"Artromed" tibb mərkəzində yeni səhiyyə xidmətləri təklif olunur

Dinamik templə inkişaf etməkdə olan Azərbaycanda sosial məsələlərin həllinə dövlət tərəfindən daim xüsusi diqqət yetirilməkdədir. Bu məqsədlə proqramlar həyata keçirilməkdə, ən müasir tələblərə cavab verən sosial infrastruktur yaradılmaqdadır.

Səhiyyə sisteminin inkişafı xüsusi diqqət mərkəzindədir

Sosial sahədə diqqəti cəlb edən məqamlardan biri də ölkəmizdə yeni səhiyyə obyektlərinin inşa olunmasıdır. Həm dövlət, həm də Heydər Əliyev Fondu tərəfindən görülən məqsədyönlü işlər sayəsində Azərbaycanda müasir texnologiyalarla təchiz edilmiş səhiyyə obyektlərinin inşası isə əhaliyə səhiyyə xidmətinin daha da yüksəldilməsində, əvvəllər yalnız xaricdə müalicəsi mümkün olan bir çox xəstəliklərin artıq ölkəmizdə də uğurla dəf edilməsində mühüm rol oynamışdır. Özü də müasir standartlara cavab verən səhiyyə müəssisələri təkcə paytaxt Bakıda yox, ölkəmizin müxtəlif regionlarında da tikilib istifadəyə verilmişdir. Buna misal olaraq Bərdə Diaqnostik Mərkəzini, Göygöl Rayon Mərkəzi Xəstəxanasını, Naxçıvanda yeni inşa olunmuş doğum mərkəzini və digərlərini göstərmək olar.

Bütün bunlar bir daha göstərir ki, Azərbaycanda səhiyyənin inkişafı, onun maddi-texniki bazasının gücləndirilməsi daim diqqət mərkəzində saxlanılır. Prezident İlham Əliyevin təşəbbüsü ilə bu sahədə həyata keçirilən tədbirlər Azərbaycan səhiyyəsinin işinin daha yaxşı təşkilinə geniş imkanlar açıb. Xatırladaq ki, hələ ötən il Prezident İlham Əliyev "Azərbaycan Respublikasında səhiyyənin maliyyələşdirilməsi sisteminin islahatı və icbari tibbi sığortanın tətbiqi Konsepsiyası"nın təsdiq edilməsi haqqında sərəncam imzalayıb. Sərəncama əsasən, ölkədə səhiyyə sisteminin maliyyələşdirilməsinin yeni iqtisadi əsasları yaradılmış, bu sahənin idarə olunması daha da təkmilləşdirilmiş, əhaliyə göstərilən tibbi xidmətin keyfiyyəti daha da yaxşılaşdırılmışdır. Həmçinin ölkəmizdə səhiyyə sisteminin yenidən qurulmasını, əhalinin sağlamlığının daha yaxşı təşkilini, bu sahəyə yeni, müasir tibb avadanlıqlarının tətbiqini və yeni kadr potensialının hazırlanmasını özündə əks etdirən dövlət proqramları tibbi xidmətin səviyyəsini də yüksəldib.

Bronxial astmanın duzla müalicəsi

Azərbaycanda səhiyyənin sürətlə inkişafında vacib məqamlardan biri də bu sahədə özəl sektorun fəaliyyəti üçün müvafiq şəraitin yaradılması və onlara verilən dəstəkdir. Elə bunun nəticəsidir ki, özəl tibb müəssisələrinin də xüsusi çəkisi artmaqda və onlar tərəfindən əhaliyə yüksək tibbi xidmətlər təklif olunmaqdadır.

Belə səhiyyə obyektlərindən biri olan "Artromed" tibb mərkəzi isə əhaliyə göstərilən xidmət növlərində imza atdığı bir sıra yeniliklərə görə fərqlənir. Bu tibb mərkəzi yenicə istifadəyə verilməsinə baxmayaraq, artıq əhali arasında yaxşı tanınır və bunu sözügedən müəssisəyə müraciət edənlərin sayının kifayət qədər çox olması da təsdiqləyir.

Tibb mərkəzinin açılışı cari il iyunun 1-də, yəni uşaqların beynəlxalq müdafiəsi günündə baş tutub ki, bu da təsadüfi deyil. "Artromed" tibb mərkəzinin baş həkimi Elçin Kazımovun sözlərinə görə, bu səhiyyə obyektində göstərilən xidmətin bir çoxu bilavasitə uşaqlara yönəldilib. Uşaqlarda bronxial astma ilə əlaqədar yaranan problemlər, astmatik komponentlər, uşaq əyripəncəliyinin müalicəsi, uşaq onurğa sütunun stabilləşməsi və s. ilə bağlı məhz bu tibb mərkəzində yüksək xidmət təklif olunur. Elə bu səbəbdən də "Artromed" tibb mərkəzinin açılışı uşaqların beynəlxalq müdafiəsi günündə həyata keçirilib.

