Azərbaycan xalqı ölkə rəhbərinin apardığı məqsədyönlü siyasəti dəstəkləyir

Qloballaşan dünyada hər bir dövlətin demokratik dəyərlərə sadiqliyi, ilk növbədə, onun insan hüquqlarına münasibəti ilə müəyyən olunur. Prezident İlham Əliyevin insan hüquq və azadlıqlarının müdafiəsi ilə bağlı həyata keçirdiyi kompleks tədbirlər respublikamızın Avratlantik məkana inteqrasiya siyasətinə sadiq olduğunu əyani şəkildə göstərdi. Şəxsiyyətin toxunulmazlığı, söz, mətbuat, vicdan azadlığı, bütün vətəndaşların bərabər hüquqlara malik olması, siyasi plüralizm Azərbaycanda demokratik cəmiyyətin əsas atributları kimi bərqərar olmuşdur.

2008-ci ilin 15 oktyabrında azad və şəffaf keçən prezident seçkilərində ölkə vətəndaşlarının mütləq əksəriyyəti demokratik cəmiyyətdə yaşamaq istəyini bir daha ortaya qoydu. Dövlət başçısı İlham Əliyev prezidentlik səlahiyyətlərini yerinə yetirməyə başladığı ilk gündən bəyan etdi ki, demokratik dövlət insanların birgə fəaliyyətinin təşkili və tənzimlənməsinin mühüm şərti, onların qarşılıqlı münasibətlərinin qaydaya salınmasının, cəmiyyətdə nizam-intizamın və sabitliyin başlıca təmini vasitəsidir. Bu yolla irəliləyən dövlətlərin mütləq əksəriyyətində ictimai-siyasi sabitliyin möhkəm təmələ söykənməsi, insanların iqtisadi azadlığı, yüksək maddi rifah halı, vətəndaş-cəmiyyət münasibətlərinin ahəngdarlığı, şəxsiyyətin mənafelərinin, hüquq və azadlıqlarının maksimum səviyyədə qorunması, qanunun aliliyi prinsipinə bütün səviyyələrdə əməl olunması demokratiyanın optimal idarəetmə üsulu kimi üstünlüyünü təmin etmişdir. İctimai-siyasi həyatın bütün sahələri üzrə dövlətin hüquqi bazasının möhkəm təməllər üzərində qurulması, ictimai ədalət prinsiplərinə ciddi riayət olunması həmin dövlətdə sabitliyin, vətəndaş həmrəyliyinin və dinamik iqtisadi inkişafın başlıca təminatlarından biridir.

Son beş il yarımda hüquqi dövlət və vətəndaş cəmiyyəti quruculuğu yolunda inamlı addımlar atan dövlət başçısı İlham Əliyev cəmiyyətin təkamül sistemini, dövlət idarəçilik mexanizmlərinin səmərəli fəaliyyətini tənzimləyən qanunların müasirləşdirilməsi və təkmilləşdirilməsini davamlı prosesə çevirmişdir. Ölkə başçısı İlham Əliyevin rəhbərliyi altında həyata keçirilən liberal ruhlu islahatlar, tətbiq olunan mütərəqqi hüquqi yeniliklər çağdaş dövrün tələbləri ilə səsləşmiş, cəmiyyətin inkişaf ahənginə adekvat olmuş, ən başlıcası, insan və vətəndaş hüquq və azadlıqlarının qorunması məsələlərini özündə maksimum dərəcədə ehtiva etmişdir. Zaman etibarilə böyük olmayan müddətdə Azərbaycanın hüquqi dövlət quruculuğu sahəsində yüksək nailiyyətlər qazanması da bilavasitə mülki cəmiyyət quruculuğuna hesablanmış islahatların respublikanın sosial-iqtisadi inkişaf dinamikası ilə uzlaşdırılması nəticəsində mümkün olmuşdur.

