Azərbaycan ilə Almaniyanın Baden-Vürtemberq federal torpağı arasında əməkdaşlıq genişlənir

Xarici İşlər Nazirliyinin mətbuat xidmətindən bildirmişlər ki, avqustun 12-də nazir Elmar Məmmədyarov ölkəmizdə səfərdə olan Almaniyanın Baden-Vürtemberq federal torpağının Baş naziri Günter Oettingerin başçılıq etdiyi nümayəndə heyəti ilə görüşmüşdür.

Tərəflər ilk növbədə iki il əvvəl Azərbaycan Prezidenti İlham Əliyevin Almaniyaya rəsmi səfəri çərçivəsində Baden-Vürtemberqdə keçirilmiş görüşlərlə bağlı xatirələrini bölüşmüş və bunu Azərbaycan ilə Baden-Vürtemberq arasında əməkdaşlığın inkişafına təkan verən əsas amil kimi səciyyələndirmişlər.

Azərbaycana səfərindən məmnunluğunu bildirən qonaq Baden-Vürtemberq federal torpağının ölkəmizlə əlaqələrin inkişafında maraqlı olduğunu və bu istiqamətdə geniş imkanların mövcudluğunu qeyd etmişdir. G.Oettinger əlaqələrin daha da inkişaf etdirilməsi məqsədi ilə bir sıra layihələrin həyata keçirilməsinin vacibliyini, həmçinin azərbaycanlı tələbələrin Baden-Vürtemberqin ali məktəblərində təhsil almaları üçün şərait yaradılmasının mümkünlüyünü qeyd etmiş, habelə Baden-Vürtemberqin Azərbaycanda mədəniyyət günlərinin təşkilinin münasibətlərin dərinləşməsində əhəmiyyətini vurğulamışdır.

Nazir Elmar Məmmədyarov bu marağın qarşılıqlı olduğunu bildirmiş, əlaqələrin daha da dərinləşməsi üçün konkret layihələrin həyata keçirilməsinin vacibliyi fikrini bölüşdüyünü qeyd etmişdir. Mədəniyyət tədbirlərinin xalqlararası təmasların möhkəmlənməsində əhəmiyyətini vurğulayan E.Məmmədyarov Azərbaycanda və Almaniyada qarşılıqlı mədəniyyət günlərinin keçirilməsinin davamı olaraq növbəti ildə ölkəmizdə Baden-Vürtemberqin mədəniyyət günlərinin təşklinin bu federal torpağın respublikamızda təbliği istiqamətində faydalı olacağını bildirmişdir.

Görüşdə həmçinin Azərbaycan ilə Baden-Vürtemberq arasında iqtisadi, ticarət, investisiya layihələrinin həyata keçirilməsi, habelə mədəniyyət, turizm, elm və texnologiya sahələrində əməkdaşlığın genişləndirilməsi ilə bağlı ətraflı fikir mübadiləsi aparılmışdır.

AzərTAc

Azərbaycan.- 2009.- 13 avqust.- S. 4.