Xətai rayonu, Gəncə prospekti 34 ünvanında yerləşən bu tibb mərkəzinə daxil olarkən diqqəti ilk cəlb edən ümummilli lider Heydər Əliyevin büstünün qoyulduğu müasir zövqlə bəzədilmiş foyedir. Buradakı səliqə-sahman, mərkəzə müracəit edənlərin rahatlığı üçün yaradılan şərait elə ilk baxışda xidmətin səviyyəsinin yüksək olmasından xəbər verir. Mərkəzin müxtəlif təyinatlı tibb otaqları da yüksək səviyyədədir və müasir tibbi avadanlıqlarla təchiz olunmuşdur.

Elçin Kazımov qeyd etdi ki, tibb mərkəzinin açılışı zamanı onları maraqlandıran əsas məqamlardan biri əhaliyə yeni növ xidmətlərin göstərilməsi olub. Bu istiqamətdə görülən işlər sayəsində isə "Artromed" tibb mərkəzi indiyə qədər ölkəmizdə göstərilən səhiyyə xidmətləri sırasına bəzi yeniliklər də əlavə edib. Bunun nəticəsidir ki, onurğa ilə bağlı bütün problemlərin həll edilməsi üçün "Artromed" tibb mərkəzində hər cür şərait yaradılıb və müvafiq avadanlıqlar quraşdırılıb. Mərkəzdə quraşdırılmış balans aparatı vasitəsilə onurğa sütununda yaranan bütün problemlər kompüterdə tam aşkar olunur.

Bronxial-astma və allergik xəstəliklərin müalicəsi məqsədilə də bu tibb mərkəzində yeni metoddan istifadə olunur. Bunun üçün Avstriya texnologiyası əsasında xüsusi duz otağı yaradılıb. Otağın döşəməsi Naxçıvandan gətirilən duzla örtülüb, divarlara yenə də təbii duzdan hazırlanan plitələr döşənib. Duz otağında bir müalicə seansı 40 dəqiqə çəkir. Həmin müddət ərzində xəstənin vaxtını xoş keçirməsi üçün otaqda televizor da quraşdırılıb. Kənarda quraşdırılan aparat vasitəsilə Avstriyadan gətirilən duzlar xəstənin olduğu otaqda hava vasitəsilə dövr etməyə başlayır və beləliklə, xəstə duzla nəfəs alır. Belə müalicə üsulu isə bronxial-astma xəstəliklərinin aradan qaldırılmasında mühüm rol oynayır.

Allergik xəstəliklərin müalicəsi üçün hidrokolonoterapiyadan da geniş istifadə olunur. Həmçinin bağırsaq xəstəliklərinin müalicəsi, bağırsaqların təmizlənməsi üçün burada yüksək tibbi xidmət göstərilir.

Yuxu laboratoriyası, möcüzəli Şərq Rəsul hamamı

Tibb mərkəzində tətbiq olunan yeniliklərdən biri də yuxu laboratoriyasıdır. Təcrübə təsdiq edir ki, bir sıra xəstəliklərin gündüz vaxtı və ya xəstənin həkimə müraciəti zamanı yaşadığı həyəcan, gərginlik və digər səbəblər üzündən yaşadığı xəstəliyin dəqiq diaqnozunun təyin edilməsində çətinliklər meydana çıxır. Lakin xəstə yuxuda olarkən onun beyin, ürək, qan-damar, əzələ sisteminin funksiyaları sərbəst vəziyyətdə öyrənilir və bu zaman mövcud problemlər daha dəqiq və asanlıqla müəyyən olunur. Bu mənada yenilik kimi tətbiq olunan yuxu laboratoriyası xəstəliklərin aşkar edilməsində mühüm rol oynayır. Özü də burada xəstə hər hansı yuxugətirici dərman vasitəsilə yox, təbii şəkildə yuxuya gedir və bunun üçün yuxu laboratoriyasında müvafiq şərait yaradılıb.

