Göygöl rayonunun 190
illiyi ilə əlaqədar "Şəhər
günü" keçirilmişdir. 1819-cu ildə buraya
sürgün edilmiş almanlar tərəfindən əsası
qoyulmuş rayonun yubiley şənliklərində Azərbaycanda
səfərdə olan Almaniyanın Baden-Vürtemberq federal
torpağının Baş naziri Günter Oettingerin
başçılığı ilə Almaniya nümayəndə
heyəti də iştirak etmişdir.
Sinələrini yubiley
nişanları bəzəyən şəhər ictimaiyyətinin
nümayəndələri tərəfindən qonaqpərvərliklə
qarşılanan almaniyalı qonaqlar əvvəlcə
almanların vaxtilə yaşadıqları Hummel küçəsindəki
mədəniyyət və istirahət parkına gəlmişlər.
Burada almaniyalı akkardeon çalanların
çıxışlarını dinlədikdən sonra
parkı gəzən qonaqlara bu istirahət guşəsində
fəaliyyət göstərən "Gənclər evi"
barədə ətraflı məlumat verilmişdir. Sonra
qonaqlar Göygöl şəhərinin mərkəzi
parkında olmuş, burada rayon ağsaqqalları ilə səmimi
söhbət etmişlər. Daha sonra qonaqlar XIX əsrdə
almanlar tərəfindən inşa edilmiş və keçən
il Almaniyanın Azərbaycandakı səfirliyinin maliyyə dəstəyi
ilə əsaslı təmir edilmiş Lüteran kilsəsinə
gəlmişlər. Qonaqlar təmirdən sonra tarix və
diyarşünaslıq müzeyi kimi fəaliyyət göstərən
kilsədə rayonun simli alətlərdən ibarət simfonik
orkestrinin və məktəblilərin xor kollektivinin
çıxışlarını dinləmişlər. Həm
Azərbaycan və həm də alman bəstəkarlarının
əsərlərinə maraqla qulaq asan qonaqlar ansamblın
üzvləri ilə maraqlı söhbətlər etmiş,
xatirə şəkli çəkdirmiş, birlikdə xor ifa
etmişlər.
Sonra muzeyi gəzən
qonaqlar vaxtilə burada yaşamış babalarının
işlətdikləri məişət əşyalarına
maraqla tamaşa etmiş, həmin dövrdə onların
geydikləri paltarların nümunələrinə
baxmış və nümunələr qarşısında
şəkil çəkdirmişlər. Burada xalq
aşığının ifasında səslənən el
havaları da qonaqlarda maraq doğurmuşdur.
Muzeydə vaxtilə
burada yaşamış almanların siyahısının vurulacağını
bildirən guşənin açılışı
olmuşdur. Almaniyalı qonaqları müşayiət edən
mədəniyyət və turizm naziri Əbülfəs Qarayev,
Göygöl Rayon İcra Hakimiyyətinin
başçısı Arif Seyidov və Almaniyanın
Baden-Vürtemberq federal torpağının Baş naziri
Günter Oettinger açılışı bildirən rəmzi
lenti kəsdikdən sonra yubiley tədbirinin
iştirakçıları almanların şəhər mərkəzində
inşa etdikləri binanın 2-ci mərtəbəsindən
şəhəri seyr etmişlər.
Sonra tədbir
iştirakçıları əsası almanlar tərəfindən
qoyulan Göygöl şərab zavoduna gəlmiş, istehsal
prosesini izləmişlər. Müəssisənin 15 metr dərinlikdə
yerləşən zirzəmisinə düşən qonaqlar
burada şampan şərablarının saxlanması
texnologiyası ilə tanış olmuşlar. Müəssisənin
rəhbəri Ceyhun İsmayılov qonaqlara bildirmişdir ki,
zirzəmidə ilin bütün fəsillərində temperatur
14-16 dərəcə olur.
