Qurban Qurbanov: "Azərbaycan Prezidentinin diqqət və qayğısı bizi yeni qələbələrə ruhlandırır"

Xəbər verdiyimiz kimi, Ağdamın "Qarabağ" futbol klubu Avropa Liqasının pley-off mərhələsinə vəsiqə qazanmışdır.

Bu tarixi nailiyyət həm də onunla əhəmiyyətlidir ki, "Qarabağ" mötəbər yarışlarda iki mərhələ adlamış ilk Azərbaycan komandasıdır.

Dünən Ağdam klubunun baş məşqçisi Qurban Qurbanovla görüşüb oxucularımızı maraqlandıran sualları cavablandırmasını xahiş etdik.

- "Qarabağ"ın qazandığı uğur tək idmansevərlərin deyil, bütün xalqımızın sevincinə səbəb olmuşdur. Bu münasibətlə Azərbaycan Prezidenti cənab İlham Əliyev sizinlə telefon əlaqəsi saxlayıb. İndi hansı hisslər keçirirsinz?

- Açığı, cənab Prezidentin zəngi mənim üçün gözlənilməz oldu. Çox səmimi, gözəl söhbət alındı. Dövlət başçısı bildirdi ki, komandanın oyunlarını izləmiş və hər iki görüşdə güclü rəqibə qarşı layiqli mübarizə apardığımızın şahidi olmuşdur. "Qarabağ" adı çox böyük məsuliyyət tələb edir. Qazandığınız uğur bu gün Azərbaycan futbolunda ən böyük nailiyyətdir. Sizə gələcək oyunlarda da uğurlar arzulayıram". Mən cənab Prezidentin idmançılarla səmimi ünsiyyətdə olduğunu çox eşitmişdim, özüm də bunun şahidi oldum. Bu diqqət və qayğı hamımıza bir ismarıcdır. Çalışacağıq bundan sonra da xalqımızı layiq olduğumuz daha böyük uğurlarla sevindirək. Möhtərəm Prezident İlham Əliyevlə söhbət qəlbimdə silinməz hisslər yaratdı. Bu diqqət və qayğı bizi daha böyük fədakarlığa sövq edir, yeni qələbələrə ruhlandırır.

- "Qarabağ"ın heyətində əsasən azərbaycanlı futbolçular çıxış edir. Bu, klub rəhbərliyinin siyasətidir, yoxsa maliyyə vəziyyəti ilə bağlıdır?

- Klubumuzda maliyyə problemi yoxdur. Qarşımıza iki-üç ilə güclü kollektiv yaratmaq məqsədi qoyulmuşdur. Bunun üçün klubumuza gənc və perspektivli idmançılar cəlb edilmişdir. Bunların arasında milli komandamızın üzvləri Elvin Məmmədov, Vüqar Nadirov da var. Qeyd edim ki, komandada 19-22 yaş arasında 6 oyunçu iştirak edir. 3-4 təcrübəli oyunçu istisna olmaqla gələcəkdə də gənc və perspektivli azərbaycanlı futbolçulara üstünlük verəcəyik.

- Komandanın bazası, stadionu, uşaq-gənclər məktəbinin vəziyyəti necədir?

- Suraxanı qəsəbəsində yerləşən stadionu icarəyə götürmüşük. Bundan əlavə, Ağdamın Quzanlı qəsəbəsində yerləşən meydança da bizim ixtiyarımızdadır. Çempionatın oyunlarını hər iki stadionda keçirməyi planlaşdırırıq.

"Şəfa" stadionunda uşaq futbol komandamız türkiyəli mütəxəssisin başçılığı ilə məşqlər edir. Burada 40-50 uşaq və yeniyetmə futbolun sirlərinə yiyələnir. Fəaliyyətimizə maneə törədən amil bazamızın olmamasıdır. Ancaq klub rəhbərliyi yaxın vaxtlarda yeni inşa olunacaq bazanın layihəsini artıq hazırlamışdır.

- Bu qələbələrdən sonra siz özünüzü peşəkar məşqçi hesab edirsinizmi, yoxsa hələ öyrəniləsi sirlər coxdur?

- Mən özümü peşəkar işçi hesab edirəm. Peşəkar məşqçi olmaq üçün isə hələ öyrəniləsi şey çoxdur. Futbol elə idman növüdür ki, həmişə hansısa yeniliyi görüb-götürməlisən. Əvvəllər tanınmış klublarda praktika keçmişəm. Bundan sonra da təcrübəli mütəxəssislərin yanında qısamüddətli kurslar keçməyi planlaşdırıram.

- Avropa liqasının pley-off mərhələsində "Qarabağ"ın rəqibi Hollandiyanın məşhur "Tvente" klubudur. Bu görüşlər ərəfəsində komandanın yeni oyunçularla gücləndirilməsi gözlənilirmi?

- Yeni oyunçular gətirmək fikrimiz yoxdur. Lakin buna baxmayaraq, etiraf etməliyəm ki, hər bir klubda olduğu kimi, bizim də bir-iki səviyyəli oyunçuya ehtiyacımız var. Onu da qeyd edim ki, Rəşad Sadıqov Türkiyədə qalmalı olsa da, keçirdiyimiz oyunlarda bizə böyük kömək etdi. Buna görə ona təşəkkür edirəm. İstərdim ki, o, klubumuzda çıxışlarını davam etdirsin. Eyni zamanda, əgər hansısa tanınmış klubdan dəvət alsa, biz Rəşada mane olmayacağıq. Sadıqovun "Qarabağ"da qalıb-qalmayacağı millimizin avqustun 12-də Almaniya yığmasına qarşı keçirdiyi oyundan sonra bəlli olacaq.

- "Qarabağ"ın hər uğuru Qarabağın düşmənlərdən azad edilməsi yolunda bir addımdır. Hər qələbə Avropada və dünyada Qarabağın, həqiqətən, kimin vətəni, torpağı olduğunu bir daha sübut edir. Şübhə etmirik ki, bunu komanda rəhbərliyi və oyunçular da gözəl anlayır...

- Əvvəl də bildirdiyim kimi, Qarabağ adı bizdən çox böyük məsuliyyət tələb edir. Xüsusilə də hazırkı dönəmdə. Artıq dördüncü dəfədir ki, Avropanın mərkəzində - İsveçrədə bütün dünyaya canlı yayımlanan püşkatma mərasimində Azərbaycanın "Qarabağ" komandasının adı səslənir. Hər bir toplantıda biz bu mövzunu müzakirə edirik. Klubumuzun bütün üzvləri hansı məsuliyyəti daşıdığını gözəl anlayır. Əməyimizi qiymətləndirdiyinə və bizim çıxışlarımız üçün hər cür şərait yaratdığına görə komandamızın rəhbərliyinə minnətdarlıq edirəm. Fürsətdən istifadə edib komanda üzvlərinin adından bildirirəm ki, qarşımıza çıxan rəqibin adından və gücündən asılı olmayaraq, bundan sonra da bütün oyunlarda fədakarlıqla çıxış edərək xalqımızı yeni qələbələrlə sevindirmək üçün əlimizdən gələni əsirgəməyəcəyik.

Rizvan HİLALOĞLU

Azərbaycan.- 2009.- 9 avqust.- S. 5.