Küveytin nüfuzlu "Əl-Ray" qəzetində Azərbaycanın inkişafı barədə məqalə dərc edilmişdir

Küveytin nüfuzlu "Əl-Ray" qəzetinin 15 avqust nömrəsində Azərbaycanın bu ölkədəki səfiri Şahin Abdullayevin müsahibəsi dərc olunmuşdur.

Azərbaycanın Küveytdəki səfirliyindən bildirmişlər ki, müsahibədə Prezident İlham Əliyevin uğurlu daxili və xarici siyasi kursu, bu siyasətin məntiqi nəticəsi olaraq ölkəmizdə bütün sahələri əhatə edən sürətli inkişaf barədə geniş məlumat verilmişdir.

Cari ilin fevralında Prezident İlham Əliyevin Küveytə rəsmi səfəri də müsahibənin əsas məqamlarındandır. Müsahibədə bildirilir ki, rəsmi səfər çərçivəsində Azərbaycan dövlətinin başçısının Küveyt rəhbərliyi ilə səmərəli görüşləri və müxtəlif sahələrlə bağlı beş mühüm sənədin imzalanması dost xalqlarımız arasında tarixi, dini, mənəvi bağlılıqdan qaynaqlanan siyasi və iqtisadi əlaqələrin inkişafı üçün münbit şərait yaratmışdır.

Bundan əlavə, müsahibədə Küveyt əmirinin Azərbaycan Prezidentinin dəvəti ilə ölkəmizə səfərinin gözlənildiyi barədə məlumat verilmiş, bu cür yüksək səviyyəli səfərlərin dövlətlərimiz arasında əlaqələrin daha dinamik inkişafına güclü təkan verdiyi qeyd olunmuşdur.

İkitərəfli münasibətlər kontekstində Azərbaycan xalqının Küveyti yalnız bir neft ölkəsi kimi deyil, hərtərəfli - tarix, mədəniyyət, incəsənət, ədəbiyyat baxımından da tanımaq arzusu barədə də məlumat verilmişdir. Bu istiqamətdə atılan addımlardan biri kimi Bakının 2009-cu ildə İslam mədəniyyətinin paytaxtı elan edilməsi ilə bağlı keçirilmiş tədbirlər çərçivəsində cari ildə Azərbaycanda Küveyt mədəniyyət həftəsinin təşkil olunması məqsədilə Küveytin Mədəniyyət, İncəsənət və Ədəbiyyat Milli Şurası nümayəndə heyətinin Bakıya dəvət olunduğu bildirilir.

Müsahibədə, həmçinin Azərbaycanda həyata keçirilən genişmiqyaslı islahatlar, layihələr, əlverişli investisiya mühiti və turizm sektoru barədə məlumatlar da öz əksini tapmışdır.

AzərTAc

Azərbaycan.- 2009.- 19 avqust.- S.1.