Latviya Prezidenti Valdis Zatlers Azərbaycanın Baş naziri Artur Rasizadə ilə görüşmüşdür

Azərbaycanda səfərdə olan Latviya Prezidenti Valdis Zatlers avqustun 11-də onun üçün ayrılmış iqamətgahda ölkəmizin Baş naziri Artur Rasizadə ilə görüşmüşdür.

Latviya dövlətinin başçısı bu səfəri çərçivəsində Azərbaycan Prezidenti İlham Əliyev ilə aparılmış danışıqları yüksək qiymətləndirərək vurğulamışdır ki, həmin danışıqlar bütün sahələrdə ikitərəfli əlaqələrin genişlənməsinə xidmət edəcəkdir. Prezident Valdis Zatlers iqtisadi sahədə Latviya-Azərbaycan əməkdaşlığının perspektivlərindən bəhs edərək, səfər zamanı imzalanmış ikitərəfli sənədlərin qarşılıqlı faydalı münasibətlərin daha da inkişaf etdirilməsi üçün əhəmiyyətini vurğulamışdır.

Baş nazir Artur Rasizadə Prezident Valdis Zatlersə son illərdə Azərbaycanda həyata keçirilmiş iqtisadi islahatlar barədə məlumat vermişdir. O əmin olduğunu bildirmişdir ki, Latviya dövlətinin başçısının Azərbaycana rəsmi səfəri iki ölkə arasında iqtisadi əməkdaşlığın dərinləşməsinə təkan verəcəkdir.

AzərTAc

Azərbaycan.- 2009.- 12 avqust.- S. 2.