Milli Məclisdə türkiyəli gənclərlə görüş keçirildi

Avqustun 11-də ölkəmizdə səfərdə olan Türkiyənin Karabük şəhər Gənclər Mərkəzinin bir qrup üzvü Milli Məclisdə olub. "Heydər Əliyev" xatirə zalı və Milli Məclisin iclas zalı ilə tanışlıqdan sonra qonaqlar parlamentin Sosial siyasət komitəsinin üzvləri ilə görüşüblər. Komitənin sədri Hadi Rəcəbli Milli Məclisin fəaliyyəti, qanun yaradıcılığı, ölkəmizdə həyata keçirilən gənclər siyasəti, uşaq və gənclər, eləcə də gənc ailələr ilə bağlı qəbul olunmuş qanunlar barədə qonaqlara ətraflı məlumat verib. Bildirilib ki, Azərbaycan dövləti gənclərə daim diqqət və qayğı göstərir. Bu gün Azərbaycanda mövcud olan 40 mindən çox məktəbin 20 mindən çoxu yaxın illər ərzində əsaslı təmir olunmuş, yeni məktəb binaları tikilmiş, təhsil ocaqları müasir avadanlıq və kompüterlə təmin olunmuşdur. Gənclərin asudə vaxtlarının səmərəli təşkili, ölkədə idmanın inkişafı da daim diqqət mərkəzindədir. Son bir neçə il ərzində ölkəmizdə 19 idman kompleksi, gənclər üçün təlim məşq meydançaları tikilib istifadəyə verilmişdir. Bu gün Azərbaycanda 80-dən çox gənclər təşkilatı var ki, onların da hamısı normal fəaliyyət göstərirlər.

Görüşdə nümayəndə heyətinin rəhbəri Ayxan Çağ deyib ki, türkiyəli gənclərin səfərinin əsas məqsədi azərbaycanlı gənclərlə əlaqələri inkişaf etdirməkdir. Bu gün Türkiyənin 81 bölgəsindən gənclər təşkilatları qardaş Azərbaycan gəncləri ilə dostluq etmək niyyətindədirlər.

Görüşdə, xüsusilə vurğulanıb ki, gənclər arasında əlaqələrin inkişafı həm də Azərbaycan-Türkiyə qardaşlığının daha da möhkəmlənməsinə xidmət edir. Bu birlik ortaq problemlərimizin, xüsusən də erməni terroru və təcavüzünün qarşısının alınmasında və həllində, əsl həqiqətlərin dünya ictimaiyyətinə çatdırılmasında mühüm əhəmiyyət kəsb edir.

Türkiyəli gənclərin Azərbaycana səfəri "İRƏLİ" İctimai Birliyinin həyata keçirdiyi "Türkiyə-Azərbaycan gəncləri dostluq düşərgəsi" layihəsi çərçivəsində baş tutmuşdur. Onlar avqustun 12-də Lənkərana gedəcək, bölgə ilə yaxından tanış olacaqlar.

Azərbaycan.- 2009.- 12 avqust.- S. 3.