Naxçıvan Muxtar Respublikasında yeraltı qaz anbarı inşa ediləcəkdir

Avqustun 3-də Prezident İlham Əliyev Naxçıvana səfəri çərçivəsində muxtar respublikada tikiləcək yeraltı qaz anbarının texniki təklifinin sxemi ilə tanış olmuşdur.

Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev Nazirlər Kabinetinin 2008-ci il 11 yanvar tarixli iclasında dövlətimizin başçısının muxtar respublikada yeraltı qaz anbarının yaradılması tapşırığının icrası çərçivəsində görülən işlər haqqında məruzə etdi.

Naxçıvan Muxtar Respublikası ərazisində bu istiqamətdə aparılan böyük həcmli tədqiqat işləri barədə məlumat verən ARDNŞ prezidenti bildirdi ki, mütəxəssislərin apardıqları araşdırmalar nəticəsində muxtar respublikada təbii qazın sıxılması və izotermik üsulla saxlanılması kompleksinin yaradılması haqqında texniki təkliflər hazırlanmışdır. Təkliflərə əsasən, qazın maye halına salınıb saxlanılması üçün dünya standartlarına uyğun ən müasir texnologiyadan istifadə ediləcəkdir. Yeraltı qaz anbarının yaradılması muxtar respublikanın il ərzində fasiləsiz mavi yanacaqla təmin olunması məqsədi daşıyır.

AzərTAc

Azərbaycan.- 2009.- 4 avqust.- S. 2.