Leyla Şıxlinskayanın klinikası: uğurlu milli brend

Respublikamızın elə bir sakini tapılmaz ki, o, Leyla Şıxlinskayanın klinikası haqqında eşitməmiş olsun. Xalq arasında bu mərkəzi nəvazişlə "şıxlinka" adlandırırlar. Ölkəmizdə ilk çoxprofilli özəl klinika 10 illik çətin yol keçərək milli brendə çevrilmişdir. Bu gün klinika özünün ilk "dəyirmi" yubileyini - yaradılmasının 10 illiyini qeyd edir.

Tibbi mərkəzin rəhbəri Leyla Şıxlinskayanın sözlərinə görə, bu mərkəzin - ölkəmizdə ilk çoxprofilli özəl klinikanın açılması xalqımızın ümummilli lideri Heydər Əliyevin sayəsində mümkün olmuşdur. Bu da ölkə rəhbərinin milli səhiyyəmizin inkişafına diqqət və qayğısının göstəricisidir. Leyla Şıxlinskaya demişdir: "Biz bugünkü yubileyi Heydər Əliyevin xatirəsinə həsr edirik".

Fakt budur ki, klinikanın qazandığı uğurlar və tərəqqi onun "tibbi dəqiqliklə" hərtərəfli ölçülüb-biçilmiş fəaliyyətinin nəticəsidir.

Müasir səviyyəli tibbi müəssisələrdən nümunə götürən, ən mütərəqqi, ən yaxşı elmi axtarışlardan bəhrələnən klinika ən yeni avadanlıqlarla təchiz olunmuşdur. Burada fəaliyyət göstərən peşəkar kollektiv yüksək səviyyəli servis xidmətləri təqdim edir.

Klinikanın kollektivi on illik hesabat dövründə milli təbabətin inkişafına layiqli töhfələr vermişdir. Klinikanın mütəxəssisləri tərəfindən burada aparılmış onlarca nadir əməliyyat uğurla nəticələnmişdir. Fransa, Almaniya, Rusiya və Türkiyədən dəvət edilmiş dünya şöhrətli ən yaxşı mütəxəssislər də burada nümunəvi əməliyyatlar aparırlar. Daim inkişafda olan klinika müntəzəm olaraq öz avadanlıqlarını yeniləşdirir, burada dünya tibb elminin nailiyyətləri mənimsənilir və praktikada tətbiq edilir.

Klinikada müalicənin səmərəli, fəsadlar yaranması riskinin minimum, reabilitasiya müddətinin ən qısa olmasına zəmanət verilir. Burada həm yaşlılar, həm də uşaqlar üçün kompleks diaqnostika və müalicə (konservativ üsullarla və əməliyyat yolu ilə) imkanları yaradılmışdır.

...Klinika ilə tanışlıq qəbul şöbəsindən başlanır: gecə-gündüz fasiləsiz işləyən əlaqələndirmə xidmətinin ahəngdar fəaliyyəti lazımi sənədlərin rəsmiləşdirilməsinə və həkimlərdən məsləhət almağa sərf edilən vaxtı minimuma endirməyə imkan verir, əməkdaşların nəzakətli rəftarı isə tibbi müəssisələrə müraciət edən hər kəsin özündən asılı olmayaraq keçirdiyi narahatlığa son qoyur. Poliklinika şöbəsində 14 həkim kabineti var. Peşəkar mama-ginekoloqlar, stomatoloqlar, LOR və cərrahlar, endokrinoloq və terapevtlər hər gün ambulatoriya rejimində müalicə olunan pasiyentlərin xidmətindədirlər. Stasionar xidmət isə 12 bölmədən ibarətdir. Bura 5 əməliyyat zalı, 10 çarpayılıq 4 intensiv terapiya, 2 doğuş zalı, bölmələrdə 68 çarpayılıq 28 palata daxildir.

Məlumat üçün: ötən 10 ildə klinikada ölkəmizin 6000 körpə vətəndaşı dünyaya göz açmışdır, burada 12.540 uğurlu əməliyyat, 68.138-dən çox diaqnostik tədqiqat aparılmışdır. Klinikanın 300-dən çox işçisi var.

Klinikanın əməkdaşlarının əməyinə verilən ən yüksək qiymət isə yubiley ərəfəsində pasiyentlərdən alınan təşəkkür məktubları, bir də həmkarlarının, o cümlədən xarici ölkələrdəki həmkarlarının səmimi ürək sözləri, müsbət rəyləridir. Bakıda səfərdə olarkən bu klinikaya baş çəkmiş Türkiyənin keçmiş səhiyyə naziri Osman Durmuş ürək sözlərini belə ifadə etmişdir: "Leyla Şıxlinskayanın klinikasındakı sanitariya şəraiti nəinki Türkiyə standartlarına, hətta dünya standartlarına uyğundur".

S.Şıxəliyeva

Azərbaycan.- 2009.- 6 avqust.- S. 3.