Artıq çəkidən xilas olmaq istəyənlər, həmçinin sümük-əzələ sistemində yaranan problemlərdən əziyyət çəkənlər də "Artromed" tibb mərkəzinə müraciət edə bilərlər. Bu məqsədlə tibb mərkəzində quraşdırılan termovanna özəlliyi ilə xüsusi diqqət cəlb edir. Belə ki, içərisində nə su, nə də digər maye olmamasına baxmayaraq, bu termovannada arıqlamaq, eləcə də sümük-əzələ sistemində yaranan problemlərdən xilas olmaq üçün lazımi proseduru almaq mümkündür.

Əsəb, gərginlik, sinir sistemi, oynaq xəstəlikləri və orqanizmdə digər problemlərin aradan qaldırılması, bədənin yumşalması, hətta astmanın müalicəsi üçün burada xüsusi quraşdırılmış Şərq Rəsul hamamı ilk baxışda əsl Şərq nağıllarını xatırladır. Burada yaradılan fonu izləyərkən bir anlığa özünü Şərq ölkələrində, Şərq ecazkarlığında hiss edirsən. Tavanda ulduz şəklində düzülmüş işıqlar hamama xüsusi gözəllik verir. Şərq üslubunda inşa edilən hamamda xüsusi düzəldilmiş yerdə yandırılan təbii otlardan çıxan müalicəvi xarakterli tüstü və buxar bütün hamamı bürüyür. Hər dörd dəqiqədən bir buxar avtomatik olaraq öz-özünə dəyişir. Bununla yanaşı, xəstənin üstünə müəyyən müalicəvi palçıq da çəkilir. 16 dəqiqə sonra isə hamamda quraşdırılan xüsusi şırnaqlardan müalicə olunan şəxsin üzərinə sanki tropik yağış yağır və xəstənin üzərindəki palçıq tam yuyulur.

Saç tökülməsinin səbəbləri kompüter diaqnostikası ilə öyrənilir

Keçirilmiş insultların qalıqlarının müalicəsi üçün müxtəlif mexanoterapiya, fizioterapiya üçün də tibb mərkəzində müasir avadanlıqlar quraşdırılıb və yüksək səviyyədə masaj xidməti göstərilir.
Manual terapiyaya isə Azərbaycanda ilk dəfə olaraq hazırda "Artromed" tibb mərkəzinin baş həkimi kimi fəaliyyət göstərən Elçin Kazımov başlayıb. 1986-cı ildən belə terapiyaya başladığını bildirən baş həkim xəstələrin istəyinə uyğun olaraq manual terapiyadan istifadə olunduğunu qeyd edir.

Baş həkimin müavini Çinarə xanımın sözlərinə görə, saçların tökülməsinin qarşısını almaq və yaranan problemləri həll etmək məqsədilə tibb mərkəzi xüsusi kompüter avadanlığı alıb. Burada müasir texnologiyanın köməyilə xəstənin saç qatlarında, baş dərisində yaranan problemlər aşkar olunur. Kompüter vasitəsilə həmin xəstəliyin diaqnostikası və hansı səbəblərdən yaranması müəyyən olunur. Xəstələrdə hormonal dəyişikliklərlə bağlı saç tökülməsi və ya saçın dibində müxtəlif yaraların əmələ gəlməsi kimi xəstəliklər də mezoterapiya vasitəsilə aradan qaldırılır və hələlik bu müalicə üsulu yalnız "Artromed" tibb mərkəzində tətbiq olunur.

Tibb mərkəzində müasir laboratoriya, rəqəmsal rentgen, ultrasəs müayinəsi və rəngli doppler, arıqlama aparatları (kavitasion və ultrabuxarlanma), lazer akupunkturası, bağırsaq xəstəliklərinin müalicəsi üçün termatur aparatı, dartma aparatları mövcuddur. Mərkəzdəki müasir lor stansiyası isə burun, qulaq və boğazda gözlə görünməyən nöqtələri də izləməyə imkan verir. Mərkəzdə müasir standartlar əsasında digər növ yüksək tibbi xidmətlər də həyata keçirilir.

Tibb mərkəzində kadr heyətinin hazırlıq səviyyəsinə də xüsusi diqqət yetirilir. Burada xarici ölkələrdə təhsil alan və təcrübə keçən kadrlar çalışmaqdadır. Tibb mərkəzində əhaliyə göstərilən yüksək tibbi xidmətin qiymətləri də münasibdir. Elə bu səbəbdəndir ki, "Artromed" tibb mərkəzinə müraciət edənlərin sayı artmaqdadır.

Rasim BAYRAMOV

Azərbaycan.- 2009.- 12 avqust.- S. 5.