Beynəlxalq musiqi festivalı iştirakçılarının bir qrupu Şəkidə olmuşdur

Heydər Əliyev Fondunun təşəbbüsü ilə Qəbələdə keçirilən Beynəlxalq musiqi festivalı iştirakçılarının bir qrupu Şəki şəhərində olmuşdur.

Şəhər icra hakimiyyətindən bildirmişlər ki, festival iştirakçıları Xan sarayının qarşısında mehribanlıqla qarşılanmışlar. Sonra qonaqlar sarayın qala divarları içərisindəki meydanda xalqımızın qədim atüstü milli oyunlarından olan "Sür papaq" oyununa tamaşa etmiş, folklor kollektivlərinin çıxışlarını izləmiş, sarayın həyətində çay süfrəsi ətrafında Şəki şirniyyatının dadına baxmışlar. Şərq memarlığının nadir incilərindən olan Xan sarayı ilə tanışlıq festival iştirakçılarının böyük marağına səbəb olmuşdur.

Sonra qonaqlar "Yuxarı Baş" Tarix-Memarlıq Qoruğunun ərazisində yerləşən Tarix-Diyarşünaslıq və Xalq Tətbiqi Sənəti muzeyləri, habelə XVIII əsrə aid memarlıq abidəsi "Yuxarı Karvansara" mehmanxana kompleksi ilə yaxından tanış olmuşlar.

Festival iştirakçıları Şəkidən xoş təəssüratlarla ayrılmışlar.

Azərbaycan.- 2009.- 18 avqust.- S. 3.