Mətyu Brayzə: "Ermənistan Dağlıq Qarabağa bitişik yeddi rayonu Azərbaycana qaytarmalıdır"

Ermənistan Dağlıq Qarabağa bitişik yeddi rayonu Azərbaycana qaytarmalıdır. Bu fikri avqustun 7-də Ermənistanda səfərdə olan ATƏT-in Minsk qrupunun həmsədri Mətyu Brayzə söyləmişdir.

M.Brayzə vurğulamışdır ki, beş rayon dərhal, iki rayon isə müəyyən vaxt ərzində qaytarılmalıdır. Bu vaxt beş ilədək uzana bilər. Həmçinin münaqişə zonasına beynəlxalq sülhməramlı qüvvələr yerləşdirilməlidir. Onların tərkibini tərəflərin özləri müəyyənləşdirəcəklər.

Münaqişənin həlli variantının mümkünlüyü baradə danışan amerikalı diplomat bəyan etmişdir ki, Madrid sənədinə əsasən Dağlıq Qarabağ əhalisinin təhlükəsizliyi təmin edilməli, referendum keçirilənədək isə müvəqqəti status yaradılmalıdır.

Onun sözlərinə görə, Dağlıq Qarabağ münaqişəsi üç əsas prinsip - ərazi bütövlüyü, öz müqəddəratını təyinetmə və gücün tətbiq edilməməsi əsasında həll olunacaqdır.

AzərTAc

Azərbaycan.- 2009.- 9 avqust.- S. 1.