Rusiya Qafqazda münaqişələrin həllinin tərəfdarıdır

Azərbaycan Prezidenti Administrasiyasının Xarici əlaqələr şöbəsinin müdiri Novruz Məmmədov demişdir ki, Rusiyanın Baş naziri Vladimir Putinin Türkiyəyə səfəri zamanı Dağlıq Qarabağ probleminin həlli ilə əlaqədar səsləndirdiyi fikirlər əhəmiyyətlidir. Bu fakt göstərir ki, Rusiya Qafqazda münaqişələrin həllinin tərəfdarıdır.

N.Məmmədov bildirmişdir ki, ümumiyyətlə, Cənubi Qafqaz özünün geostrateji mövqeyinə görə dünyanın aparıcı dövlətlərinin diqqətindədir. Bu baxımdan Putinin "Rusiya Qafqazda münaqişələrin həllinin tərəfdarıdır. Çünki münaqişələr bizim bölgə ölkələri ilə əməkdaşlığımıza mənfi təsir göstərir" fikri başadüşüləndir. Onun sözlərinə görə, dünyanın aparıcı dövlətləri öz maraqları naminə də bu regionda sabitliyin olmasını istəyirlər.

"Amma təəssüf ki, bəlkə də, həmin dövlətlərin maraqları səbəbindən bölgədə münaqişələr yaranmışdır və davam edir. Qeyd etmək lazımdır ki, Ermənistan-Azərbaycan, Dağlıq Qarabağ münaqişəsinin həllində tərəflərin özünəməxsus mövqeyi də vardır. Azərbaycanın səyləri ondan ibarətdir ki, bu maraqlar bir-birinə uyğunlaşdırılsın və problem ölkəmizin dövlətçilik və milli maraqlarına uyğun şəkildə həll edilsin",- deyə şöbə müdiri vurğulamışıdr.

N.Məmmədovun fikrincə, böyük dövlətlərin Dağlıq Qarabağ probleminin həllində maraqlı olduğu artıq özünü göstərir. Ona görə də Ermənistan tərəfinə təzyiqlər artır.

AzərTAc

Azərbaycan.- 2009.- 9 avqust.- S. 1.