Azərbaycan Prezidenti İlham Əliyev qloballaşma dövrünün reallıqlarına uyğun rasional siyasət yürüdür. Bu sahədə həyata keçirilən islahatlar mahiyyət etibarilə respublikada demokratikləşmə proseslərinin daha da sürətləndirilməsinə, vətəndaş cəmiyyəti təsisatlarının güclənməsinə gətirib çıxarmışdır. Son beş il yarım müddətdə Azərbaycanda siyasi, iqtisadi, mədəni və digər sahələrdə həyata keçirilən islahatlar ölkənin kompleks inkişafını təmin etməklə beynəlxalq miqyasda mövqelərini möhkəmləndirmişdir. Təsadüfi deyil ki, dünyanın nüfuzlu maliyyə qurumları vaxtaşırı açıqladıqları hesabatlarda Azərbaycanı iqtisadi inkişaf tempinə görə lider dövlət hesab edirlər. Bütun bunlar Azərbaycan rəhbərliyinin uğurla apardığı iqtisadi-sosial siyasətin məntiqi nəticəsidir.

2008-ci ildə Dünya Bankı Azərbaycanı bir nömrəli islahatçı ölkə kimi tanıdığını bəyan etmişdi. Bu fakt ölkəmizdə elmi əsaslar üzərində aparılan iqtisadi islahatların məqsədyönlülüyündən xəbər verir. Dünya Bankının 2009-cu il üzrə "Qlobal iqtisadi perspektivlər" adlı hesabatında ümumi daxili məhsulun artımına görə ölkəmiz yenə də birinciliyini qoruyub saxlamışdır. Hesabatda beynəlxalq maliyyə böhranının təsirlərinin bu il də davam edəcəyi bildirilir və bunun dünya dövlətlərində ümumi daxili məhsulun artım tempinə təsirsiz ötüşməyəcəyi vurğulanır. Bankın proqnozlarına görə, 2009-cu ildə dünya iqtisadiyyatının artımı 0,9 faizə çatacaq, gələn il isə bu rəqəm 3 faiz artacaq. Bank ekspertləri onu da bildirirlər ki, bu il Avropa və Mərkəzi Asiya ölkələrində iqtisadi artım 2,7 faiz, gələn il isə 5 faiz proqnozlaşdırılır. Belə şəraitdə isə Azərbaycan yenə də böyük iqtisadi artım göstəricilərinə malik ölkələr sırasında yer alacaq.

Dünya Bankının proqnozlarına görə, bu il Azərbaycanın iqtisadi artımı 10,4 faiz təşkil edəcək. Lakin o da istisna edilmir ki, cari il ərzində Azərbaycanda iqtisadi artım tempi daha yüksək rəqəmlərlə ifadə oluna bilər. Bunu digər beynəlxalq maliyyə qurumlarının açıqladığı proqnozlar da təsdiq edir. Avropa Yenidənqurma və İnkişaf Bankı (AYİB) 2009-cu ildə Azərbaycanda ÜDM-nin 15 faizlik artımını proqnozlaşdırırlar. Ötən ilin noyabrında açıqlanan bu proqnoz, bankın hesabatına daxil edilmiş qalan 27 ölkə üçün göstərilən digər nəticələrlə müqayisədə daha yüksəkdir. Həmin dövlətlərdə orta iqtisadi artım cəmi 4,5 faiz səviyyəsində qeyd edilir. Beynəlxalq Maliyyə Korporasiyası isə ötən ilin oktyabrında açıqladığı proqnozlarda Azərbaycanın yenə də ümumi daxili məhsulun artımında liderliyini qoruyub saxlayacağını bildirdi və cari il ərzində ölkəmizdə iqtisadi artımın ən azı 16,4 faiz təşkil edəcəyini açıqladı.

Beynəlxalq təşkilatların açıqlamasından aydın görünür ki, Azərbaycanda iqtisadi artım göstəriciləri yenə də dünyanın aparıcı dövlətlərindən yüksək olacaq. MDB məkanında Azərbaycanın hələ uzun müddət lider mövqeyini qoruyub saxlayacağı proqnozlaşdırılır.

