Gənc liderlərə insan hüquqları mövzusunda təlimlər keçirilmişdir

Avqustun 14-də Qazaxda Gənc liderlər üçün Yay Universitetinin iştirakçılarına insan hüquqları mövzusunda təlimlər keçirilmişdir.

Təlimlərdə Milli Məclisin deputatları Əli Hüseynov, Fuad Muradov, Mərkəzi Seçki Komissiyasının üzvü Rövşən İsmayılov, hüquqşünas-ekspertlər Otari Qvaledze və Səadət Yusifova iştirak etmişlər.

Tədbirdə Azərbaycanda insan hüquqlarının qorunması, bu sahədə görülən işlər, qarşıda duran vəzifələr və digər məsələlər ətraflı müzakirə edilmişdir.

Bildirilmişdir ki, dünyanın əksər ölkələrinin konstitusiyalarında insan hüquqlarının qorunması ilə bağlı xüsusi maddələr olsa da bu, təcrübədə tətbiq olunmur. Həmin ölkələrdən fərqli olaraq Azərbaycanda insan hüquqlarının qorunması sahəsində Konstitusiya normaları ardıcıl və yüksək səviyyədə yerinə yetirilir.

Vurğulanmışdır ki, Azərbaycan dövləti insan hüquq və azadlıqlarının qorunmasına bir qayda olaraq qayğı ilə yanaşır. Azərbaycanın MDB məkanında və Şərqdə ölüm cəzasını ləğv edən ilk ölkələrdən biri olması da bunun bariz nümunəsidir. Milli Məclisin Hüquq siyasəti və dövlət quruculuğu komitəsinin sədri Əli Hüseynov Dağlıq Qarabağ münaqişəsinin həlli istiqamətində Azərbaycan diplomatiyasının beynəlxalq uğurlarından söz açaraq bildirmişdir ki, Ermənistan ordusunun ölkəmizin ərazilərini işğal etməsi ilə bağlı rəsmi sənəd ilk dəfə olaraq Avropa Şurası Parlament Assambleyasında və Almaniya parlamentində qəbul edilmişdir. Bu sənədlərdə Ermənistan ordusunun Azərbaycan torpaqlarını işğal etməsi faktı rəsmən öz əksini tapmışdır.

Tədbirdə bildirilmişdir ki, insan hüquqlarının müdafiəsi istiqamətində qazandığımız uğurlar dünyada ölkəmizin imicinin daha da yüksəlməsi üçün vacib olan amillərdən biridir.

Təlimlərdə iştirakçıların sualları cavablandırılmış, müzakirələr aparılmışdır.

Sonra təlimlər hüquqşünas-ekspertlərin iştirakı ilə müxtəlif qruplarda davam etdirilmişdir.

AzərTAc

Azərbaycan.- 2009.- 15 avqust.- S. 2.