Qəbələdə Beynəlxalq musiqi festivalı və pianoçuların müsabiqəsi davam edir

Xəbər verdiyimiz kimi, Heydər Əliyev Fondunun dəstəyi ilə avqustun 13-dən Azərbaycanın ən gözəl guşələrindən birində - Qəbələdə Beynəlxalq musiqi festivalı və pianoçuların müsabiqəsi keçirilir.

Yarışların ikinci günü, pianoçuların müsabiqəsində iştirakçıların çıxış sırasını müəyyən etmək üçün püşkatma keçirilmişdir.

Pianoçular müsabiqəsinin 22 iştirakçısından 7-si Azərbaycanı, digərləri isə Rusiya, ABŞ, Yaponiya, Çin, Fransa, Xorvatiya və Bolqarıstanı təmsil edirlər.

Azərbaycanlı ifaçılar 3, 4, 5, 7, 16, 17 və 21-ci sırada çıxış edəcəklər. Avqustun 14-də həmçinin Beynəlxalq musiqi festivalı çərçivəsində kamera musiqisi konserti keçirilmişdir.

Əvvəlcə çıxış edənlər bildirmişlər ki, festival bir daha Azərbaycanda gənclər üçün geniş üfüqlərin yaradıldığını nümayiş etdirir. Sonra söz musiqiyə verilmişdir. Konsertin əsas özəlliyi ustadlarla yanaşı, gənc musiqiçilərin bir səhnədə çıxış etməsində idi.

Xatırladaq ki, musiqi bayramı avqustun 23-dək davam edəcəkdir.

Azərbaycan.- 2009.- 16 avqust.- S. 4.