"Şəhər
günü" ilə əlaqədar yubiley tədbirləri
Göygöl Rayon İcra Hakimiyyətinin iclas salonunda davam
etdirilmişdir. Bu münasibətlə keçirilən
konfransda əvvəlcə Azərbaycan və Almaniya mütəxəssislərinin
ürək sözlərindən bəhs edən sənədli
film nümayiş etdirilmişdir. Sonra Göygöl Rayon
İcra Hakimiyyətinin başçısı Arif Seyidov
konfransı giriş sözü ilə açaraq yubiley şənliyində
iştirak edən bütün qonaqlara rayon əhalisi
adından minnətdarlığını bildirmiş və
rayonun tarixindən, son illər onun daha da inkişafı naminə
görülən işlərdən
danışmışdır.
Milli Məclisin
deputatı Rövşən Rzayev, Almaniyanın Azərbaycandakı
səfiri Per Kristofer Stançina, tarixçi alim, Azərbaycanda
alman kaloniyalarının tarixini araşdiran Yeva Mariya Aveh, Azərbaycanın
Almaniyadakı səfiri Pərviz Şahbazov
çıxış edərək yaradılanda Helenondorf, indi
isə Göygöl adlanan bu rayonun tarixinə iki
qaçqınlıq dövrünün - 1819-cu ildə
almanların, 1988-ci ildə isə Qarabağ müharibəsi
qaçqınlarının taleyi yazıldığını
qeyd etmiş və əmin olduqlarını bildirmişlər
ki, bu problem tezliklə öz həllini tapacaqdır. Gündən-günə
çiçəklənib inkişaf edən Azərbaycanın
bütün sahələrdə qazandığı nailiyyətləri
dilə gətirən natiqlər bunu dövlətimizin
başçısının apardığı uğurlu
daxili və xarici siyasətin nəticəsi kimi dəyərləndirmişlər.
Sonra Almaniyanın
Baden-Vürtemberq federal torpağının Baş naziri
Günter Oettinger çıxış edərək iki ölkə
arasında yaranmış dostluq əlaqələrindən,
parlamentlərdəki Almaniya-Azərbaycan dostluq qrupunun səmərəli
fəaliyyətindən, eləcə də əsl beynəlmiləl
ölkə olan Azərbaycanda bütün millətlər
üçün yaradılan bərabərhüquqlu şəraitdən
danışmış, bütün bunları öz gözləri
ilə gördüyünü vurğulamışdır. Natiq
belə görüşlərin davam etdirilməsinin vacibliyini
qeyd edərək demişdir ki, istər mədəni və istərsə
də iqtisadi əlaqələrin genişləndirilməsində
belə görüşlər böyük səmərə
verə bilər.
Azərbaycanın mədəniyyət
və turizm naziri Əbülfəs Qarayev şəhərin əsasını
qoyan insanların nəvələrinin bu gün keçirilən
190 illik yubileydə iştirakını müsbət hal kimi dəyərləndirmişdir.
Qeyd etmişdir ki, bu gün Azərbaycanda qorunan hər bir
tarixi abidə real faktlara söykənir və dövlətimizin
başçısı İlham Əliyevin, eləcə də
Heydər Əliyev Fondunun prezidenti Mehriban xanım Əliyevanın
diqqət və qayğısı sayəsində ölkəmizin
tarixi olduğu kimi təqdim edilir. Göygöl rayonundakı
alman mədəniyyəti xəzinəsinə daxil olan
bütün abidələrin qorunub gələcək nəsillərə
çatdırılması buna əyani sübutdur.
Konfransda rayon icra hakimiyyəti
adından almaniyalı qonaqlara xatirə hədiyyələri
verilmişdir.
Axşam "Şəhər
günü" münasibətilə rayon mərkəzində
respublikanın tanınmış incəsənət
ustalarının iştirakı ilə böyük bayram
konserti və atəşfəşanlıq olmuşdur.
AzərTAc
Azərbaycan.- 2009.- 14 avqust.- S. 2.