi yaxınlığındakı fermada müvəqqəti məskunlaşmış məcburi köçkünləri elektrik enerjisi ilə təmin etmək məqsədi ilə Dövlətqaçqınkomdan 1 ədəd 100 kv-lıq elektrik transformatoru, 6 min metr elektrik naqili alınmışdır.

Goranboy rayonu Manas kəndində müvəqqəti məskunlaşmış məcburi köçkünləri normal elektrik enerjisi ilə təmin etmək üçün 1 ədəd şkafı ilə birlikdə 250 kv-lıq elektrik transformatoru quraşdırılır. Bu istiqamətdə işlər davam etdirilir.

Məcburi köçkünlərin içməli su təchizatını yaxşılaşdırmaq, qarşıya çıxan problemləri həll etmək üçün tədbirlər görülmüşdür. Belə ki, Dövlətqaçqınkomdan 3 ədəd su nasosu alınaraq biri Gəncə şəhəri Türklər qəsəbəsində, o birisi Gəncə şəhəri Avtomobil zavodunun ətrafında, digəri isə Tərtər rayonu Bəyimsarov kəndində müvəqqəti məskunlaşmış məcburi köçkünlərin istifadəsinə verilmişdir. Digər yerlərdəki su problemlərinin həlli ilə bağlı Dövlətqaçqınkom və Məcburi Köçkünlərin Sosial İnkişaf Fondu qarşısında məsələlər qaldırılmışdır. Rayonun kənd təsərrüfatı və digər istehsal müəssisələri, həmçinin təhsil, səhiyyə və mədəniyyət təşkilatları da öz üzərlərinə düşən işləri günün tələbləri səviyyəsində qurmağa çalışırlar.

Müşavirədə çıxış edənlər rayonun məcburi köçkünlərinə göstərilən diqqət və qayğıya görə ölkə başçısına minnətdarlığını bildirmiş, qarşıda duran vəzifələrdən danışmışlar.

Zahid MUXTAR,

"Kəlbəcər harayı"

qəzetinin baş redaktoru

Azərbaycan.- 2009.- 2 avqust.- S.2.