Dağlıq Qarabağ münaqişəsi yalnız Azərbaycanın ərazi bütövlüyü çərçivəsində həllini tapa bilər

Müdafiə Nazirliyinin mətbuat xidmətindən bildirmişlər ki, bu fikir avqustun 7-də Azərbaycan Respublikasının müdafiə naziri, general-polkovnik Səfər Əbiyevin Pakistan İslam Respublikasının Hərbi Dəniz Qüvvələri Komandanı admiral Bəşir Nomanın başçılıq etdiyi nümayəndə heyəti ilə görüşdə səslənmişdir.

Qarşılıqlı fikir mübadiləsi şəraitində keçən görüşdə S.Əbiyev Pakistan ilə Azərbaycan arasında çoxşaxəli hərbi-siyasi əməkdaşlıq münasibətlərinə toxunaraq bu əlaqələrin gələcəkdə daha da genişlənəcəyini bildirmişdir. Pakistan-Azərbaycan əməkdaşlığının müdafiə sənayesi sahəsinə öz töhfəsini verdiyini qeyd edən S.Əbiyev Azərbaycan kimi Pakistanın da ərazi münaqişəsi ilə üzləşdiyini demişdir.

Admiral Bəşir Noman Ermənistan-Azərbaycan, Dağlıq Qarabağ münaqişəsi ilə bağlı ölkəsinin mövqeyini açıqlayaraq bildirmişdir ki, münaqişə yalnız Azərbaycanın ərazi bütövlüyü çərçivəsində həllini tapa bilər və bu məsələdə Pakistan hər zaman Azərbaycanın yanındadır.

Azərbaycan.- 2009.- 8 avqust.- S. 2.