Dünyanı bürüyən maliyyə böhranına baxmayaraq, Azərbaycanın iqtisadi inkişaf sürətinə görə yenə də dünyada liderliyini qoruyub saxlaması Prezident İlham Əliyev tərəfindən aparılan uğurlu iqtisadi siyasətin real nəticəsidir. İqtisadi sahədə əldə olunan yüksək nəticələr ölkə əhalisinin sosial durumunun daha da möhkəmlənməsinə adekvat təsir göstərir. Azərbaycanda iqtisadi, siyasi, sosial sahələrdə aparılan köklü islahatların ölkə vətəndaşları tərəfindən razılıqla qarşılanması nüfuzlu beynəlxalq təşkilatların apardıqları rəy sorğularında da öz ifadəsini tapır.

ABŞ-ın nüfuzlu "Gallup" təşkilatının elan etdiyi yeni sorğu bu mənada xüsusi diqqəti cəlb edir. Keçirilən sorğunun nəticələrindən aydın olur ki, Azərbaycanda əhalinin 77 faizi ölkə rəhbərliyinin fəaliyyətindən razıdır. Adıçəkilən təşkilat bildirir ki, 12 postsovet ölkəsində hər min nəfərlə üzbəüz söhbətdə onlara belə bir sual verilib: "Sizcə, ölkə rəhbərliyi işinin öhdəsindən necə gəlir?" Bu suala cavabda "Rəhbərliyin işini bəyənirəm" deyənlərin sayına görə Azərbaycan ilk sırada gəlib və qeyd edildiyi kimi, respondentlərin 77 faizi ölkə rəhbərliyinin həyata keçirdiyi siyasəti dəstəkləyib.

"Gallup" təşkilatının tərtib etdiyi siyahıda Azərbaycandan sonra növbəti yeri Qazaxıstan tutur. Qazaxıstanda aparılan sorğuda 71 faiz respondent ölkə rəhbərliyinin siyasətini dəstəklədiyini bildirib. Sorğudan o da məlum olub ki, Rusiyada 56 faiz, Belarusda 46 faiz, Qırğızıstanda 43 faiz, Latviyada 27 faiz, Moldovada 25 faiz, Gürcüstanda 21 faiz, Estoniyada 20 faiz, Litvada 13 faiz hakimiyyət tərəfindən həyata keçirilən siyasətdən razıdır.

Sorğunun nəticələri Azərbaycan rəhbərliyinə xalqın yüksək etimad göstərdiyini sübuta yetirir. Ölkə əhalisi aparılan çoxşaxəli islahatların davamlı olmasını zəruri sayır. Son beş il yarımda əhalinin sosial durumunun daha da yaxşılaşması ölkə rəhbərliyinə olan inamı daha da artırmışdır. Azərbaycan Avropanın keçmiş kommunist ölkələri arasında legitimlik əmsalı üzrə də lider mövqedən çıxış edir.

Portlend Dövlət Universitetinin siyasi elmlər üzrə dosenti Bryus Cilli "Hakimiyyət hüququ. Dövlət öz legitimliyini necə qazanır və itirir" adlı kitabında müəllif bu nəticəyə gəlib. Aparılan elmi təhlildən sonra Azərbaycanın Avropanın keçmiş kommunist ölkələri arasında hakimiyyətin legitimlik əmsalı üzrə liderlik etməsi faktı göstərilib. "Postkommunist Avropa" regional qrupunda Azərbaycan bu göstərici üzrə Mərkəzi və Şərqi Avropanın 21, eləcə də MDB-nin Avropa hissəsindəki bütün ölkələri (Rusiya, Ukrayna, Belarus, Moldova və Gürcüstanı) qabaqlayaraq birinci yeri tutur.

Ölkə rəhbərliyinin apardığı uğurlu iqtisadi siyasət nəticəsində Azərbaycanın dünyadakı mövqeləri möhkəmlənmiş və respublikamıza olan maraq artmışdır. Nüfuzlu beynəlxalq maliyyə qurumlarının son hesabatlarına diqqət yetirdikdə bir daha aydın olur ki, ölkə rəhbərliyinin müəyyənləşdirdiyi iqtisadi inkişaf xətti düzgündür və bu istiqamət daha böyük nailiyyətlərin əldə edilməsinə imkan yaradacaqdır.

E.HACIALIYEV

Azərbaycan.- 2009.- 4 avqust.- S. 4.