Naxçıvan Muxtar Respublikası Ali Məclisində görüş

Naxçıvan MR Ali Məclisinin Sədri Vasif Talıbov Türkiyə Respublikasının enerji və təbii ehtiyatlar naziri Taner Yıldızla görüşmüşdür.

Qonağı Naxçıvanda salamlamaqdan məmnunluğunu ifadə edən Ali Məclisin Sədri muxtar respublikanın statusu, coğrafi mövqeyi, iqtisadiyyatı, elm və təhsil müəssisələri haqqında məlumat vermişdir.

Qeyd olunmuşdur ki, Türkiyə ilə Azərbaycanın yeganə quru sərhədi Naxçıvan Muxtar Respublikasında yerləşir. 1992-ci il may ayının 28-də, ulu öndərimiz Heydər Əliyev Naxçıvan Muxtar Respublikası Ali Məclisinin Sədri işlədiyi dövrdə Türkiyənin Baş naziri Süleyman Dəmirəllə birgə Sədərək-Dilucu körpüsünü açmışlar. O zamandan bəri bu körpü bir millət, iki dövlətə xidmət edir. Həmin dövrdə, eyni zamanda, 92 kilometr İğdır-Naxçıvan elektrik xətti çəkilmiş, Naxçıvana elektrik enerjisi verilməyə başlanmış, nəqliyyat əlaqələri genişlənmişdir. Hazırda hər gün 10-12 sərnişin avtobusu Naxçıvandan Türkiyəyə gedir, 50-yə yaxın taksi Türkiyə ilə Naxçıvan arasında nəqliyyat xidməti göstərir. Türkiyə-Asiya-Avropa fiberoptik kabel magistralının İran ərazisindən keçməklə Bakı-Naxçıvan seqmenti tamamlanmış, 2007-ci ildə Naxçıvan Muxtar Respublikası ərazisində 134 kilometrlik yüksək ötürücülük qabiliyyətinə malik fiberoptik kabel çəkilərək İran və Türkiyə şəbəkələrinə birləşdirilmişdir. Bu, iqtisadi əlaqələrin daha da inkişaf etdirilməsində, sahibkarlıq fəaliyyətinin genişləndirilməsində mühüm əhəmiyyət kəsb edir. Naxçıvan Muxtar Respublikasında Türkiyədən 46 sahibkar fəaliyyət göstərir və öz ətrafında 532 türk vətəndaşını birləşdirir. Onlardan 62 nəfəri öz ailəsi ilə birlikdə Naxçıvanda yaşayır.

Vurğulanmışdır ki, Naxçıvanın ağır günlərində Türkiyə tərəfindən bölgəyə hər gün 40-50 meqavat enerji verilirdi. Bu gün isə Naxçıvandan Türkiyəyə hər gün 16-17 meqavat elektrik enerjisi ötürülür. Elektrik enerjisinin ixracına başlanandan bu il avqustun 1-dək Türkiyəyə verilən enerjinin həcmi 167 milyon kilovat-saatdan çoxdur. Enerji verilişi davam etdirilir. Gələcək illərdə onun həcmi daha da artırılacaqdır. Ticarət əlaqələrimiz ildən-ilə artır. Cari ilin 6 ayı ərzində 32 milyon dollarlıq ticarət dövriyyəmiz olmuşdur. Ötən 6 ayda Türkiyədən Naxçıvana 22 min, Naxçıvandan isə Türkiyəyə 23 min nəfər gedib-gəlmişdir.

Qeyd edilmişdir ki, təhsil sahəsində də yaxşı əlaqələrimiz vardır. Naxçıvanda 3 türk liseyi fəaliyyət göstərir. Ordubad qız liseyində 150, Naxçıvanda və Şərur türk liseylərində isə 503 şagird təhsil alır. Şagirdlərin təhsili ilə 70 müəllim məşğul olur ki, onlardan 31-i Türkiyə vətəndaşıdır. Naxçıvan Dövlət Unversitetində 210 türkiyəli tələbə, Türkiyənin ali məktəblərində isə 156 naxçıvanlı gənc təhsil alır.

Qarşılıqlı əlaqələrimiz getdikcə inkişaf edir. Bu da ulu öndərimizin söylədiyi "Bir millət, iki dövlət", böyük Atatürkün dediyi "Azərbaycanın sevinci bizim sevincimiz, kədəri bizim kədərimizdir" deyimlərindən qaynaqlanır. Bu gün də hər iki ölkənin rəhbərləri bu prinsipləri fəaliyyətlərində əsas tutaraq Türkiyə-Azərbaycan əlaqələrinin möhkəmləndirilməsinə xidmət edirlər. Nəticədə qısa müddət ərzində 1773 kilometrlik Bakı-Tbilisi-Ceyhan neft, 970 kilometrlik Bakı-Tbilisi-Ərzurum qaz kəmərləri işə düşmüşdür, 800 kilometr uzunluğunda Bakı-Tbilisi-Qars dəmiryolunun tikintisi davam etdirilir və digər tədbirlər həyata keçirilir. Ən əsası isə 2008-ci il iyunun 4-də Türkiyənin Baş naziri Rəcəb Tayyib Ərdoğanın Naxçıvana səfəri, burada Azərbaycan Prezidenti İlham Əliyev ilə görüşləri, əldə olunan razılaşmalar, qarşılıqlı anlaşmalardır ki, bu da Azərbaycan-Türkiyə və Azərbaycanın Naxçıvan Muxtar Respublikası ilə Türkiyənin əlaqələrinin daha da genişləndirilməsində yeni mərhələ açmışdır.

Türkiyənin enerji və təbii ehtiyatlar naziri Taner Yıldız səmimi qəbula görə minnətdarlığını bildirmişdir.

Görüşdə qarşılıqlı maraq doğuran bir sıra məsələlər müzakirə edilmişdir.

Türkiyənin Azərbaycandakı səfiri Hülusi Kılıç və Azərbaycan Respublikası Dövlət Neft Şirkətinin prezidenti Rövnəq Abdullayev görüşdə iştirak etmişlər.

AzərTAc

Azərbaycan.- 2009.- 11 avqust.- S. 4.